ក្រុមអ្នកជំនាញការអាដហុក នៃគណៈកម្មាធិការសម្របសម្រួលអន្តរជាតិសម្រាប់ការអភិរក្ស និងការលើកតម្លៃរមណីយដ្ឋានប្រាសាទព្រះវិហារ ហៅកាត់ថា អាយស៊ីស៊ី-ព្រះវិហារ (ICC-Preah Vihear) កាលពីថ្ងៃអាទិត្យ ទី២០ ខែមីនា ឆ្នាំ២០២២ ម្សិលមិញ បានចុះត្រួតពិនិត្យការងារអភិរក្សក្នុងរមណីយដ្ឋានប្រាសាទកោះកេរ។
ការចុះត្រួតពិនិត្យនេះ មានការចូលរួមពីអ្នកជំនាញការអាដហុក ថ្នាក់ដឹកនាំ និងមន្រ្តីអាជ្ញាធរជាតិព្រះវិហារផងដែរ នេះបើតាមការបញ្ជាក់ពីមន្រ្តីអាជ្ញាធរជាតិព្រះវិហារ។
គម្រោងអភិរក្សនោះរួមមាន ការអភិរក្ស និងការប្រមូលបំណែករូបបដិមានៅរាយប៉ាយខាងមុខតួប៉មប្រាសាទចិន ការធ្វើកំណាយស្រាវជ្រាវស្វែងរកបំណែកបដិមា និងការងារអភិរក្សទល់ទ្ររចនាសម្ព័ន្ធប្រាសាទក្រចាប់ ការធ្វើកំណាយ និងទល់ទ្រប្រាសាទដងទង់ ការអភិរក្ស និងទល់ទ្រប្រាសាទតាម៉ែន ការអភិរក្សជួសជុលបដិមាព្រះឥសូររាំនៅក្នុងប្រាសាទក្រហម និងសិក្សាពីទីតាំងតម្កល់ ការធ្វើកំណាយស្រាវជ្រាវនៅប្រាសាទថ្មបាយក្រៀម ការកំណាយជួសជុល និងចងក្រងឯកសារនៅស្ពានហាលខាងកើតប្រាសាទរួម ស្ថានីយបន្សុទ្ធទឹកស្អាតសម្រាប់ផ្គត់ផ្គង់ក្នុងសហគមន៍កោះកេរ និងគម្រោងសាងសង់ចំណតរថយន្តថ្មីនៅក្បែរច្រកចូលប្រាសាទធំ។
សូមបញ្ជាក់ថា ប្រាសាទកោះកេរមានទីតាំងស្ថិតនៅក្នុងភូមិស្រយ៉ង់ជើង ឃុំស្រយ៉ង់ ស្រុកគូលេន ខេត្តព្រះវិហារ មានចម្ងាយប្រមាណ៤៩ គីឡូម៉ែត្រ ពីទីរួមខេត្តព្រះវិហារ។ កាលពីឆ្នាំ២០១៨ កម្ពុជាបានចុះសិក្សាស្រាវជ្រាវនៅតំបន់ប្រាសាទកោះកេរ ខេត្តព្រះវិហារ និងប្រាសាទបន្ទាយឆ្មារ ខេត្តបន្ទាយមានជ័យ ដើម្បីស្នើដាក់ប្រាសាទខ្មែរទាំងពីរនេះទៅក្នុងបញ្ជីសម្បត្តិបេតិកភណ្ឌពិភពលោក បន្ទាប់ពីប្រាសាទអង្គរវត្ត បានចុះបញ្ជីជាសម្បត្តិបេតិកភណ្ឌពិភពលោកនៅឆ្នាំ១៩៩២ ប្រាសាទព្រះវិហារនៅឆ្នាំ២០០៨ និងតំបន់ប្រាសាទសំបូរព្រៃគុកនៅឆ្នាំ២០១៧។
អគ្គនាយកអាជ្ញាធរព្រះវិហារ លោក គង់ ពុទ្ធិការ ធ្លាប់បានថ្លែងថា តាមការវាយតម្លៃរបស់អ្នកជំនាញការអន្តរជាតិមើលឃើញថា កម្ពុជាមានសង្ឃឹមថា ប្រាសាទកោះកេរ នឹងអាចដាក់បញ្ចូលប្រាសាទកោះកេរជាសម្បត្តិបេតិកភណ្ឌពិភពលោក ដោយសារការស្នើសុំមានលក្ខណៈសម្បត្តិគ្រប់គ្រាន់ ទាំងលក្ខណៈលេចធ្លោររបស់ប្រាសាទជាសាកល ទាំងការការពាររមណីដ្ឋាន ចំណែកឯកសារស្នើសុំក៏រៀបចំបានត្រឹមត្រូវ។ លោកថា បច្ចុប្បន្នកម្ពុជាគ្រាន់តែរង់ចាំគណៈកម្មាធិការបេតិកភណ្ឌពិភពលោកពិនិត្យ និងទាក់ទងមកខាងកម្ពុជាវិញ ប្រសិនឯកសារនៅខ្វះខាត ឬមានចម្ងល់អ្វីបន្ថែម។
លោក គង់ ពុទ្ធិការ មានសង្ឃឹមថា ប្រសិនបើវិបត្តិកូវីដ-១៩ បានធូរស្រាលឡើងវិញ នោះអ្វីៗនឹងអនុវត្តតាមកម្មវិធីគ្រោងទុក៕ (មានជ័យ)
