ភ្នំពេញ៖ ក្រសួងសុខាភិបាល បានរកឃើញផលិតផលឈ្មោះ GMS ULTRA មានដាក់សារធាតុឱសថសម័យ Thdalafil ដែលជាផលិតផលអាចបង្កឱ្យមានគ្រោះថ្នាក់ដល់អាយុជីវិត និងបានអំពាវនាវឱ្យបញ្ឈប់ការប្រើប្រាស់ជាបន្ទាន់។

យោងតាមសេចក្ដីប្រកាសព័ត៌មានរបស់ក្រសួងសុខាភិបាលបានឱ្យដឹងថា ក្រសួងបានទទួលព្រឹត្តិប័ត្រវិភាគគុណភាពពីមជ្ឍមណ្ឌលជាតិពិសោធន៍សុខាភិបាល ដែលបញ្ជាក់អំពីផលិតផលឈ្មោះ GNS ULTRA Box/10 Sachets មានលួចដាក់សារធាតុឱសថសម័យ Tadalui ដែលសារធាតុនេះ ត្រូវប្រើប្រាស់ក្នុងកម្រិតច្បាស់លាស់ និងមានការប្រុងប្រយ័ត្នហើយមានបុគ្គលមួយចំនួនមិនអនុញ្ញាតឱ្យប្រើប្រាស់ទៀតផង។

ក្រសួងសុខាភិបាលបានព្រមានថា បើសិនមានម្ចាស់គណនីបណ្តាញ សង្គមហ្វេសប៊ុក និងជនពាក់ពន្ធណាមួយនៅតែបន្តនាំចូលចែកចាយផ្សព្វផ្សាយលក់ផលិតផលនេះជាបន្តទៀតនឹងត្រូវទទួលទោសបញ្ញត្តិតាមច្បាប់ជាធរមាន។

ជាមួយគ្នានេះ ក្រសួងសុខាភិបាល បានណែនាំដល់ប្រជាពលរដ្ឋទាំងអស់មិនត្រូវប្រើប្រាស់ផលិតផលឈ្មោះ GNS ULTRA Box/10 Sachets នេះឡើយ ព្រោះផលិតផលនេះ អាចបណ្តាលឱ្យប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់អាយុជីវិត៕