Justin Bieber និយាយថា គាត់អាចនឹងយំ នៅពេលដែលគិតពីប្រពន្ធរបស់គាត់ Hailey ដែលនៅតែស្រឡាញ់គាត់ ទោះឆ្លងកាត់គ្រាលំបាកជាច្រើនរហូតមកដល់នេះ។ ក្នុងអំឡុងពេលបង្ហាញខ្លួននៅលើ Podcast "In Good Faith with Chelsea & Judah Smith" ដែលត្រូវបានចេញផ្សាយកាលពីថ្ងៃចន្ទ គូស្នេហ៍ទាំងពីរនេះបាននិយាយអំពីការលំបាកមួយចំនួននៅក្នុងទំនាក់ទំនងរបស់ពួកគេ។
Hailey Bieber បាននិយាយថា "កាលយើងនៅក្មេង គាត់បាននិយាយប្រាប់ខ្ញុំថា 'ខ្ញុំពិតជាគិតថា អ្នកគឺជាមនុស្សម្នាក់ដែលខ្ញុំនឹងរៀបការជាមួយ ហើយក៏ជាមនុស្សម្នាក់ដែលខ្ញុំនឹងបង្កើតគ្រួសារមួយជាមួយគ្នា' ហើយបន្ទាប់មកខ្ញុំបានធ្វើរឿងមួយ ដែលបានធ្វើឲ្យមានការឈឺចាប់សម្រាប់គាត់ជាខ្លាំង ហើយខ្ញុំគិតថា ការធ្វើបែបនេះ ប្រហែលជាអាចឲ្យគាត់ឈប់គិតពីរឿងរៀបការនៅពេលនោះ"។
នាងក៏មិនបានបញ្ជាក់ពីអ្វីដែលនាងបានធ្វើនោះទេ ក្រៅពីនិយាយថា នាងបានធ្វើវាដោយមិនបានគិតពិចារណា ដោយឆោតល្ងង់ផងដែរ។ Hailey Bieber បាននិយាយថា រយៈពេលដែលពួកគេបានចំណាយពេលនៅឆ្ងាយពីគ្នា គឺមានសារៈសំខាន់ណាស់ ព្រោះពួកគេទាំងពីរមានរឿងជាច្រើនដែលត្រូវឆ្លងកាត់តែម្នាក់ឯង។
នាងក៏បានលើករឿងរបស់ឪពុកម្តាយរបស់នាង គឺតារាសម្តែង Stephen Baldwin និង Kennya Baldwin ដែលបានរួមរស់ជាមួយគ្នាតាំងពីពួកគេមានអាយុ 19 ឆ្នាំ ហើយពួកគេ គឺជាគំរូដ៏សំខាន់មួយក្នុងអាពាហ៍ពិពាហ៍របស់នាង។ Hailey Bieber បាននិយាយថា នាងបានទៅរកម្តាយរបស់នាង អំឡុងពេលដែល Justin Bieber កំពុងជួបវិបត្តិសុខភាពផ្លូវចិត្ត។
Hailey បាននិយាយថា "ខ្ញុំបានទូរស័ព្ទទៅគាត់ ទាំងដែលខ្ញុំកំពុងយំ ហើយនៅពេលនោះខ្ញុំបាននិយាយថា 'ខ្ញុំមិនអាចធ្វើវាបានទេ។ គ្មានផ្លូវដែលខ្ញុំនឹងអាចធ្វើបែបនេះបានទេ ប្រសិនបើវានឹងក្លាយទៅជាបែបនេះជារៀងរហូត"។ "ម្តាយរបស់ខ្ញុំបាននិយាយធម្មតាតាមទូរស័ព្ទ ហើយគាត់បាននិយាយថា 'វានឹងកន្លងផុតទៅ ហើយកូននឹងមិនអីនោះទេ ហើយគាត់នឹងមានសុខភាពល្អឡើងវិញ ហើយពួកយើងនៅទីនេះសម្រាប់កូន' "។
Hailey បានបន្ថែមថា៖ «ប៉ុន្តែនៅក្នុងពេលនោះ ខ្ញុំបានធ្វើការសម្រេចចិត្តមួយ»។ "ខ្ញុំបានដឹងយ៉ាងច្បាស់ថា ខ្ញុំស្រលាញ់មនុស្សម្នាក់នេះជាយូរណាស់មកហើយ ហើយនៅពេលនេះ មិនមែនជាពេលដែលត្រូវបោះបង់ចោលគាត់នោះទេ។ ខ្ញុំមិនអាចធ្វើបែបនេះដាក់គាត់បានឡើយ"។
Justin Bieber បានទទួលស្គាល់ចំពោះការអត់ធ្មត់របស់ប្រពន្ធគាត់ ហើយបាននិយាយថា ទោះបីជាគាត់មកពីគ្រួសារដែលឪពុកម្តាយរបស់គាត់មិនដែលរៀបការជាមួយគ្នាក៏ដោយ ក៏គាត់តែងតែចង់មានប្រពន្ធម្នាក់ និងបង្កើតគ្រួសារមួយសម្រាប់គាត់។
Justin Bieber បាននិយាយថា "ខ្ញុំបានដឹងថា ខ្ញុំត្រូវឆ្លងកាត់ការព្យាបាលជាច្រើន ដើម្បីទទួលបានទំនាក់ទំនងល្អ និងច្បាស់លាស់មួយ ព្រោះខ្ញុំធ្លាប់មានរបួស និងស្លាកស្នាមជាច្រើនរួចមកហើយ"។ "ខ្ញុំបានប្តេជ្ញាចិត្តនឹងថែរក្សាទំនាក់ទំនងមួយនេះឲ្យកាន់តែល្អប្រសើរជាងមុនទៅទៀត"។
តារាចម្រៀងប៉ុបរូបនេះ បាននិយាយថា ការយល់ចិត្តគ្នា បានជួយឱ្យអាពាហ៍ពិពាហ៍របស់ពួកគេរីកចម្រើន ហើយបាននិយាយថា ភរិយារបស់គាត់ "នឹងមិនទៅណាឡើយ" ព្រោះនាងតែងតែនៅក្បែរខ្លួនខ្ញុំជានិច្ច។
Hailey Bieber និយាយថា៖ «យើងទាំងពីរនាក់នឹងមិនក្លាយជាមនុស្សដែលនិយាយថា 'ខ្ញុំបោះបង់ចោលហើយ' នោះទេ។ "យើងទាំងពីរនាក់នឹងមិនក្លាយជាមនុស្សដែលត្រូវដើរចេញពីស្ថានការណ៍ណាមួយនោះទេ។ ដោយសារតែយើងទាំងពីរហាក់ដូចជា 'ពួកយើងជ្រើសរើសការប្រយុទ្ធមួយនេះ ដូច្នេះ យើងនឹងបន្តតស៊ូយកជ័យជំន្នះលើការប្រយុទ្ធមួយនេះតាមដែលអាចធ្វើបាន"។
អត្តបទដកស្រង់ពី Lisa Respers France
បកប្រែនិងកែសម្រួលដោយលោក គីមម៉េង