កាលពីថ្ងៃច័ន្ទទី២២ ខែឧសភាកន្លងទៅនេះ លោក Khmer1Jivet បានបញ្ចេញបទចម្រៀងច្រៀងផ្ទាល់របស់លោកមួយនៅលើគណនីហ្វេសប៊ុកផ្ទាល់ខ្លួនរបស់លោកដែលមានឈ្មោះថា Leng Sovan Dara។ បទចម្រៀងមួយនេះផងដែរ ក៏ទទួលបានការចាប់អារម្មណ៍ និងចែករំលែកជាច្រើនពីទស្សនិកជន ដោយមហាជនមួយចំនួនចាប់អារម្មណ៍ឃើញថាវាជាប្រភេទបទចម្រៀងរ៉េបលើកទឹកចិត្តដ៏មានអត្ថន័យខ្លឹមសារយ៉ាងមានឥទ្ធិពល។ 

គួរអោយចាប់អារម្ម​​​ណ៍ផងដែរថា ការច្រៀងផ្ទាល់របស់លោក Khmer1jivet តាមរយៈ Facebook Reel មួយនេះ បានធ្វើអោយទស្សនិកជនមួយចំនួនធំបានងាកមកចាប់អារម្មណ៍លើបទចម្រៀងថ្មីមួយនេះរបស់លោកដែលត្រូវបានចេញផ្សាយរួចមកហើយនៅលើឆាណែលយូធូបផ្លូវការរបស់លោកកាលពីថ្ងៃទី០២ ខែឧសភាដែលមានរយៈពេលជាង៣សប្តាហ៍កន្លងទៅនេះ។ 

ដោយបទចម្រៀងមួយនេះរបស់លោកគឺមានចំណងជើងថា«Struggle»ដោយត្រូវបានចេញផ្សាយតំណាលគ្នានឹងបទចម្រៀងសេសសល់ឯទៀតរបស់លោកពីក្នុងអាល់ប៊ុម Murder All Odd ដែលមានសរុបប្រមាណជាង១៦បទ។ យ៉ាងណាមិញផងដែរ សង្កេតឃើញថាមហាជនមួយចំនួនធំក៏បានលើកឡើងសរសើរពេញចិត្តនូវស្នាដៃនិពន្ធតាក់តែងរបស់លោកមួយនេះជាខ្លាំង ដោយពួកគេសង្កត់ធ្ងន់ថាលោកពិតជាសក្តិសមជា Legendary ដែលមិនធ្វើអោយខកបំណងមែន ទាំងអត្ថន័យ និងចុងចួនបទចម្រៀងគឺធ្វើបានល្អ ជាពិសេសពេញចិត្តនូវមូលន័យទាំងមូលដែលជាបទចម្រៀងជំរុញលើកទឹកចិត្តជំរុញអោយមានការខិតខំប្រឹងប្រែងតស៊ូ។ 

ម្យ៉ាងវិញទៀតផងដែរ កាលពីពេលថ្មីៗនេះ លោកខ្មែរមួយជីវិតក៏ទើបតែបានបង្ហាញពីគំរោងធ្វើបទចម្រៀងថ្មីផងដែរ តាមរយៈការបង្ហោះវិដេអូមួយបង្ហាញពីសកម្មភាពធ្វើបទចម្រៀងថ្មីជាមួយនឹងកូនប្រុសរបស់លោក។ តើទស្សនិកជនទាំងអស់គ្នាយល់ឃើញយ៉ាងណាដែរចំពោះស្នាដៃបទចម្រៀងថ្មីៗរបស់លោកទាំងនេះ?