សិល្បករទាំងនេះបាននឹងកំពុងលើកឡើងប្រធានបទប្រឆាំងនឹងការមាក់ងាយជុំវិញជម្ងឺផ្លូវចិត្ត។ ខណៈពេលដែលប្រធានបទសុខភាពជម្ងឺផ្លូវចិត្តមិនសូវត្រូវបានគេលើកមកនិយាយច្រើននៅក្នុងប្រទេសមួយចំនួនក៏ដោយ ដោយឡែកបើងាកមកមើលនៅប្រទេសកូរ៉េខាងត្បូង ប្រធានបទនេះ គឺត្រូវបានចាប់អារម្មណ៍ច្រើន ដែលនៅឆ្នាំ ២០១៩ ប្រទេសនេះត្រូវបានចុះក្នុងចំណាត់ថ្នាក់ លេខ ៤ ក្នុងបញ្ជីប្រទេសដែលមានអត្រាធ្វើអត្តឃាតខ្លួនឯងខ្ពស់បំផុតនៅលើពិភពលោក។ កត្តារួមចំណែកដ៏ធំមួយចំពោះបញ្ហានេះ គឺទាក់ទងនឹងភាពតានតឹង និងសម្ពាធយ៉ាងខ្លាំង មានទៅលើនិស្សិត។ ការថែទាំសុខភាពផ្លូវចិត្តរបស់ពួកគេមិនសូវរឹងមាំនោះទេ បើប្រៀបធៀបទៅនឹងប្រទេសអភិវឌ្ឍន៍ដទៃទៀតដោយការសិក្សាកាលពីប៉ុន្មានឆ្នាំមុនបង្ហាញថា មានតែមនុស្ស ១៥.៣%  ប៉ុណ្ណោះមានជម្ងឺផ្លូវចិត្តហើយទទួលបានការព្យាបាល។

ទាក់ទងនឹងបញ្ហាទាំងអស់នេះគេសង្កេតឃើញមានសិល្បករ K-Pop មួយចំនួនដែលបាន លើកឡើងអំពីការតស៊ូផ្ទាល់ខ្លួនរបស់ពួកគេទាំងនៅក្នុងជីវិតផ្ទាល់ខ្លួន ក៏ដូចជាតាមរយៈតន្រ្តី របស់ពួកគេ ដែលនេះជាកត្តាបានជួយឲ្យប្រធានបទនេះត្រូវបើកចំហពិភាក្សាដោយសេរីនៅក្នុងសហគមន៍។ ហើយនេះគឺជាបទចម្រៀងចំនួន ១០ ដែលកំពុងជួយឲ្យការសន្ទនានេះចាប់ផ្តើម។

1. “Paranoia” ដោយលោក Kang Daniel

Kang Daniel បាននិយាយថា អាល់ប៊ុមដែលមានចំណងជើងថា ”Paranoia” ស្ថិតនៅក្នុង អាល់ប៊ុម Yellow ផ្ទាល់ខ្លួនរបស់គាត់ហើយបទចម្រៀងនីមួយៗនៅក្នុងអាល់ប៊ុមត្រូវបានសរសេរដោយផ្អែកលើស្ថានភាពលំបាកជាក់លាក់មួយនៅក្នុងជីវិតរបស់គាត់។

