Hugh Jackman មានអាយុត្រឹមតែ 8 ឆ្នាំប៉ុណ្ណោះ នៅពេលដែលម្តាយរបស់គាត់បានចាកចេញពីគ្រួសារ។ ថ្ងៃមួយ ពេលគាត់ត្រឡប់មកពីរៀនវិញ ម្តាយរបស់គាត់ក៏ទៅបាត់ទៅហើយ ដូច្នេះឪពុករបស់គាត់ត្រូវមើលថែកូនៗតែម្នាក់ឯង។ វាជាបទពិសោធន៍ដ៏ឈឺចាប់បំផុតមួយ ដែលបានលងបន្លាចគាត់អស់រយៈពេលជាច្រើនឆ្នាំ។ គាត់តែងតែរង់ចាំនាងត្រលប់មកផ្ទះវិញជាយូរណាស់មកហើយ ហើយជាច្រើនឆ្នាំបានកន្លងផុតទៅ, វាបានធ្វើឲ្យបេះដូងរបស់គាត់ពោរពេញទៅដោយកំហឹងយ៉ាងខ្លាំង។ គាត់ថែមទាំងធ្លាប់បោកក្បាលរបស់គាត់នឹងទូរសៀវភៅដែករបស់គាត់នៅឯសាលារៀនទៀតផង។ គាត់ក៏ធំឡើងទៅជាក្មេងដែលមានការភ័យខ្លាចខ្លាំង, គាត់ខ្លាចទីងងឹត, គាត់ខ្លាចទីខ្ពស់, ហើយវាធ្វើឱ្យគាត់មានអារម្មណ៍ថាខ្លួនគាត់គ្មានអ្វីដែលអស្ចារ្យទាល់តែសោះ ហើយវាបណ្តាលឲ្យបេះដូងរបស់គាត់មានកំហឹងកាន់តែខ្លាំង។ គាត់ស្អប់អារម្មណ៍នោះណាស់ ដូច្នេះមធ្យោបាយមួយដើម្បីបញ្ចេញកំហឹងរបស់គាត់, គាត់បានងាកមកលេងកីឡាបាល់ឱប។ មួយវិញទៀត, ផ្លូវទៅកាន់ភាពជោគជ័យរបស់គាត់មិនលឿន និងងាយស្រួលនោះទេ។
គាត់ត្រូវធ្វើការងារគ្រប់ប្រភេទមុននឹងក្លាយជាតារាសម្ដែង។ ការងារមួយក្នុងចំណោមការងារទាំងនោះគឺការផ្តល់ខិត្តប័ណ្ណ និងប័ណ្ណផ្សព្វផ្សាយ។ ហើយកាលនៅរៀនវិទ្យាល័យ គាត់បានធ្វើការនៅហាង 7-Eleven ក្បែរនោះ។ បន្ទាប់ពីគាត់បានបញ្ចប់ការសិក្សានៅវិទ្យាល័យ គាត់បានព្យួរឈ្មោះមួយឆ្នាំ ហើយបានធ្វើការនៅប្រទេសអង់គ្លេសជាគ្រូបង្រៀនផ្នែកអប់រំកាយ។ មុននឹងក្លាយជាតារាល្បី លោក Hugh Jackman ក៏ធ្លាប់ធ្វើជាអ្នកបម្រើការនៅស្ថានីយប្រេង និងជាធ្វើតួត្លុកផងដែរ។ ក្នុងនាមជា Coco តួត្លុក គាត់នឹងសម្តែងនៅឯពិធីជប់លៀងកុមារក្នុងតម្លៃ 50 ដុល្លារ។ ដូច្នេះ គាត់ចាប់ផ្តើមដំបូងក្នុងនាមជាអ្នកសម្តែងជាតួត្លុក។ នៅមហាវិទ្យាល័យ គាត់ចាប់ផ្តើមក្លាយជាអ្នកសារព័ត៌មាន ប៉ុន្តែនៅឆ្នាំទី ៤ គាត់ក៏សម្រេចចិត្តចូលរៀនថ្នាក់ល្ខោន ហើយគាត់ក៏បានស្រលាញ់ការសំដែង។ ដូច្នេះហើយ បន្ទាប់ពីបញ្ចប់ការសិក្សា គាត់បានចុះឈ្មោះចូលរៀនពេញម៉ោងក្នុងសាលាល្ខោន ហើយការសម្រេចចិត្តនោះ ថ្ងៃនេះបានធ្វើឱ្យគាត់ក្លាយជាតារាសម្តែងដ៏មានប្រជាប្រិយភាពបំផុតម្នាក់នៅក្នុងហូលីវូដ។
