យោងតាមសារព័ត៌មាន CNN អ៊ុយក្រែនបានអះអាងថា ខ្លួនបានសម្លាប់លោក Adm Viktor Sokolov មេបញ្ជាការកងនាវាចរសមុទ្រខ្មៅរបស់រុស្ស៊ី រួមជាមួយនឹងមន្ត្រីចំនួន33 នាក់ផ្សេងទៀត នៅក្នុងការវាយប្រហារដ៏ខ្លាំងក្លាបំផុតមួយរបស់ទីក្រុង Kyiv នៅលើឧបទ្វីបគ្រីមៀ។

1. កញ្ឆាត្រូវបានប្រើប្រាស់សំរាប់ព្យាបាលអតីតយុទ្ធជន

យោងតាមសារព័ត៌មាន CNN ចុះផ្សាយថ្ងៃទី២៧ ខែកញ្ញាបានអោយដឹងថា នៅក្នុងផ្ទះល្វែងតូចមួយ​​​នៃទីក្រុងគៀវ ទាហានដែលចប់ភារកិច្ចបានជួបជុំគ្នាជក់កញ្ឆា ដើម្បីបំភ្លេចរឿងរ៉ាវដែលពួកគេបានឃើញ។

ពួកគេ​មិន​ចង់​អោយមាននរណាស្វែងរកពួកគេឃើញនោះទេ។ មិនថាឡើយនៅទីនេះ ដែលនៅ​ឆ្ងាយ​ពី​ទីតាំងជួរ​មុខ​ក៏​ដោយ កញ្ឆាគឺជារបស់ត្រូវរឹតត្បិតនៅក្នុងយោធា។

ទាហានម្នាក់ក្នុងចំណោមទាហានទាំងនោះកំពុងតែត្រូវបានព្យាបាលនូវជំងឺស្ត្រេសក្រោយការប៉ះទង្គិចផ្លូវចិត្តរបស់លោកដែលហៅថា (PTSD)។

លោកបាននិយាយថា "សម្រាប់ខ្ញុំ កញ្ឆាពិតជាជួយបានច្រើន" ។ "បើគ្មានវាទេ ខ្ញុំមិនអាចគេងលក់ទេ។ វាជួយខ្ញុំអោយអាចសម្រាក។ អ្នកគ្រប់គ្នាគួរតែអាចប្រើប្រាស់វាបាន"។

កាលពីឆ្នាំមុនក្រសួងសុខាភិបាលបានប៉ាន់ប្រមាណថា 57% នៃប្រជាជនអ៊ុយក្រែនមានហានិភ័យក្នុងការវិវត្តទៅជាជំងឺស្ត្រេសក្រោយការប៉ះទង្គិចផ្លូវចិត្ត PTSD ។

ប៉ុន្តែកញ្ឆាដែលអាចប្រើប្រាស់បានដោយទូលំទូលាយនៅតាមផ្លូវ និងត្រូវបានកាត់ទោសដោយបន្តិចបន្តួចប៉ុណ្ណោះសម្រាប់ការប្រើប្រាស់ផ្ទាល់ខ្លួន នៅតែមិនអាចធ្វើឡើងសម្រាប់ការស្រាវជ្រាវផ្នែកវេជ្ជសាស្រ្ត ទោះបីជាមានភស្តុតាងថាវាពិតជាអាចជួយបានក៏ដោយ។

2. អ៊ុយក្រែន​អះអាង​ថា​បាន​សម្លាប់​មេបញ្ជាការ​កង​នាវា​សមុទ្រ​ខ្មៅ​របស់​រុស្ស៊ី

យោងតាមសារព័ត៌មាន The Guardian ចុះផ្សាយថ្ងៃទី២៥ ខែកញ្ញាបានអោយដឹងថា អ៊ុយក្រែនបានអះអាងថា ខ្លួនបានសម្លាប់លោក Adm Viktor Sokolov មេបញ្ជាការកងនាវាចរសមុទ្រខ្មៅរបស់រុស្ស៊ី រួមជាមួយនឹងមន្ត្រីចំនួន33 នាក់ផ្សេងទៀត នៅក្នុងការវាយប្រហារដ៏ខ្លាំងក្លាបំផុតមួយរបស់ទីក្រុង Kyiv នៅលើឧបទ្វីបគ្រីមៀ។

