Khloé Kardashian និង Tristan Thompson បច្ចុប្បន្នកំពុងផ្តោតលើការចិញ្ចឹមកូនស្រីដែលមានឈ្មោះថា True អាយុ ៣ឆ្នាំរួមគ្នា ។ Khloé Kardashian កំពុង "កាត់ចិត្ត" ពីអតីតសង្សាចាស់គឺលោក Tristan Thompson ចំពេលលោកមានបញ្ហាថ្មីទាក់ទងនឹងភាពមិនស្មោះត្រង់របស់គាត់។

Thompson អាយុ 30 ឆ្នាំ កំពុងត្រូវបានប្តឹងដោយ Maralee Nichols សម្រាប់ការចិញ្ចឹមកូន និងថ្លៃសេវាទាក់ទងនឹងការមានផ្ទៃពោះ បន្ទាប់ពីនាងបាននិយាយថា ពួកគេមានផ្ទៃពោះកូនជាមួយគ្នា កាលពីខែមីនា នេះបើយោងតាមឯកសាររបស់តុលាការដែលទទួលបានដោយគេហទំព័រ PEOPLE ។ អ្នកតំណាងរបស់នាង បានប្រាប់ PEOPLE ថា Maralee Nichols បានផ្តល់កំណើតដល់កូនប្រុសម្នាក់ កាលពីសប្តាហ៍មុននេះ។

ឯកសារតុលាការដែល បានលេចឡើងក្នុងពេលថ្មីៗនេះត្រូវបានដាក់ពាក្យបណ្តឹងកាលពីរដូវក្តៅបន្ទាប់ពី Kardashian ដែលមានអាយុ 37ឆ្នាំ និង Thompson បានបែកបាក់គ្នា។ ប្រភពមួយបាននិយាយថា “Khloé កំពុងកាត់ចិត្តពីគាត់”។ "Tristan និង Khloé បានបែក គ្នាមួយរយៈ ហើយចំណែកឯរឿងរ៉ាវរវាងពួកគេគឺមិនមានបញ្ហាអ្វីនោះទេ"។

ប្រភពខាងក្នុងមួយបានបន្ថែមថា អតីតគូស្នេហ៍មួយគូនេះគឺផ្ដោតលើការចិញ្ចឹមកូនស្រីអាយុ ៣ឆ្នាំ របស់ពួកគេរួមគ្នា។ (Thompson ក៏ចិញ្ចឹមកូនប្រុសឈ្មោះ Prince អាយុ 4ឆ្នាំ រួមគ្នាជាមួយអតីតមិត្តស្រី Jordan Craig ផងដែរ) ។ ប្រភពមួយផ្សេងទៀតបានប្រាប់ PEOPLE នៅដើមសប្តាហ៍នេះថា Kardashian "បានដឹងអំពីទារកដែលទើបនឹងកើតនោះ" ហើយបានបញ្ជាក់ថា នាងនិង Thompson "នៅមានទំនាក់ទំនងនឹងគ្នាក្នុងខែមីនានៅឡើយ" នៅពេលដែលគាត់បានសារភាពថាបានរួមភេទជាមួយ Nichols នេះបើយោងតាមឯកសាររបស់តុលាការ។

Kardashian និង Thompson បានបែកគ្នាហើយត្រូវគ្នាវិញជាច្រើនលើកច្រើនសារមកហើយក្នុងរយៈពេលប៉ុន្មានឆ្នាំមកនេះ ហើយការបែកបាក់គ្នាចុងក្រោយបំផុតគឺនៅក្នុងខែមិថុនា។ កាលពីខែសីហា ប្រភពមួយបាននិយាយថា អ្នកទាំងពីរកំពុងបន្ត "រក្សាភាពរួសរាយរាក់ទាក់នឹងគ្នា" ក្រោយការបែកបាក់គ្នា ដើម្បីជាប្រយោជន៍ដល់ True ដែលជាកូនស្រីរបស់ពួកគេ។

ប្រភពខាងក្នុងក៏បាននិយាយបន្ថែមនៅពេលនោះថា "គោលដៅរបស់ Khloé គឺតែងតែបង្កើតស្ថានភាពល្អបំផុតសម្រាប់ True" ។ "មិនថាមានអ្វីកើតឡើងជាមួយ Tristan, Khloé ចង់ឱ្យ True ដឹងថាឪពុកម្តាយទាំងពីររបស់នាងស្រឡាញ់នាងយ៉ាងខ្លាំង"៕

អត្ថបទដកស្រង់ពី People
បកប្រែនិងកែសម្រួលដោយ Mr. Blue