“អត្ថន័យនៃបទគឺបង្ហាញពីអារម្មណ៍ដែលបង្កប់នូវភាពទុក្ខសោក និងការឃ្លាតឆ្ងាយ។​ ដោយសារតែខ្ញុំកំពុងដោះស្រាយវិបត្តិនេះដែរ ខ្ញុំគឺចង់បង្ហាញវាដោយស្មោះត្រង់។ ខ្ញុំជឿថានេះគឺជាអារម្មណ៍ដែលមនុស្សគ្រប់រូបតែងតែជួបប្រទះ ប៉ុន្តែវាខុសគ្នាត្រង់ថា ស្ថានភាពនៃការគិតច្រើនដែលទាក់ទងនឹងសម្ពាធទាំងនោះ។ ខ្ញុំពិតជាមានមោនៈភាព ដែលខ្ញុំអាចបង្ហាញពីអារម្មណ៍ដែលខ្ញុំមានតាមរយៈតន្រ្តី។ មូលហេតុដែលខ្ញុំផ្តោតលើទិដ្ឋភាពងងឹតបែបនេះ គឺដោយសារតែមនុស្សភាគច្រើនមានការស្ទាក់ស្ទើរក្នុងការ លើកយករឿងនេះមកនិយាយ។ ខ្ញុំចង់បកស្រាយនិងរៀបរាប់ពីភាពទុក្ខព្រួយដែលមាននៅក្នុងខ្លួនខ្ញុំ និងបង្ហាញវាទៅអ្នកគ្រប់គ្នា។” Kang Daniel

ជាមួយនឹងទំនុកច្រៀងត្រង់កន្លែង “ការភ័យខ្លាចគ្មានទីបញ្ចប់ រាត្រីដ៏អាក្រក់ មិននៅជាមួយខ្ញុំនៅពេលនោះ ប៉ុន្តែពួកគេនៅទីនេះឥឡូវនេះ” និង “អ្នកអាចរត់បាន អ្នកអាចលាក់ខ្លួនបាន ប៉ុន្តែពួកគេតែងតែរកឃើញ រីករាលដាលយឺតៗនៅក្នុងបេះដូងអ្នក ពួកគេរស់នៅក្នុងភាពងងឹត” បទចម្រៀងនេះអាចត្រូវបានយល់យ៉ាងច្បាស់សម្រាប់អ្នកដែលជួបប្រទះបទពិសោធន៍ទាំងនេះ ហើយបានជំនះជាមួយភាពឯកោ និងសេចក្តីបារម្ភក្នុងជីវិតរបស់ពួកគេ ហើយតាមរយៈបទនេះ សង្ឃឹមថាពួកគេនឹងដឹងថាពួកគេមិននៅម្នាក់ឯងទេ។

2. “Borderline” ដោយកញ្ញា Sunmi

កាលពីចុងឆ្នាំមុន Sunmi បានទទួលស្គាល់ថា ៥ ​ឆ្នាំមុន នាងមានវិបត្តិទាក់ទងនៅនឹងជម្ងឺបម្រែបម្រួលបុគ្គលិកលក្ខណៈ ឬស្ថានភាពអារម្មណ៍មិននឹងនរ។  ទោះបីជានាងបានដោះស្រាយបញ្ហានេះក្នុងកម្រិតមួយក៏ដោយ ក៏ភាគច្រើនការធូរស្បើយនេះគឺបានមកពីការលេបថ្នាំដែល ចេញពីវេជ្ជបណ្ឌិតជាក់លាក់។ Borderline Personality Disorder (BDP) គឺជាជម្ងឺបុគ្គលិកលក្ខណៈបង្ហាញពីទំនាក់ទំនងមិនស្ថិតស្ថេរជាមួយអ្នកដទៃ ​និងឆាប់រងប្រតិកម្មអារម្មណ៍ខ្លាំងដែលស្ថានភាពនេះរួមបញ្ចូលគ្នានឹងការបាក់ទឹកចិត្ត និងក្តីបារម្ភឬមានកង្វល់ច្រើន។ ហើយតាមរយៈបទចម្រៀង “Borderline” នេះគឺបានឆ្លុះបញ្ជាំងផ្ទាល់ពីស្ថានភាពរបស់នាងតស៊ូជាមួយនឹងជម្ងឺនេះ។

