បទចំរៀងរបស់ក្រុមក្មេងខ្មែរដែលមានចំណងជើងថា«KeepGoing»បានចេញជាផ្លូវការហើយនាចុងខែកក្កដាក្នុងថ្ងៃទី៣១នេះ មាននៅលើកម្មវិធីPlengនិងបណ្តាញសង្គមមួយចំនួនដូចជាហ្វេសប៊ុក Instagram TikTok និងYoutube។ ការវិលត្រលប់របស់ពួកគេគឺនៅស្របពេលដែលសិល្បៈHipHopស្រុកខ្មែរក៏មានសន្ទុះលោតឡើងមិនធម្មតាផងដែរ ដោយមានលោកជីដេវីតទើបតែត្រលប់មកវិញដូចគ្នា និងមានលោកវណ្ណដាឈរជើងជាប់នៅលើវិថីមួយនេះ។ អាចនិយាយថាវាគឺជារឿងដ៏កម្រមួយដែលលោកជីដេវីតបានធ្វើការចែករំលែកបន្តវីឌីអូចំរៀងរបស់ក្រុមក្មេងខ្មែរ រួមទាំងសរសេរសារបង្ហាញការគាំទ្រដល់ពួកគេដែលត្រលប់មកសិល្បៈវិញថែមទៀតផង។

តែក៏ធ្វើអោយផ្ទុះការភ្ញាក់ផ្អើលមិននឹកស្មានដល់មួយសំរាប់អ្នកគាំទ្រ ព្រេាះយើងសង្តេតឃើញថាលោកជីដេវីដនិងក្មេងខ្មែរកម្របង្ហាញទំនាក់ទំនងរបស់ពួកគេជាសាធារណៈបែបនេះខ្លាំងណាស់។ គួរបញ្ជាក់ផងដែរក្រុមក្មេងខ្មែរបកស្រាយបទចំរៀងមួយបទនេះមានសមាជិកពីររូបគឺលោកកៅពន្លឺ និងលោកជាសុជាតិ។ បន្ទាប់ពីលោកជីដេវីតធ្វើការបង្ហេាះនូវសារនេះរួចក៏មានបណ្តាអ្នកគាំទ្រជាច្រើនរបស់លោកបានបង្ហាញចំណាប់អារម្មណ៍របស់ពួកគេដូចគ្នា។ ពួកគេបានសរសើរលោកជីដេវីតជាអាយដលគំរូម្នាក់ដែលបានជួយគាំទ្រសិល្បករដទៃមិនថាដើរនៅលើវិស័យតែមួយពោរពេញដោយការប្រកួតប្រជែង។  អ្នកខ្លះទៀតក៏បានស្នើរសុំអោយពួកគេទាំងពីរក៏ដូចជាតារារ៉េបដទៃទៀតនៅក្នុងស្រុកខ្មែរងាកមកចាប់ដៃគ្នារួមសហការជាមួយគ្នាផង  និងអ្នកមួយចំនួនទៀតភ្ញាក់ផ្អើលរហូតទប់ខ្លួនមិននឹង និងចង់ឃើញសហការគ្នាណាមួយនាពេលអនាគតផងដែរ។

អត្ថបទដោយ​ វត្តី