កាលពីថ្ងៃទី២៧ ខែមីនាកន្លងទៅនេះ ផលិតកម្មបារមីបានចេញផ្សាយព័ត៌មានផ្លូវការមួយអំពីដំណឹងនៃការប្រគំតន្រ្តីសំរាប់ឳកាសពិធីបុណ្យចូលឆ្នាំខ្មែរប្រពៃណីជាតិខាងមុខនេះហៅថា Hanuman Khmer New Year 2023 នៅឯខេត្តសៀមរាប។ ផលិតកម្មបារមី រួមទាំងសិល្បករកិត្តិយសនៃផលិតកម្មជាច្រើនរូបដូចជាលោកវណ្ណដា លោកវណ្ណថាន ក្រុម Polarix ក្រុម La Cima Cartel កញ្ញាSophia Kao កញ្ញា Sou Siryka លោក GV Lux និងសិល្បករឯករាជ្យ ព្រម Dj ល្បីៗឯទៀតដូចជាលោក Heng កញ្ញា Mina អ្នកនាងខាត់សុឃីម DJ Vutha និង DJ Dan Dan នឹងមានវត្តមាននៅក្នុងការប្រគំតន្រ្តីមួយនេះផងដែរ។ គួរបញ្ជាក់ផងដែរថាការប្រគំតន្រ្តីនេះនឹងធ្វើឡើងនៅទីតាំងផ្លូវ King’s Road Angkor ខេត្តសៀមរាបរយៈពេល៣ថ្ងៃចាប់ពីថ្ងៃទី១៤ដល់ថ្ងៃទី១៦ ខែមេសាខាងមុខនេះ និងមានការចាក់ផ្សាយបន្តផ្ទាល់នៅលើហ្វេសប៊ុកផេកផ្លូវការថែមទៀតផង។ សង្កេតឃើញថាបទចម្រៀងថ្មីៗរបស់សិល្បកររបស់យើងទើបនឹងចេញផ្សាយដែលអាចយកទៅសម្តែងនៅក្នុងការប្រគំតន្រ្តីមួយនេះមានដូចជាបទ«ធ្មេញមាស» របស់ក្រុម La Cima Cartel បទ«មិនស្រលាញ់មិនបាន»របស់លោក GV Lux បទ«Maybe» របស់លោក Norith Polarix និងកញ្ញា Sophia Kao។ ខណៈដែលបទចុងក្រោយរបស់លោកវណ្ណដា និងលោកវណ្ណថាន «Chapter 1» និង«One Month» ដែលបានចេញផ្សាយកាលពី១ខែកន្លងទៅ ក៏បានធ្វើអោយទស្សនិកជនមានការទន្ទឹងរង់ចាំថាបទចម្រៀងថ្មីរបស់ពួកគេក៏អាចនឹងចេញផ្សាយនៅក្នុងពេលឆាប់ៗនេះផងដែរ។