ទំនុកច្រៀងត្រង់កន្លែងមួយបានលើកឡើងថា “ខ្ញុំមានអារម្មណ៍តក់ស្លុត ភ្នែក ដៃ សក់ហាក់ដូចមិននៅស្ងៀម ហើយពាក្យសម្តីជាច្រើនស្ថិតនៅពាសពេញកន្លែង ដូចមានអារម្មណ៍ថាមានសត្វបក្សីកំពុងរស់នៅក្នុងខួរក្បាលខ្ញុំចឹង”។​ វាបានរៀបរាប់ពីអារម្មណ៍ឈឺចាប់យ៉ាងខ្លាំងរបស់ Sunmi ដែលបានឆ្លងកាត់នឹងជម្ងឺផ្លូវចិត្តនេះ។ អ្នកគាំទ្រដែលធ្លាប់ជួបប្រទះនឹងវិបត្តិនេះដែលបាន និយាយថាវាពិតជាមានអំណាចខ្លាំងគ្របដណ្តប់លើសតិអារម្មណ៍របស់យើង ដូច្នេះហើយពួកគេយល់ពីអារម្មណ៍របស់ Sunmi​ នៅពេលដែលនាងបង្ហាញពីអាការៈរបស់នាងតាមរយៈ បទបង្ហាញនៅប្រទេសកូរ៉េខាងត្បូង។

3. “Holo” ដោយកញ្ញា Lee Hi

ខណៈពេលដែល “Holo” មើលទៅចំណងជើងដូចជាប្លែកសម្រាប់បទចម្រៀងរៀបរាប់អំពី ភាពឯកោពាក្យ “홀로” (“hollo”) បកប្រែថា “ម្នាក់ឯង” ជាភាសាកូរ៉េ។ អារម្មណ៍នៅម្នាក់ឯង និងភាពឯកោគឺជាអារម្មណ៍ដែលមនុស្សស្ទើរតែគ្រប់គ្នាមាននៅចំណុចណាមួយក្នុងជីវិតរបស់ពួកគេ ដែលនេះហើយជាអ្វីដែលអាចទាញ យកចំណាប់អារម្មណ៍អ្នករាល់គ្នាបាន ហើយវាក៏ជាមូលហេតុដែល Lee Hi សរសេរបទចម្រៀងនេះដំបូង។

“អារម្មណ៍ផ្ទាល់ខ្លួនរបស់ខ្ញុំនៅពេលដែលខ្ញុំគិតអំពីបទចម្រៀងនេះគឺវាបានលួងលោមចិត្តរបស់ខ្ញុំ។ នៅពេលខ្ញុំកំពុងច្រៀងវា ខ្ញុំសង្ឃឹមថា វាអាចលួងចិត្តដល់មនុស្សដែលឆ្លងកាត់រឿងជាច្រើន។ ថ្មីៗនេះមានភាពច្របូកច្របល់អ្នកដឹងទេ? ការលួងលោមគឺ មានតាមរយៈការស្តាប់ចម្រៀងនេះ តាមរយៈទំនុកច្រៀង និងអត្ថន័យរបស់វា ដែលនេះហើយគឺជាអ្វីដែលខ្ញុំចង់ចែករំលែកទៅខាងក្រៅ។ ខ្ញុំកំពុងគិតថា ភាពឯកោ គឺមិនមែនតែកើតឡើងនៅពេលអ្នកនៅម្នាក់ឯងនោះទេ គឺវាអាចកើតឡើងនៅពេល ដែលយើងនៅជាមួយអ្នកដទៃផងដែរ។ នៅពេលដែលអ្នកមានអារម្មណ៍ថាឯកោមិនថា អ្នកកំពុងនៅម្នាក់ឯង ឬក៏នៅជាមួយអ្នកដទៃក៏ដោយ អ្នកត្រូវតែព្យាយាមស្រលាញ់ខ្លួនឯង  និងយល់ច្បាស់ពីខ្លួនឯងឲ្យបានច្រើន។” Lee Hi

