ព្យុះឈ្មោះ ខាណុន (KHANUN) នឹងជះឥទ្ធិពល​ដល់កម្ពុជា ព្រមទាំងបណ្ដាប្រទេសមួយចំនួនទៀត ដោយបង្កឱ្យមានភ្លៀងធ្លាក់លាយឡំដោយផ្គរ រន្ទះ និងខ្យល់កន្ត្រាក់ ចាប់ពីថ្ងៃទី២ ដល់ថ្ងៃទី៨ ខែសីហា ឆ្នាំ២០២៣។

យោងតាមសេចក្ដីប្រកាសព័ត៌មានរបស់ក្រសួងធនធានទឹក និងឧតុនិយម បានឱ្យដឹងនៅព្រឹកថ្ងៃទី១ ខែសីហា ឆ្នាំ២០២៣នេះថា ​​កម្ពុជាទទួលឥទ្ធិពលពីប្រព័ន្ធសម្ពាធទាបអូសបន្លាយលើភាគខាងជើងប្រទេសឡាវ និង ប្រទេសវៀតណាម គួបផ្សំនឹងខ្យល់មូសុងនិរតីក្នុងកម្រិតមធ្យម ។ ដោយឡែកក្នុងមហាសមុទ្រប៉ាស៊ីហ្វិក ព្យុះឈ្មោះ ខាណុន (KHANUN) កំពុងធ្វើដំណើរឆ្ពោះទៅភាគខាងកើតប្រទេសចិន ។

សេចក្ដីប្រកាសព័ត៌មានបានឱ្យដឹងបន្តថា លក្ខណៈទាំងនេះនឹងធ្វើឲ្យតំបន់ទំនាបកណ្តាល និងតំបន់ខ្ពង់រាប ព្រមទាំងតំបន់មាត់សមុទ្រ ​​អាចមានភ្លៀងធ្លាក់ក្នុងកម្រិតពីមធ្យមទៅបង្គួរ លាយ​ឡំដោយផ្គរ រន្ទះ និងខ្យល់កន្ត្រាក់ ខណៈនៅលើផ្ទៃសមុទ្រ នឹងមានខ្យល់បក់បោកខ្លាំង ព្រមទាំងរលកសមុទ្រមានកម្ពស់ខ្ពស់ ។

ក្រសួងធនធានទឹក និងឧតុនិយម បាន​ដាស់តឿនដល់សាធារណជនឱ្យ​បង្កើនការប្រុងប្រយ័ត្ន ចំពោះបាតុភូតធម្មជាតិ ដែលអាចកើតមានឡើងជាយថាហេតុ៕