ផលិតកម្ម Galaxy Navatra បានទាញយកគ្រាប់ពេជ្រពីរគ្រាប់ពីក្នុងកម្មវិធីប្រលងចម្រៀងកំរិតថ្នាក់អន្តរជាតិកញ្ញាហ៊ិនលីដា និងតន់ចន្ទសីម៉ាដែលស្ថិតនៅក្នុងអំឡុងនៃរដូវកាលជាមួយគ្នា។ Galaxy Navatra ហាក់ដូចជាយកចិត្តទុកដាក់មើលថែកំពូលតារាចម្រៀងស្រីទាំងពីររូបនេះណាស់ដោយបានរៀបចំទាំងការធ្វើចម្រៀង Cover សកម្មភាពច្រៀង Outdoor និងការធ្វើបទថ្មីជាបន្តបន្ទាប់។ យ៉ាងណាមិញផងដែរក្រោយពីកញ្ញាហ៊ិនលីដាបានបញ្ចប់ក្នុងការចេញផ្សាយបទថ្មី«បញ្ជីខ្មៅ»របស់នាង កញ្ញាតន់ចន្ទសីម៉ាក៏បានបង្ហើបនឹងការជិតចេញផ្សាយបទចម្រៀងថ្មីរបស់នាងតាមពីក្រោយដែលមានចំណងជើងថា «Guarantee» ផងដែរ។
កាលពីថ្ងៃទី០៦ ខែមករាកន្លងទៅនេះ កញ្ញាតន់ចន្ទសីម៉ាបានធ្វើការបង្ហោះនៅ Teaser បទចម្រៀងថ្មីរបស់នាងមួយដែលមានចំណងជើងថា«Guarantee» នៅលើឆាណែលយូធូបផ្លូវការរបស់នាង ដោយបានសរសេរជាមួយនឹងខេបសិនថា Coming Soon។ ជាមួយនឹងចង្វាក់ភ្លេងប្លែកនិងមានភាពញាប់រន្ថើនសាងការចាប់អារម្មណ៍ជាខ្លាំងដល់អ្នកនិយមស្តាប់តន្រ្តី រហូតនៅតាមបណ្តាញសង្គមនានាមានចាប់ផ្តើមបង្ហោះបទចម្រៀង Teaser របស់នាងជាបណ្តើរៗហើយ។
ក្រោយមកនៅក្នុងថ្ងៃទី១៧ ខែមករាកន្លងទៅនេះ កញ្ញាតន់ចន្ទសីម៉ាក៏បានធ្វើការទំលាក់នូវ Teaser ទី២បន្តទៀតដោយជាវិដេអូសម្តែងរបស់នាងជាមួយនឹងក្រុមរាំផងដែរនៅបទចម្រៀងថ្មីនេះរួមនឹងខេបសិនថា «Guarantee ថាសាវ៉ា ថាបោកៗៗ បោកមែន» ដោយមានក្រុមរាំរបស់នាងពាក់ស្រោមមុខរូបតុក្កតាខ្លាំឃ្មុំបិទបាំងផងដែរ ដែលជាស្ទីលប្លែកមួយនៃបទថ្មីនេះ។ ខណៈដែលកញ្ញាហ៊ិនលីដារកឃើញសំលេងខ្លួនឯងនៅក្នុងបទចម្រៀងប្រភេទបែប Strong Girl ជួបវិបត្តិស្នេហា ដូចជាបទ «មនុស្សស្រីក្រោយខ្នង» និង«ច្បាស់រឺនៅ?» តើ Galaxy Navatra កំនត់អោយតន់ចន្ទសីម៉ានៅរសជាតិប្រភេទណា?
សង្កេតឃើញថាកញ្ញាតន់ចន្ទសីម៉ាជាអ្នកចម្រៀងអាចច្រៀងបានគ្រប់ទំរង់បទចម្រៀងដោយតែងតែបាននាំយកនូវបទរសជាតិប្លែកៗមកកាន់ទស្សនិកជនរាប់ចាប់តាំងពីបទរ៉េប«Lambo Toy» បទភ្លេងបុរាណ «ស្រលាញ់អ្វីដែលខ្មែរមាន» និងបទមនោសញ្ចេតនា«ស្នេហ៍ក្រៅផ្លូវការ»ជាដើម ទាំងនេះបានធ្វើអោយអ្នកស្តាប់មានតែការចង់ដឹងលឺអំពីរសជាតិថ្មីៗនៅក្នុងបទចម្រៀងក្រោយៗរបស់នាង។