ខណៈពេលទំនុកច្រៀងនិពន្ធចង់បង្ហាញពីភាពឯកោក៏ដោយ ក៏មានផ្នែកខ្លះដែលបានលើកទឹកចិត្ត​ និងផ្តល់កម្លាំងចិត្តឲ្យស្រលាញ់ និងធ្វើជាខ្លួនឯង។ ទំនុកច្រៀងក្នុងបទ “Holo” លើកឡើងថា “ខ្ញុំពិតជាមានតម្លៃណាស់ ដោយគ្រាន់តែមិនធ្វើអ្វីសោះហើយចាំតែព្រួយបារម្ភ ក្រឡកមើលទៅទុក្ខសោកខាងក្នុងជាមួយនឹងអារម្មណ៍ទទេស្អាត ហើយវាមិនអីទេក្នុងការធ្វើជាខ្លួនឯង”​ Lee Hi ច្រៀងនៅក្នុងបទចម្រៀង “Holo” ដែលបានលើកទឹកចិត្តអ្នកស្តាប់ទាំងទ្បាយដែលធ្លាប់ឈឺចាប់។

4. “Numb” ដោយក្រុម CIX

ខណៈពេលដែលមានចម្រៀងទោលច្រើនជាងអ្នកចម្រៀងជាក្រុម CIX គឺមិនខ្លាចនូវការបង្ហាញពីប្រធានបទប៉ះពាល់ដល់សុខភាពផ្លូវចិត្តដែរ។ អ្វីដែលគួរឲ្យចាប់អារម្មណ៍ជាងនេះទៅទៀតនោះ គឺជាការត្រលប់មកវិញជាលើកដំបូងរបស់ក្រុមនេះបន្ទាប់ពីការសម្តែងលើកដំបូងរបស់ពួកគេជាមួយនឹងបទ “Numb” ។​ តាមរយៈបទនេះដែរគឺបានរៀបរាប់និងបង្ហាញពីជីវិតជាស្សិត ដែលខិតខំប្រឹងប្រែងប្រកួតប្រជែងក្នុងសង្គម ដើម្បីភាពជោគជ័យ ដែលនេះគឺជាសម្ពាធសង្គមមួយកើតឡើងទៅលើយុវជននៅប្រទេសកូរ៉េខាងត្បូង។

“បទនេះបាននិយាយអំពីបញ្ហាផ្សេងៗដែលយុវជនបច្ចុប្បន្នកំពុងជួបប្រទះ។ តាមរយៈបទនេះដែរ គឺចង់ប្រាប់មនុស្សឲ្យមានក្តីសង្ឃឹម និងកុំចុះចាញ់នឹងជីវិត។” Yonghee (CIX)

“ឥឡូវនេះវាជាសង្រ្គាមនៅក្នុងថ្នាក់រៀន វាយតប់ជាមួយមិត្តភក្តិ វាយ! បង្ខំយើងជាមួយ នឹងការអប់រំជាមួយនឹងវិន័យតឹងរុឹង” ពួកគេច្រៀង។ ប៉ុន្តែបទចម្រៀងនេះក៏បានលើកទឹកចិត្តអ្នកស្តាប់កុំឲ្យដាក់គំណាបលើខ្លួនឯងពេក ដូចនឹងអ្វីដែលពួកគេបានលើកឡើងក្នុងបទចម្រៀងថា “បោះជំហានមួយហើយគិតថា វាដូចជាលើកដំបូង បើកភ្នែករបស់អ្នកដូចលើកដំបូង ស្រមៃនូវក្តីសុបិនរបស់អ្នកដូចលើកដំបូង” ។

5. “Wake Me Up” ដោយក្រុម B.A.P

“Wake Me Up” ត្រូវបាននិពន្ធដោយមេក្រុម B.A.P នោះគឺ Yongguk ដែលក្រុមនេះត្រូវបានរំសាយចោល ហើយនេះជាបទចម្រៀងត្រលប់មកវិញរបស់ពួកគេ បន្ទាប់ពីគាត់បានវិលត្រឡប់ពីការសម្រាកផ្ទាល់ខ្លួន ដោយសារតែបញ្ហាជម្ងឺភ័យតក់ស្លុត។ ទំនុកច្រៀងរៀបរាប់យ៉ាងរស់រវើកនូវអារម្មណ៍ដែលជាប់នៅក្នុងចិត្តរបស់ពួកគេ ហើយវីដេអូចម្រៀងបង្ហាញពីមនុស្សដែលតស៊ូជាមួយជំងឺផ្លូវចិត្តផ្សេងៗ។