យោធាអ៊ុយក្រែនបាននិយាយថា ការវាយប្រហារកាលពីថ្ងៃសុក្រលើទីស្នាក់ការកណ្តាលនៃកងនាវាសមុទ្រខ្មៅរបស់រុស្ស៊ីនៅក្នុងទីក្រុង Sevastopol គឺកើតឡើងនៅចំពេលតំណាលគ្នាជាមួយនឹងកិច្ចប្រជុំរបស់មន្ត្រីកងទ័ពជើងទឹក។

កងកម្លាំងពិសេសបាននិយាយនៅលើកម្មវិធីផ្ញើសារ Telegram ថា“បន្ទាប់ពីការវាយប្រហារលើទីស្នាក់ការកណ្តាលនៃកងនាវាសមុទ្រខ្មៅរុស្ស៊ី មន្ត្រី34នាក់បានស្លាប់ រួមទាំងមេបញ្ជាការកងនាវាចរសមុទ្រខ្មៅរបស់រុស្ស៊ីផងដែរ។ អ្នកនៅទីនោះ ១០៥ នាក់ផ្សេងទៀតក៏បានរងរបួសផងដែរ។”

ក្រសួង​ការពារជាតិ​រុស្ស៊ី​មិន​ទាន់​ធ្វើ​អត្ថាធិប្បាយ​ជុំវិញ​ការ​អះអាង​របស់​អ៊ុយក្រែននេះ​នៅ​ឡើយ​ទេ។ ទីក្រុងមូស្គូ​ធ្លាប់​បាន​បញ្ជាក់​ពី​ការ​វាយ​ប្រហារ​របស់​អ៊ុយក្រែន ប៉ុន្តែ​បាន​និយាយ​ថា​មានត្រឹមតែទាហាន​ម្នាក់​បាន​បាត់​ខ្លួនប៉ុណ្ណោះ​ជា​លទ្ធផល​នៃ​ការ​វាយ​ប្រហារនេះ។

3. Hunter Biden ទទួលបានប្រាក់ $250,000 ពីទីក្រុងប៉េកាំង

យោងតាមសារព័ត៌មាន CNN ចុះផ្សាយថ្ងៃទី២៦ ខែកញ្ញាបានអោយដឹងថា គណៈកម្មាធិការត្រួតពិនិត្យសភាដែលដឹកនាំដោយគណបក្សសាធារណរដ្ឋបានកោះហៅធនាគារមួយសំរាប់កំណត់ត្រារបស់លោក Hunter Biden និងទទួលបានការផ្ទេរប្រាក់ពីរខ្សែពីជនជាតិចិនទៅកាន់លោក Hunter Biden ក្នុងឆ្នាំ 2019 ដែលបានចុះបញ្ជីផ្ទះរបស់លោកប្រធានាធិបតី Joe Biden នៅ Wilmington រដ្ឋ Delaware ជាអាសយដ្ឋានរបស់អ្នកទទួល។ ដោយខ្សែទី១មានទឹកប្រាក់ចំនួន $10,000 និងខ្សែទី២មានទឹកប្រាក់ចំនួន $250,000។

ប្រភពមួយបានប្រាប់ CNN ថាដីកាដែលត្រូវបានចេញស្ងាត់ៗកាលពីថ្ងៃចន្ទ គឺជាលើកដំបូងហើយដែលគណៈកម្មាធិការបានចេញដីកាទៅកាន់ធនាគារមួយសម្រាប់កំណត់ត្រារបស់លោក Hunter Biden ជាពិសេស។

ប្រធានផ្នែកត្រួតពិនិត្យសភាលោក James Comer បាននិយាយបន្ទាប់ពីការប្រកាសថា ដីកាកោះហៅនេះគឺមាន"ភាពជាក់លាក់ណាស់" ហើយថាការផ្ទេរប្រាក់ទាំងពីរខ្សែនេះគឺជាឧទាហរណ៍ដំបូងដែលក្រុមប្រឹក្សាបានរកឃើញថាលោក Hunter Biden បានទទួលប្រាក់ដោយផ្ទាល់ និងមិនមែនតាមរយៈក្រុមហ៊ុនអកម្មដែលយកមកបាំងមុខទេ។