កងកម្លាំងពិសេស Guinea បានចាប់យកអំណាច តាមរយៈការធ្វើរដ្ឋប្រហារ ចាប់ខ្លួនប្រធានាធិបតីព្រមទាំងសន្យាថា នឹងធ្វើការផ្លាស់ប្តូរមុខមាត់ថ្មីនៃប្រទេសអាហ្វ្រិកខាងលិចមួយនេះ។

មេដឹកនាំយោធាថ្មីបានប្រកាស បំរាមគោចរទូទាំងប្រទេស រហូតដល់មានការប្រកាសជាថ្មី ហើយបាននិយាយថា និងកោះប្រជុំគណៈរដ្ឋមន្រ្តីរបស់លោកប្រធានាធិបតី Alpha Conde និងអ្នកនយោបាយជាន់ខ្ពស់ នៅថ្ងៃច័ន្ទវេលាម៉ោង 11 ព្រឹក (11.00GTM) ។

កងកុម៉្មង់ដូបានចេញសេចក្តីថ្លែងការណ៍ថា ការបដិសេធមិនចូលរួមប្រជុំនឹងចាត់ទុកថាជា សកម្មភាពឪទ្ទាម។ អភិបាលខេត្ត និងនាយរដ្ឋបាលជាន់ខ្ពស់នឹងតូវផ្លាស់ប្តូរដោយមន្រ្តីយោធា។

“យើងបានសំរេចថា បន្ទាប់ពីចាប់ខ្លួនប្រធានាធិបតី យើងនឹងរំលាយរដ្ឋធម្មនុញ្ញចោល” ថ្លែងដោយមនុស្សម្នាក់ដែលមានឯកសណ្ឋានយោធា អមដោយទាហ៊ានដែលមានកាំភ្លើងវែងនៅក្នុងដៃ តាមរយៈក្លិបវីឌីអូមួយ ដែលគេបញ្ជូនឲ្យទីភ្នាក់ងារព័ត៌មាន AFP កាលពីថ្ងៃអាទិត្យ។

មន្រ្តីយោធាដែលសុំមិនបញ្ចេញឈ្មោះបាននិយាយថា  ព្រំដែនគោក និងអាកាសទាំងអស់ត្រូវបានបិទ។ សូមជំរាបផងដែរថា ប្រទេស Guinea ជាប្រទេសមួយដែលមានប្រជាពលរដ្ឋ 13 លាននាក់ ហើយជាប្រទេសដែលដែលស្ថិតនៅក្នុងចំណោម ប្រទេសដែលក្រីក្រជាងគេបំផុតក្នុងពិភពលោក៕