បទចម្រៀងបង្ហាញពីភាពស្រងូតស្រងាត់ និងអស់សង្ឃឹមដោយមានទំនុកច្រៀងដូចជា “នេះគឺជាផ្លូវរូងក្រោមដីគ្មានទីបញ្ចប់ ក្នុងភាពងងឹតដោយគ្មានពន្លឺ ខ្ញុំត្រូវការស្វែងរកខ្លួនឯង” ប៉ុន្តែអត្ថន័យត្រូវបានបកស្រាយនឹងផ្លាស់ប្តូរទៅជាអ្វីដែលមានសង្ឃឹមជាងមុន “ឥឡូវនេះខ្ញុំកំពុងផ្តល់នូវអ្វីៗដែលខ្ញុំអាចធ្វើបាន ស្វែងរកការពិតដែលលាក់កំបាំង ដាស់ខ្លួនឯងឲ្យភ្ញាក់ឡើង ហើយបើកភ្នែក” ទំនុកច្រៀងនេះ ច្រៀងនៅជិតចុងបញ្ចប់នៃបទចម្រៀងដែលបញ្ជាក់យ៉ាង ច្បាស់ថាមិនថា លំបាកប៉ុណ្ណាទេអ្នកគួរតែមិន​​ត្រូវបោះបង់នោះឡើយ។

6. “Zombie” ដោយក្រុម DAY6

DAY6 ត្រូវបានស្គាល់តាមរយៈការបង្ហាញនូវទំនុកច្រៀងច្បាស់ៗ និងស៊ីជម្រៅទៅនឹងជីវិតដែលកំពុងប្រយុទ្ធនឹងជម្ងឺផ្លូវចិត្តហើយ “Zombie” ក៏មិនខុសគ្នាដែរ។ អារម្មណ៍ហាក់ដូចជាអ្នកកំពុងឆ្លងកាត់សកម្មភាពដូចគ្នាជារៀងរាល់ថ្ងៃ ដោយគ្មានគោលបំណងពិតប្រាកដ គឺជាអារម្មណ៍មួយដែលមនុស្សជាច្រើនបានជួបប្រទះ ហើយនៅតែតស៊ូជាមួយ ជាពិសេសក្នុងកំឡុងពេលជំងឺរាតត្បាតកូវីដ១៩ ហើយក៏វាសាកសមបំផុតសម្រាប់ការចេញបទចម្រៀងក្នុងកំឡុងពេលនេះ។

"ខ្ញុំមានអារម្មណ៍ថា ខ្ញុំបានក្លាយជាខ្មោចឆៅ ដូចមិនមានជីវិតរស់ទេ ប៉ុន្តែខ្ញុំនៅតែដើរ នៅពេលថ្ងៃរះមកដល់ ហើយខ្ញុំនឹងរង់ចាំថាថ្ងៃនេះនឹងកន្លងផុតទៅ ហេតុអ្វី?" គឺជាពាក្យដែលច្រៀងនៅក្នុងបន្ទរនៃបទចម្រៀង ហើយខណៈពេលដែលមិនមានការបញ្ចប់ដោយភាពរីករាយ និងពោរពេញទៅដោយក្តីសង្ឃឹមក៏ដោយ ក៏បទចម្រៀងនៅតែដឹតដាមអារម្មណ៍អ្នកស្តាប់ថា ពួកគេមិនឯកោនោះទេក្នុងការជួបប្រទះអារម្មណ៍ប្រភេទនេះ។

7. “Dear Me” ដោយកញ្ញា Taeyeon

“Dear Me” គឺជាចម្រៀងដែលនិយាយអំពីការស្រលាញ់ខ្លួនឯង និងការផ្តល់សិទិ្ធអំណាចឲ្យ ខ្លួនឯងដែលផ្ទុយពីបទចម្រៀងខ្លះទៀត Taeyeon បានរៀបរាប់ពីការឆ្លងកាត់ស្ថានភាពជីវិតដូចជា រស់នៅក្នុងភាពងងឹតមួយ តែយ៉ាងណាមិញនៅពេលដែលចាកចេញពីភាពងងឹតនោះ នាងគឺកាន់តែរឹងមាំជាងមុន ហើយបន្តដំណើរជីវិតមួយនេះជាមួយនឹងកំលាំងចិត្តរបស់នាងផ្ទាល់។

