មីស៊ីលរបស់រុស្ស៊ីមួយគ្រឿងបានវាយប្រហារមកលើប្លុកអាផាតមេនមួយកន្លែងនៅក្នុងទីក្រុងDnipro របស់អ៊ុយក្រែនកាលពីថ្ងៃទី១៤ ខែមករាកន្លងទៅនេះ និងបានសម្លាប់មនុស្ស៣៥នាក់ផងដែរ។ អ៊ុយក្រែននិយាយថាអគារមួយនេះត្រូវបានកំទេចដោយកាំជ្រួចមីស៊ីល Kh-22 មួយគ្រឿង ដែលជាប្រភេទមីស៊ីលប្រឆាំងកប៉ាល់នាសម័យសហភាពសូវៀត។ មីស៊ីលនុយក្លេអ៊ែររបស់សូវៀត Kh-22 នេះត្រូវបានរចនាឡើងដើម្បីបំផ្លាញនាវាដឹកយន្តហោះរបស់សហរដ្ឋអាមេរិច និងក្រុមនាវាចម្បាំង។ ប្រភេទកំណែទំរង់ខ្លះរបស់វាត្រូវបានរចនាដើម្បីផ្សារភ្ជាប់ភាពត្រូវគ្នាជាមួយនឹងផ្ទៃគោលដៅផ្សេងៗដូចជាស្ពាន ទំនប់ និងគោលដៅតំបន់យុទ្ធសាស្រ្តផ្សេងៗទៀតជាដើម។ មុនដំបូងឡើយមីស៊ីល Kh-22 ត្រូវបានដឹកដោយយន្តហោះទំលាក់គ្រាប់បែក Tu-22 នៃប្រភេទកំណែទំរង់ផ្សេងៗ រាប់បញ្ចូលដោយ Tu-22K, Tu-22KD, Tu-22KP និងTu-22KPD។
សេចក្តីរាយការណ៍បានលើកឡើងថាបន្ទាប់ពីបាញ់បង្ហោះមីស៊ីល Kh-22 នេះ វានឹងហោះឡើងទៅដល់រយៈកម្ពស់ដល់ទៅ២២.៥គីឡូម៉ែត្រឯណោះ។ សហភាពសូវៀតបានអះអាងថាកំណែទំរង់ដើមរបស់មីស៊ីល Kh-22 នេះនឹងមានលទ្ធភាពអាចវាយប្រហារចំគោលដៅបាន៨០% ប៉ុន្តែសំរាប់កំណែទំរង់ថ្មីនេះត្រូវបានរាយការណ៍មកថាអាចកើនឡើងរហូតដល់ ៩៧%ឯណោះ។ យោធាអ៊ុយក្រែននៅមិនទាន់មានអាវុធទំនើបដែលអាចវាយប្រហារមីស៊ីល Kh-22 បាននៅឡើយទេសព្វថ្ងៃនេះ។ មីស៊ីល Kh-22 អាចរកឃើញបាននូវការបាញ់បង្ហោះ រយៈកម្ពស់ និងល្បឿនហោះហើររបស់វា ប៉ុន្តែការហោះហើររបស់មីស៊ីលបានទៅដល់ចម្ងាយរាប់រយម៉ែត្រទៅហើយ។ អ៊ុយក្រែននឹងត្រូវការប្រព័ន្ធមីស៊ីលប្រឆាំងយន្តហោះធន់ធ្ងន់ដើម្បីស្ទាក់ចាប់មីស៊ីលKh-22រយៈចម្ងាយឆ្ងាយ។
មេបញ្ជាការកងកម្លាំងអាកាសអ៊ុយក្រែនលោក Oleshchuk បាននិយាយឡើងថាប្រព័ន្ធមីស៊ីលប្រឆាំងយន្តហោះលោកខាងលិចដូចជា Patriot PAC-3sជាដើមអាចមានសមត្ថភាពបាញ់ប្រហារមីស៊ីលលឿនជាងល្បឿនសំលេង Kh-22បាន។ សហរដ្ឋអាមេរិចបានយល់ព្រមនឹងផ្គត់ផ្គង់ប្រព័ន្ធបាញ់បង្ហោះ Patriot Battery មួយគ្រឿងទៅកាន់អ៊ុយក្រែនផងដែរដើម្បីប្រយុទ្ធប្រឆាំងនឹងកងកម្លាំងរុស្ស៊ី។ មន្ទីរពិសោធន៍ Pentagon និយាយឡើងថាមានទាហានអ៊ុយក្រែន៩០ទៅ១០០នាក់នឹងត្រូវទទួលការបណ្តុះបណ្តាលប្រើប្រាស់ប្រព័ន្ធមីស៊ីលទាំងនេះនៅមូលដ្ឋានទ័ព Fort Sill នៃរដ្ឋ Oklahoma ផងដែរ។ នៅខណៈនេះផងដែរប្រធានអង្គការណាតូលោក Jens Stoltenberg បាននិយាយថាអ៊ុយក្រែននឹងអាចរំពឹងថាទទួលបានអាវុធធន់ធ្ងន់បន្ថែមទៀតនៅក្នុងពេលអនាគតដ៏ខ្លី។
