កាលពីថ្ងៃទី១៧ ខែមិថុនាកន្លងទៅនេះ កម្មវិធី The Rapper Cambodia បានពន្ញាក់អារម្មណ៍ទស្សនិកជនជាមួយនឹងការបង្ហាញឡើងនូវវត្តមានសមាសភាពចុងក្រោយនៃ Coach របស់ខ្លួនដែលទស្សនិកជនមិនបានរំពឹងទុកទាល់តែសោះ ខណៈដែលកាលពីរំលងមួយសប្តាហ៍មុន មានត្រឹមតែវិដេអូ Guessing Coaches ចំនួន៣ប៉ុណ្ណោះត្រូវបានចេញផ្សាយឡើងនៅក្នុងសប្តាហ៍តែមួយ។

យ៉ាងណាមិញនៅក្នុងថ្ងៃនោះផងដែរ The Rapper Cambodia បានណែនាំ Coachទី៤ របស់ខ្លួន គឺជាលោក Khmer1Jivet ថាជាកំពូលតារារ៉េបរៀមច្បងដ៏ឆ្នើមមួយរូបក្នុងវិស័យ ដែលគ្រប់គ្នាគោរពកោតសរសើរសមត្ថភាពរបស់លោក ហើយលោកក៏ជាគំរូពិសេសដែលមានឥទ្ធិពលទៅលើតារារ៉េបខ្មែរជំនាន់ថ្មីអោយខិតខំធ្វើចម្រៀង HipHop។ 

ខណៈជាមួយគ្នានេះផងដែរ លោក Leng Sovan Dara ហៅខ្មែរ១ជីវិតក៏បានធ្វើការចែករំលែកបន្តវិដេអូបង្ហោះឡើងនោះជាមួយនឹងខេបសិនថា«Ohhhhhh….ម៉េចម៉ាទេទៅខ្មែរលើកនេះ បងប្អូនយើងទាំងអស់គ្នា បើឃើញហៅផង ខ្មែរចាលាញ់ខ្មែរ ហិហិហិ»។ 

ដំណឹងមួយនេះបានធ្វើអោយទស្សនិកជនមានការចាប់អារម្មណ៍ និងរំភើបចិត្តជាខ្លាំងនឹងវត្តមានរបស់លោកមកក្នុងប្រទេសកម្ពុជា​​​ និងជាពិសេសក៏កាន់តែជឿជាក់យ៉ាងមុតមាត់លើសមត្ថភាព និងកម្រិតចំណេះដឹងរបស់លោកក្នុងនាមជាគ្រូបង្វឹកដល់តារារ៉េបខ្មែរជំនាន់ក្រោយនេះផងដែរ។

កត់សម្គាល់ឃើញថានៅក្នុងវិដេអូបទសម្ភាសន៍ Online នោះ លោកខ្មែរ១ជីវីតបានបង្ហាញចំណាប់អារម្មណ៍ខ្លះៗអោយដឹងថាសំរាប់លោក លោកគិតថាបទបែប HipHip គឺជាបទដែលមានឥទ្ធិពលជាងគេ ដែលអាចអោយសេរីភាពដល់អ្នករ៉េបក្នុងការបង្ហាញគំនិតរបស់ខ្លួនជាសំនួនឃ្លោងឃ្លាវាចា ដែលនេះក៏អាចជំរុញទឹកចិត្ត រឺផ្លាស់ប្តូរផ្នត់គំនិតរបស់អ្នកស្តាប់បានដូចគ្នា។ ចុះទស្សនិកជនវិញយល់ឃើញយ៉ាងណាដែរ?