ស្មាតហ្វូន Pixel របស់ Google កំពុងបោះជំហានយ៉ាងធំមួយ ឆ្ពោះទៅរកការប្រកួតប្រជែងជាមួយ Apple iPhone និង Samsung Galaxy យ៉ាងពិតប្រាកដ។
នៅក្នុងសន្និសីទសារព័ត៌មាននិម្មិត (Virtual Press Conference) កាលពីថ្ងៃអង្គារ សប្តាហ៍មុន ក្រុមហ៊ុនបានបង្ហាញនូវស្មាតហ្វូន 6.4-inch Pixel 6 និង 6.7-inch Pixel 6 Pro ស៊េរីថ្មី ដែលបានបើកដំណើរការលើប្រព័ន្ធប្រតិបត្តិការ Android 12 ដែលជាការអាប់ដេតកម្មវិធី software ដ៏សំខាន់បំផុតរបស់ Google ក្នុងរយៈពេលជាច្រើនឆ្នាំ។ ទូរស័ព្ទស្មាតហ្វូននេះ មានអេក្រង់រាបស្ទើរហើយគ្មានគែម ប្រព័ន្ធកាមេរ៉ាថ្មីដែលដាក់ចូលទៅក្នុងរបារកាមេរ៉ាផ្តេកនៅផ្នែកខាងក្រោយ មុខងាររូបថតប្រកបដោយភាពច្នៃប្រឌិត និងថ្មដែលអាចប្រើប្រាស់បានជិតពីរថ្ងៃ ដោយបានកំណត់អាទិភាពថា តើកម្មវិធីណាដែលបានប្រើប្រាស់ច្រើនបំផុត (និងបិទកម្មវិធីដែលនៅសល់)។
ប៉ុន្តែការផ្លាស់ប្តូរពិតប្រាកដនោះ គឺដំណើរការ Tensor ថ្មីរបស់ Google ដែលបានដាក់បង្ហាញពីការផ្លាស់ប្តូរពីបន្ទះឈីបរបស់ភាគីទីបី ដែលត្រូវបានប្រើជាទូទៅនៅក្នុងឧបករណ៍ Android ដែលជាគូប្រជែងផងដែរ។ ក្រុមហ៊ុនបាននិយាយថា Tensor បានធ្វើឱ្យទូរស័ព្ទស្មាតហ្វូន Pixel 6 មានដំណើរការលឿនជាង Pixel 5 ដល់ទៅ 80% ដែលធ្វើឱ្យមានបញ្ញាសិប្បនិមិត្ត (artificial intelligence) នៅលើឧបករណ៍ដែលមានលក្ខណៈពិសេសដូចជា ការទទួលស្គាល់ការនិយាយត្រឹមត្រូវជាងមុន និងដំណើរការរូបភាព។ វាក៏ផ្តល់នូវថាមពលដំណើរការកាន់តែច្រើនទៅលើទូរស័ព្ទសម្រាប់ហ្គេម និងកម្មវិធីផ្សេងៗ និងធ្វើឱ្យឧបករណ៍ក្នុងកាមេរ៉ាថ្មីមួយចំនួនកាន់តែល្អជាងមុនថែមទៀត។
ក្រុមហ៊ុន Apple (AAPL), Huawei និង Samsung (SSNLF) កំពុងបង្កើតបន្ទះឈីបផ្ទាល់ខ្លួនអស់ពេលជាច្រើនឆ្នាំមកហើយ ប៉ុន្តែការខិតខំប្រឹងប្រែងរបស់ Google ក្នុងការកាត់បន្ថយលើប្រព័ន្ធដំណើរការទ្វេដង ដែលបានផលិតឡើងសម្រាប់ Google Android software ក្នុងការបង្ហាញថា វាបានត្រៀមខ្លួនរួចជាស្រេច ដើម្បីបង្កើតបទពិសោធន៍ផ្ទាល់ខ្លួន សម្រាប់អ្នកប្រើប្រាស់ និងព្យាយាមដើម្បីទទួលបានចំណែកធំជាងមុនក្នុងទីផ្សារស្មាតហ្វូនពិភពលោក។