តួអង្គដែលបានផ្លាស់ប្តូរអាជីពទាំងមូលរបស់គាត់ និងធ្វើឱ្យគាត់ល្បីល្បាញទូទាំងពិភពលោកគឺការដើរតួជា Superhero Wolverine ឬមនុស្សចចក នៅក្នុងស៊េរីខ្សែភាពយន្ត X-Men ហើយគាត់អាចដើរតួអង្គនេះបានយ៉ាងល្អឥតខ្ចោះ ដោយគាត់បានប្រើតួអង្គនេះដើម្បីបញ្ចេញកំហឹងតាំងពីក្មេងរបស់គាត់។ ប៉ុន្តែសូម្បីតែបន្ទាប់ពីទទួលបានភាពជោគជ័យក៏ដោយ ក៏គាត់មានអារម្មណ៍ថា នៅក្នុងជីវិតរបស់គាត់ដូចនៅខ្វះអ្វីម្យ៉ាង។ គាត់ និងប្រពន្ធរបស់គាត់ចង់មានកូនខ្លាំងណាស់ ប៉ុន្តែក្រោយពីការរលូតកូនប៉ុន្មានដងមក ប្ដីប្រពន្ធមួយគូរនេះមានអារម្មណ៍ខកចិត្តជាខ្លាំង ប៉ុន្តែក្រោយយកពួកគេបានសុំកូនចិញ្ចឹមពីរនាក់។ ទីបំផុត អ្វីគ្រប់យ៉ាងបានសុខសាន្តសម្រាប់គាត់។ ការក្លាយជាឪពុកម្ដាយបានធ្វើឱ្យគាត់បើកចិត្ត និងរកវិធីអភ័យទោសដល់ម្ដាយរបស់គាត់។ គាត់បានដឹងថា ម្តាយរបស់គាត់មានជំងឺធ្លាក់ទឹកចិត្តក្រោយឆ្លងទន្លេយ៉ាងធ្ងន់ធ្ងរ ដែលដើរតួយ៉ាងសំខាន់ក្នុងជីវិតរបស់គាត់ ដូច្នេះសព្វថ្ងៃនេះពួកគាត់ក៏មានទំនាក់ទំនងល្អនឹងគ្នាឡើងវិញ ហើយទីបំផុត Hugh Jackman អាចបំបាត់កំហឹងរបស់គាត់ដែលបានបំពុលជីវិតរបស់គាត់អស់រយៈពេលជាច្រើនឆ្នាំ។ គាត់បានរកឃើញសន្តិភាព គាត់ប្រើការធ្វើសមាធិជាទម្លាប់ប្រចាំថ្ងៃដើម្បីបង្រៀនចិត្តគំនិតរបស់គាត់។
“ឥឡូវនេះខ្ញុំធ្វើសមាធិពីរដងក្នុងមួយថ្ងៃរយៈពេលកន្លះម៉ោង។ នៅក្នុងការធ្វើសមាធិ ខ្ញុំអាចបោះបង់អ្វីៗទាំងអស់។ ខ្ញុំមិនមែនជា Hugh Jackman ខ្ញុំមិនមែនជាឪពុក ខ្ញុំមិនមែនជាប្តី, ខ្ញុំគ្រាន់តែចូលទៅក្នុងពិភពមួយដ៏មានឥទ្ធិពល ដែលបានបង្កើតអ្វីៗគ្រប់យ៉ាង។”ដូច្នេះហើយ ក្មេងៗដែលធ្លាប់ភ័យខ្លាចស្ទើរតែគ្រប់បែបយ៉ាង សព្វថ្ងៃនេះ បានក្លាយជាបុរសដែលប្រឈមមុខនឹងការភ័យខ្លាចទាំងអស់ មិនថាវាគួរឱ្យខ្លាច ឬអាក្រក់យ៉ាងណានោះទេ។ គាត់មិនអនុញ្ញាតឱ្យការភ័យខ្លាចរារាំងគាត់បានទៀតទេ។“ខ្ញុំតែងតែមានអារម្មណ៍ថា ប្រសិនបើអ្នកត្រលប់ទៅរកភាពភ័យខ្លាច នោះខ្មោចនៃការភ័យខ្លាចមិនបាត់ទៅណាឡើយ។ វាធ្វើឱ្យមនុស្សចុះខ្សោយ។ ដូច្នេះ ខ្ញុំតែងតែនិយាយថា ខ្ញុំអាចធ្វើបាន ចំពោះរឿងដែលខ្ញុំខ្លាច។ ខ្ញុំមិនខ្លាចក្នុងការបោកប្រាស់ខ្លួនឯងនោះទេ។ នៅក្នុងជីវិត អ្នកនឹងមិនស្តាយក្រោយចំពោះអ្វីដែលអ្នកធ្វើនោះទេ តែអ្នកនឹងស្ដាយក្រោយចំពោះអ្វីដែលអ្នកមិនបានធ្វើ»។