មកពី “មើលមកខ្ញុំដែលស៊ូទ្រាំនឹងភាពងងឹតដ៏យូរអង្វែង ខ្ញុំមិនលាក់បាំងទៀតទេ ទោះបីពេលយប់មកដល់ម្តងទៀត ខ្ញុំនឹងនៅក្បែរខ្លួនឯង ស្រឡាញ់ខ្លួនឯងជឿជាក់លើខ្លួនឯងដែល ពាក្យទាំងនេះជាពាក្យសម្រាប់ខ្ញុំនិយាយទៅកាន់ខ្លួនឯង។” Taeyeon ហាក់ដូចជាបង្ហាញនូវភាព ជឿជាក់លើខ្លួនឯងនិងកម្លាំងខាងក្នុងរបស់នាងដែលអាចធ្វើឲ្យអ្នកស្តាប់មានអារម្មណ៍ធូរស្បើយបន្ទាប់ពីបានស្តាប់បទនេះហើយ។

8. “Streetlight” ដោយ Changbin ជាមួយ Bang Chan (Stray Kids)

“ Streetlight” គឺជាបទចម្រៀងដែលនិពន្ធដោយសមាជិកក្រុម Stray Kids ឈ្មោះ Changbin និង Bang Chan ដែលចែករំលែករឿងរ៉ាវរបស់មនុស្សម្នាក់ដែលកំពុងជួបប្រទះការឈឺចាប់ខាងអារម្មណ៍ ប៉ុន្តែលាក់ស្នាមញញឹមហើយធ្វើពុតជាមិនអី ដែលធ្វើការប្រៀបធៀបមនុស្សម្នាក់ទៅនឹងពន្លឺភ្លើងស្តុបបន្លឺតាមផ្លូវ។

“ពេលដែលអ្នកជួបនឹងបញ្ហាហើយទៅពិគ្រោះឬសុំយោបល់ពីនរណាម្នាក់ហើយ ទោះបីបុគ្គលនោះមិនអាចដោះស្រាយអ្វីគ្រប់យ៉ាងសម្រាប់អ្នកក៏ដោយ អ្នកគ្រាន់តែសម្រាក ហើយគិតអ្វីៗវិជ្ជមាន នោះអារម្មណ៍របស់អ្នកនឹងមានភាពធូរស្រាលច្រើន។ និយាយឲ្យត្រង់ទៅ នៅពេលដែលខ្ញុំសរសេរចម្រៀងនេះ គឺជាពេលមួយដែលខ្ញុំពិបាកចិត្តបំផុត ហើយមិនអាចប្រាប់អ្នកណាបាន ប៉ុន្តែខ្ញុំអាចបង្ហាញអារម្មណ៍ទាំងនោះតាមរយៈទំនុកច្រៀងនេះ ហើយខ្ញុំគិតថា ខ្ញុំបានចែករំលែកអារម្មណ៍មួយនេះទៅនរណាម្នាក់ ដែលវាធ្វើឲ្យខ្ញុំបានធូរស្បើយច្រើន។” Changbin

“បន្ទាប់ពីថ្ងៃឯកោបានកន្លងផុតទៅ ខ្ញុំគឺកំពុងឈរនៅលើអាកាស ហើយនៅពាក់កណ្ដាលយប់ដ៏ឯកោ ខ្ញុំនឹងញញឹម” គឺជាវិធីដែលគាត់ប្រៀបធៀបមនុស្សដែលលាក់បាំងអារម្មណ៍ តែគាត់នៅតែញញឹមដូចជាគ្មានរឿងអ្វីកើតឡើងសោះ។