លោក David McQueen នាយកស្រាវជ្រាវនៅ ABI Research បាននិយាយថា “Google មិនដែលមានបំណងកែប្រែ Pixel ទៅជាស្មាតហ្វូនដែលមានបរិមាណខ្ពស់នោះទេ។” “ការផ្តើមគំនិតដំបូង គឺដើម្បីឲ្យពួកគេប្រើឧបករណ៍ Pixel ដើម្បីដាក់បង្ហាញ Android Ecosystem ដោយប្រាប់ទៅដល់ដៃគូរបស់ពួកគេនូវអ្វីដែលអាចធ្វើបាន រួមជាមួយកម្មវិធី Hardware លំដាប់កំពូល និងកម្មវិធី Software Android ចុងក្រោយបំផុត” ។
ទូរស័ព្ទស្មាតហ្វូន Pixel 6 មានបីពណ៌ គឺ ពណ៌ទឹកសមុទ្រ, ពណ៌ស្រដៀងនឹងផ្កាថ្ម និងពណ៌ខ្មៅ ហើយមានតម្លៃចាប់ពី $599 ឡើងទៅ។ ទន្ទឹមនឹងនោះ ទូរស័ព្ទស្មាតហ្វូន Pixel 6 Pro មានពណ៌ពន្លឺថ្ងៃ ពណ៌ស និងពណ៌ខ្មៅ មានតម្លៃចាប់ពី ៨៩៩ ដុល្លារ ឡើងទៅ។ ទូរស័ព្ទស្មាតហ្វូន Pixel 6 ថ្មីនេះ អាចរកបានសម្រាប់ការបញ្ជាទិញ និងចាប់ផ្ដើមដឹកជញ្ជូននៅថ្ងៃទី28 ខែតុលា។
ដូចទៅនឹងស្មាតហ្វូនជាច្រើនដែរ ការកែលម្អកាមេរ៉ា គឺជាចំណុចការលក់ដ៏សំខាន់។ ទូរស័ព្ទស្មាតហ្វូន Pixel 6 Pro មានប្រព័ន្ធកាមេរ៉ាក្រោយបីគ្រាប់ថ្មី ជាមួយនឹងកែវថត telephoto កម្រិត pro-level ជាមួយនឹង 4x optical zoom ចូលទៅក្នុងរបាកាមេរ៉ា និងកាមេរ៉ាមុខ 11 megapixel selfie ។ ក្រុមហ៊ុនបាននិយាយថា ឧបករណ៍ចាប់យកពន្លឺបានច្រើនជាង 150% ក្នុងគោលបំណងនាំមកនូវពណ៌រស់រវើក និងធ្វើឲ្យរូបថតកាន់តែច្បាស់។
Google (GOOG) ក៏បានណែនាំឧបករណ៍រូបថតថ្មី រួមទាំង Face Unblur ដែលអាចចាប់យកមុខបានប្រសើរជាងមុនមិនថាក្នុងស្ថានភាពបែបណា ជ័រលុបវេទមន្ត (Magic Eraser) នៅក្នុង Google Photos ដែលអាចលុបផ្ទៃខាងក្រោយបាន និងមានមុខងារចលនា (Motion Mode) សម្រាប់ការថតសកម្មភាព។
ក្រុមហ៊ុនកំពុងបន្ថែមនូវមុខងារសុវត្ថិភាពថ្មីដល់ Pixel ផងដែរ ដូចជាមជ្ឈមណ្ឌលសុវត្ថិភាព ដែលអាចដាក់ពាក្យសម្ងាត់នៅកន្លែងតែមួយ និងអនុញ្ញាតឱ្យអ្នកបិទមីក្រូហ្វូន និងកាមេរ៉ា (ឬជ្រើសរើសកម្មវិធីណាមួយដែលអាចប្រើវាបាន)។
វាក៏កំពុងដាក់ចេញផងដែរ នូវការបង្កើនការការពារប្រឆាំងនឹងការបន្លំ ដើម្បីរកមើលហានិភ័យដែលអាចកើតមាន និងការហៅទូរស័ព្ទដែលគួរឱ្យសង្ស័យ សារជាអក្សរ អ៊ីមែល និងតំណភ្ជាប់ (links) ដោយដាក់សញ្ញាបង្ហាញទៅកាន់អ្នកប្រើប្រាស់។ ទន្ទឹមនឹងនេះ កម្មវិធីសុវត្ថិភាពផ្ទាល់ខ្លួនថ្មីនេះ អាចពិនិត្យដឹងថា ប្រសិនបើអ្នកប្រើប្រាស់បានជួបឧបទ្ទវហេតុ និងអាចជួយពួកគេក្នុងការទាក់ទងដល់អ្នកជួយសង្គ្រោះបាន។
អត្តបទដកស្រង់ពី Samantha Murphy Kelly
បកប្រែនិងកែសម្រួលដោយលោក គីមម៉េង