សេវាកម្មរថយន្តសង្គ្រោះបន្ទាន់ Magen David Adom របស់អ៊ីស្រាអែល បាននិយាយថា យ៉ាងហោចណាស់ស្ត្រីម្នាក់បានស្លាប់ និងប្រាំបីនាក់ផ្សេងទៀតបានរងរបួសនៅក្នុងការវាយប្រហារដោយការបាញ់ប្រហារមួយក្នុងអំឡុងពេលធ្វើដំណើរនៅតាមផ្លូវច្រកចូលទីក្រុងហ្សេរុយសាឡឹមកាលពីថ្ងៃព្រហស្បតិ៍។
-
ការវាយប្រហារភេរវកម្មនៅច្រកចូលទីក្រុង Jerusalem
យោងតាមសារព័ត៌មាន Reuters ចុះផ្សាយថ្ងៃទី៣០ ខែវិច្ឆិកាបានអោយដឹងថា សេវាកម្មរថយន្តសង្គ្រោះបន្ទាន់ Magen David Adom របស់អ៊ីស្រាអែល បាននិយាយថា យ៉ាងហោចណាស់ស្ត្រីម្នាក់បានស្លាប់ និងប្រាំបីនាក់ផ្សេងទៀតបានរងរបួសនៅក្នុងការវាយប្រហារដោយការបាញ់ប្រហារមួយក្នុងអំឡុងពេលធ្វើដំណើរនៅតាមផ្លូវច្រកចូលទីក្រុងហ្សេរុយសាឡឹមកាលពីថ្ងៃព្រហស្បតិ៍។
ប៉ូលិសអ៊ីស្រាអែលបាននិយាយថា"ភេរវករពីរនាក់ដែលស្ថិតនៅកន្លែងកើតហេតុគឺនៅក្នុងរថយន្តប្រដាប់ដោយអាវុធ និងបានបាញ់ទៅលើជនស៊ីវិលនៅចំណតឡានក្រុង បន្ទាប់មកពួកគេក៏ត្រូវបានកំចាត់ដោយកងកម្លាំងសន្តិសុខ និងជនស៊ីវិលម្នាក់ដែលស្ថិតនៅក្បែរនោះ"។
រថយន្តសង្គ្រោះបន្ទាន់ និងប៉ូលិសមួយចំនួនធំបានប្រមូលផ្តុំគ្នានៅកន្លែងកើតហេតុដើម្បីស្វែងរកអោយប្រាកដថាមិនមានអ្នកវាយប្រហារផ្សេងទៀតនៅក្នុងទីតាំងនេះទេ។
ឯកអគ្គរដ្ឋទូតអាមេរិកប្រចាំប្រទេសអ៊ីស្រាអែល បានថ្កោលទោសការបាញ់ប្រហារនេះ។
-
HENRY KISSINGER មន្ត្រីទូតអាមេរិកទទួលខុសត្រូវចំពោះការស្លាប់ជីវិតជាច្រើនទទួលមរណភាព
យោងតាមសារព័ត៌មាន The Intercept ចុះផ្សាយថ្ងៃទី២៩ ខែវិច្ឆិកាបានអោយដឹងថា លោក HENRY KISSINGER ទីប្រឹក្សាសន្តិសុខជាតិ និងជារដ្ឋលេខាធិការក្រោមប្រធានាធិបតីពីររូប និងជាអ្នកចូលរួមបង្កើតគោលនយោបាយការបរទេសរបស់សហរដ្ឋអាមេរិក បានទទួលមរណភាពកាលពីថ្ងៃទី២៩ ខែវិច្ឆិកា នៅគេហដ្ឋានរបស់លោកក្នុងរដ្ឋ Connecticut។ លោកមានអាយុ 100 ឆ្នាំ។
លោក Kissinger បានជួយអូសបន្លាយសង្រ្គាមវៀតណាម និងពង្រីកជម្លោះនោះដែលបានធ្វើអោយសម្លាប់ប្រជាជនកម្ពុជាជាច្រើននាក់ បង្កើតនូវអំពើប្រល័យពូជសាសន៍នៅប្រទេសកម្ពុជា ប្រទេសទីម័រខាងកើត និងប្រទេសបង់ក្លាដែសផងដែរ។ ហើយក៏បានបង្កើនល្បឿននៃសង្គ្រាមស៊ីវិលនៅអាហ្វ្រិកខាងត្បូង; និងគាំទ្រការធ្វើរដ្ឋប្រហារ និងក្រុមសម្លាប់នៅទូទាំងអាមេរិកឡាទីនផងដែរ។ លោកបានប្រលាក់នូវឈាមរបស់មនុស្សយ៉ាងហោចណាស់ 3 លាននាក់នៅលើដៃរបស់លោក នេះបើយោងតាមជីវប្រវត្តិសរសេរឡើងដោយលោក Greg Grandin ។
-
ពូទីនថាការបង្កើតគ្រួសារធំគួរតែក្លាយជាប្រពៃណី
យោងតាមសារព័ត៌មាន The Press United ចុះផ្សាយថ្ងៃទី២៩ ខែវិច្ឆិកាបានអោយដឹងថា ប្រធានាធិបតីរុស្ស៊ីបាននិយាយថា តម្លៃប្រពៃណីនឹងធានាបានអនាគតរបស់ប្រទេសសម្រាប់មនុស្សជំនាន់ក្រោយៗទៀត។
លោកប្រធានាធិបតីវ្ល៉ាឌីមៀ ពូទីន បាននិយាយកាលពីថ្ងៃអង្គារថា គ្រួសារដែលមានកូនច្រើនគួរតែក្លាយជានិន្នាការមួយសម្រាប់នៅក្នុងប្រទេសរុស្ស៊ីសម័យទំនើប ដោយទទូចថាការសម្រេចបាននូវគោលដៅនេះគួរតែក្លាយជាចំនុចអាទិភាពបំផុតរបស់រដ្ឋាភិបាល។
ថ្លែងនៅឯក្រុមប្រឹក្សាប្រជាជនរុស្ស៊ីពិភពលោក ដែលជាវេទិការៀបចំឡើងក្រោមការឧបត្ថម្ភរបស់វិហារគ្រិស្តអូស្សូដក់រុស្ស៊ី ដើម្បីពិភាក្សាអំពីអនាគតរបស់ប្រទេសនេះ លោកពូទីនបានសង្កត់ធ្ងន់ជាពិសេសលើសារៈសំខាន់នៃតម្លៃគ្រួសារ។
លោកបានមានប្រសាសន៍ថា៖«គ្រួសារធំត្រូវតែក្លាយជាបទដ្ឋាន ជាផ្លូវនៃជីវិតសម្រាប់ប្រជាជនរុស្ស៊ីទាំងអស់»ដោយពណ៌នាថាគ្រួសារមិនត្រឹមតែជាសសរស្តម្ភដែលរដ្ឋនិងសង្គមត្រូវការនោះទេ ប៉ុន្តែក៏ជា«ប្រភពនៃសីលធម៌»ផងដែរ។
