នៅដើមខែមករានេះ សង្កេតឃើញថា Rapstar របស់យើងជាច្រើននាក់បានទំលាក់បទនៅក្នុងពេលដំណាលៗគ្នា ដែលធ្វើអោយហ្វេនៗតាមស្ទើរតែមិនទាន់! រាប់ចាប់ពីបទ«2AM» របស់លោកជីដេវីត បទ«All In» របស់លោកវណ្ណដាដែលកំពុងជាប់នៅលើតារាង Top Trending យូធូបប្រចាំសប្តាហ៍ ក៏ដូចជាអាល់ប៊ុម ACHIEVE របស់ក្រុម La Cima Cartel ផងដែរដែលមានរហូតទៅដល់១០បទ ព្រមទាំងបទ«កំលោះអូឡាក់ហ្ស៊ីន» របស់លោក Vito និងបទ«យល់ច្រលំ» របស់លោកKwan ជាដើម។
ជាពិសេសកាលពីរយៈពេលបីថ្ងៃកន្លងទៅនេះ ក៏សង្កេតឃើញថាមានផ្ទុះបទចំរៀងថ្មីមួយទៀត ដែលប្លែកទាក់ទាញ មានភាព Unique មួយនៃបទចំរៀងតែម្តង។ ដោយផ្តើមឡើងពីក្មេងប្រុសម្នាក់បើកក្បាល Inro បទចំរៀងឡើងដោយស្រែកច្រៀងតាមសំលេងកុមារថា«ជីវិតមានតែ១នោះទេ ជីវិតមានតែ១នោះទេ» យ៉ាងទាក់ត្រចៀកតែម្តង។
ហើយក្មេងប្រុសម្នាក់នោះគឺគ្មាននរណាក្រៅពីកូនប្រុសបង្កើតរបស់ King Rapstar របស់យើងគឺលោក Kingchi រឺហៅថា Daddy Chi នោះទេ ដែលលោកបានណែនាំកូនប្រុសរបស់លោកជាលើកដំបូងតាមរយៈបទចំរៀងនេះ។ ជាក់ស្តែងលោកបានឧទ្ទេសនាមបទនេះឡើងដោយចំណងជើងថា«១ស្មើ រឺ One Life» ដោយបានចូលរួមបកស្រាយឡើងដោយមនុស្ស៣នាក់ គឺមានរូបលោក លោក RuthKo និងកូនប្រុសរបស់លោកផងដែរគឺមានឈ្មោះថា Elphen។ គួរបញ្ជាក់ថា នៅក្នុងថ្ងៃចេញផ្សាយបទចម្រៀងនេះដំបូង លោកវណ្ណដាក៏បានចូលរួមចែករំលែកបន្តបទនេះផងដែរ ដោយនេះសបញ្ជាក់អោយឃើញថា លោកវណ្ណដាបានបង្ហាញការគាំទ្រលើគោលគំនិត និងអត្ថន័យនៃបទចំរៀងមួយនេះ។ ចុះទស្សនិកជនយល់ឃើញយ៉ាងណាដែរចំពោះអត្ថន័យ និងតំលៃអប់រំនៃបទចំរៀងមួយនេះវិញ?
