អាមេរិករារាំងនាវាចិនមិនឲ្យធ្វើដំណើរឆ្លងកាត់ព្រែកជីកស៊ុយអេ និងសមុទ្រក្រហមតាមរយៈដំឡើងថ្លៃធានារ៉ាប់រងដែនសមុទ្រ! ក្រុមហ៊ុនចិនដ៏ធំ COSCO បានព្យាយាមប៉ះប៉ូវចន្លោះប្រហោងដែលក្រុមហ៊ុនដឹកជញ្ជូនអឺរ៉ុបបានបន្សល់ទុកនៅពេលដែលពួកគេបានដកខ្លួនចេញពីការធ្វើដំណើរតាមព្រែកជីកស៊ុយអេ ប៉ុន្តែអាមេរិកបានដាក់សម្ពាធលើក្រុមហ៊ុនដឹកជញ្ជូនចិនតាមរយៈដំឡើងថ្លៃធានារ៉ាប់រងដែនសមុទ្រ ដែលធ្វើឱ្យក្រុមហ៊ុនដឹកជញ្ជូនចិនចាកចេញពីផ្លូវព្រែកជីកស៊ុយអេ និងសមុទ្រក្រហម ទោះបីជាផ្លូវសុវត្ថិភាពរបស់ពួកគេគឺច្រកសមុទ្រ Bab al-Mandab ក៏ដោយ។ សហរដ្ឋអាមេរិកកំពុងអនុវត្តការបិទព្រែកជីកស៊ុយអេ ក្នុងគោលបំណងរារាំងប្រទេសចិនពីការត្រួតត្រាលើវិស័យដឹកជញ្ជូនកុងតឺន័រ និងដាក់សម្ពាធលើសេដ្ឋកិច្ចអេហ្ស៊ីបដើម្បីបង្ខំអោយអេហ្ស៊ីបទទួលយកការផ្លាស់ទីលំនៅពីតំបន់ហ្គាហ្សាស្រ្ទីប។ នៅក្នុងបរិបទនេះ អ៊ីស្រាអែលបានទំលាក់គ្រាប់បែកលើច្រកព្រំដែន Kerem Shalom ដើម្បីធានាថាជំនួយនឹងមិនចូលទៅក្នុងតំបន់ហ្គាហ្សា។ តើអ្វីខ្លះជាការខាតបង់នៃព្រែកជីកស៊ុយអេដែលបង្កឡើងពីការបិទច្រកសមុទ្រ Mandab របស់ក្រុម Houthi ? តើអេហ្ស៊ីបអាចទប់ទល់នឹងសម្ពាធនេះបានដែររឺទេ?
-
អាមេរិកបិទលើព្រែកជីកស៊ុយអេ និងរារាំងនាវាចិនមិនឲ្យឆ្លងកាត់សមុទ្រក្រហម
យោងតាមសារព័ត៌មាន Lloyd’s List ចុះផ្សាយថ្ងៃទី២១ ខែធ្នូបានអោយដឹងថា ក្រុមហ៊ុនដឹកជញ្ជូនចិន COSCO Shipping ហាក់ដូចជាកំពុងធ្វើតាមបណ្តាក្រុមហ៊ុនដឹកជញ្ជូនផ្សេងៗទៀតក្នុងការចៀសវាងប្រើប្រាស់ផ្លូវធ្វើដំណើរតាមព្រែកជីកស៊ុយអេ ខណៈដែលក្រុមហ៊ុនត្រួតពិនិត្យដឹកជញ្ជូនកុងតឺន័រចាប់ផ្តើមគិតថ្លៃបន្ថែមទាក់ទងនឹងផ្លូវទឹកសមុទ្រក្រហម។
ទិន្នន័យតាមដាននាវារបស់ Lloyd's Intelligence បង្ហាញថា មានយ៉ាងហោចណាស់កប៉ាល់កុងតឺន័រចំនួន 12 គ្រឿងលើសពី 10,000 ទូកុងតឺន័របានបត់ឆ្ពោះទៅកាន់ភាគខាងត្បូងកាត់តាមជ្រលង Cape of Good Hope ខណៈដែលក្រុមហ៊ុនយក្សរបស់ចិនមិនទាន់បានប្រកាសជាផ្លូវការពីការជ្រើសរើសវិធីនេះដែរទេ។