9. “Mist” ដោយក្រុម ATEEZ

ATEEZ គឺជាក្រុមមួយផ្សេងទៀតដែលត្រូវបានគេស្គាល់ថា មិនរារែកពីការលើកឡើងពីសារៈសំខាន់នៃការថែរក្សាសុខភាពផ្លូវចិត្តរបស់មនុស្សម្នាក់ដោយបទ “Mist” ដើរតួជាចំរៀង ពន្យល់ពីអារម្មណ៍ឈឺចាប់របស់មនុស្សម្នាក់ឆ្លងកាត់ នៅពេលដែលគាត់មានអារម្មណ៍ភ័យខ្លាច ហើយគិតថា តើការជ្រើសរើសផ្លូវមួយនេះត្រឹមត្រូវដែរឬអត់សម្រាប់ជីវិតរបស់គាត់។

ជាសមាជិកក្រុម B-sides, “Mist” មិនសូវផ្តោតសំខាន់ទៅលើអ្នកចម្រៀងនោះទេ ប៉ុន្តែសារសំលេងរៀបរាប់តាមរយៈទំនុកច្រៀងរបស់ពួកគេគឺវាជាអ្វីដែលអ្នកទាំងអស់គ្នាគួរតែលឺ។ “ប្រសិនបើ ប្រសិនបើ ប្រសិនបើវាមានជម្រើសផ្សេង” ពួកគេច្រៀង! ដោយបញ្ជាក់ ពីការសង្ស័យថា ការព្រួយបារម្ភរបស់ពួកគេនឹងមិនកើតមានទេ ប្រសិនបើពួកគេបានជ្រើសរើស ផ្លូវផ្សេងទៀត “ដូច្នេះសូមប្រាប់ខ្ញុំថាមិនអីទេ កុំបារម្ភអី” ហើយទោះយ៉ាងណាការចុះអ័ព្ទនឹង រលាយបាត់ទៅ នៅពេលដែលព្រះអាទិត្យរះនៅថ្ងៃបន្ទាប់។

10. “The Last” ដោយ Agust D

នៅចុងបញ្ចប់នៅលើតារាងបទចម្រៀងដែលរៀបរាប់អំពីបញ្ហាជម្ងឺផ្លូវចិត្តគឺ មិនអាចខ្វះបាននោះទេនូវស្នាដៃបទចម្រៀងរបស់ August D, “The last”។ Agust D ឬ Suga ដូចដែលគាត់ត្រូវបានគេស្គាល់ជាសមាជិកនៅក្នុងក្រុម BTS បានរៀបរាប់ដោយស្មោះត្រង់អំពីការតស៊ូប្រឆាំង នឹងជម្ងឺធ្លាក់ទឹកចិត្ត ហើយគាត់បានប្រាប់ថា​ គាត់ធ្លាប់ព្យាយាមធ្វើអត្តឃាតខ្លួនឯងទៀតផង។ បទចំរៀង “The last” គឺបង្ហាញពីបទពិសោធន៍ផ្ទាល់ខ្លួនរបស់គាត់ ដែលខំរស់នៅជាមួយនូវ ភាពអស់សង្ឃឹម អស់ទំនុកចិត្ត និងស្អប់ខ្លួនឯង។

តាមរយៈបទចម្រៀងទាំងមូល គឺវាមិនអាចទៅរួចទេដែលយើងអាចសង្ខេបឲ្យបានខ្លី បង្ហាញតែពីរបីជួរអត្ថបទ ដូចនេះហើយប្រសិនបើអ្នកមិនធ្លាប់ស្តាប់បទនេះ ឬយ៉ាងហោចណាស់បានអានទំនុកច្រៀងរបស់វា អ្នកច្បាស់ជាមិនចំណាយពេលអត់ប្រយោជន៍នោះទេ ដើម្បីទទួលបានសារពីបទចម្រៀងនេះ។

អត្ថបទដកស្រង់ពី Koreaboo

បកប្រែ និងកែសម្រួលដោយ កញ្ញា សូផាត