ការផ្លាស់ប្តូរនេះកើតឡើងខណៈដែលមានការព្យាយាមបន្ថែមទៀតដោយក្រុមហ៊ុនត្រួតពិនិត្យការដឹកជញ្ជូន ដោយបង្កើនអត្រាការប្រាក់នៃសេវាកម្ម ទាក់ទងនឹងតំលៃថែរក្សាសុវត្ថិភាពបន្ថែមទៀត។
-
អ៊ីស្រាអែលទម្លាក់គ្រាប់បែកលើច្រកព្រំដែន Kerem Abu Salem
យោងតាមសារព័ត៌មាន Anadolu Ajansi ចុះផ្សាយថ្ងៃទី២២ ខែធ្នូបានអោយដឹងថា ការវាយប្រហារតាមអាកាសរបស់អ៊ីស្រាអែលបានកំណត់គោលដៅលើច្រកពាណិជ្ជកម្មប៉ាឡេស្ទីន Karm Abu Salem កាលពីថ្ងៃព្រហស្បតិ៍ និងបានសម្លាប់ប្រធានរបស់ពួកគេម្នាក់។
ប្រភពវេជ្ជសាស្រ្តប៉ាឡេស្ទីនបានប្រាប់កាសែត Anadolu ថា ការវាយប្រហារតាមអាកាសមកលើច្រកឆ្លងកាត់បានសម្លាប់ជនជាតិប៉ាឡេស្ទីនចំនួនបីនាក់ រួមទាំងប្រធានច្រកឆ្លងកាត់ផងដែរគឺលោក Bassam Ghaben ។
អាជ្ញាធរអ៊ីស្រាអែលបានអនុម័តកាលពីថ្ងៃទី15 ខែធ្នូកន្លងទៅនេះក្នុងការបើកឡើងវិញនូវច្រកព្រំដែន Karm Abu Salem រឺហៅម្យ៉ាងទៀតថា Karm Salem ដែលជាខ្សែទីពីរនៃច្រកនាំចូលសម្រាប់រថយន្តដឹកជំនួយទៅកាន់តំបន់ Gaza រួមជាមួយនឹងច្រកព្រំដែន Rafah ផងដែរ។
ច្រកព្រំដែន Karm Abu Salem គឺជាច្រកពាណិជ្ជកម្មដែលសកម្មតែមួយគត់ទៅកាន់តំបន់ហ្គាហ្សា ដែលតាមរយៈនោះត្រូវបាននាំចូលដោយសម្ភារៈសំណង់ ទំនិញ ប្រេងឥន្ធនៈ និងអាហារ។
-
ហ្ស៊កដានីប្រកាសផ្លូវថ្មីដើម្បីនាំយកជំនួយចូលហ្គាហ្សាដោយផ្ទាល់
យោងតាមសារព័ត៌មាន Anadolu Ajansi ចុះផ្សាយថ្ងៃទី២១ ខែធ្នូបានអោយដឹងថា លោក Al-Mubaideen បាននិយាយកាលពីថ្ងៃព្រហស្បតិ៍ថា ហ្ស៊កដានីកំពុងដឹកនាំកិច្ចខិតខំប្រឹងប្រែងអន្តរជាតិដើម្បីបន្តការបញ្ជូនជំនួយមនុស្សធម៌ និងការសង្គ្រោះដល់ប្រជាជននៅតំបន់ហ្គាហ្សាស្ទ្រីប ដោយពន្យល់ថា អង្គការសប្បុរសធម៌ហ្ស៊កដានី Hashemite និងកម្មវិធីស្បៀងអាហារពិភពលោកបានបញ្ជូនរថយន្តជំនួយ46គ្រឿងដែលផ្ទុកគ្រឿងឧបភោគបរិភោគមូលដ្ឋា750តោនកាលពីថ្ងៃពុធ។
លោកបាននិយាយថា រថយន្តដឹកជំនួយហ្ស៊កដានីបានឆ្ពោះទៅកាន់ច្រកព្រំដែន Al-Auja រួចបន្ទាប់មកទៅកាន់តំបន់ Gaza តាមរយៈច្រកព្រំដែន Kerem Shalom។
លោក Al-Mubaideen បានចង្អុលបង្ហាញថា ការដឹកជំនួយតាមរយៈច្រក Kerem Shalom គឺជាចម្ងាយដែលខ្លីជាងគេបំផុត និងធានាការមកដល់របស់វាកាន់តែលឿន។
