ភ្ញាក់ផ្អើលនឹងសមាសភាពថ្មីរបស់ក្រុមផ្ការីកគ្រប់រដូវដែលជាលោក GMENGz លោក Emi និងលោក1NE កាលពីពេលថ្មីៗនេះ! តើតារារ៉េបទាំងបីរូបនេះកំពុងធ្វើអ្វីនៅក្នុងក្រុមបាល់ទាត់ផ្ការីកគ្រប់រដូវរបស់លោកពាក់មី? ដូចដែលទស្សនិកជនបានដឹងរួចមកហើយ នឹងមានការប្រកួតបាល់ទាត់ខ្នាតធំមួយដ៏អស្ចារ្យហៅថា Soccer League រដូវកាលទី 7 ដែលរៀបចំធ្វើឡើងដោយក្រុមសហភាពសហព័ន្ធយុវជនកម្ពុជា ដើម្បីប្រមូលថវិកាជួយដល់កុមារកម្ពុជានៅក្នុងពេលឆាប់ៗនេះ។ នៅខណៈពេលនោះផងដែរ ក្រុមផ្ការីកគ្រប់រដូវនឹងចូលរួមប្រកួតជាកិត្តិយសដើម្បីបើករដូវកាលថ្មីរវាងក្រុមថ្នាក់ដឹកនាំ ស.ស.យ.ក និងក្រុមបាល់ទាត់របស់ពួកគេ។ ហើយការចូលរួមរបស់តារារ៉េបទាំង៣រូបនេះកំពុងបង្ហាញពីការគាំទ្ររបស់សិល្បករយើងនៅក្នុងការចូលរួមការងារសប្បុរសធម៌ ក៏ដូចជាលើកស្ទួយវិស័យកីឡានៅកម្ពុជាផងដែរ។ មិនតែប៉ុណ្ណោះលឺមកថា នៅក្នុងថ្ងៃនោះផងដែរ ក៏នឹងមានការចូលរួមសម្តែងពីសំណាក់សិល្បកររ៉េបល្បីៗជាច្រើននាក់ផងដែរ។
ទន្ទឹមនេះ ងាកមកមើលខាងតារាសម្តែងមកពីក្រុម Cambodia Superstar បន្តិចវិញ។ ប្រុសខួចនៅមួយរយៈចុងក្រោយនេះ លោកក៏បានធ្វើអោយផ្ទុះការចាប់អារម្មណ៍ជាមួយនឹងសកម្មភាពសប្បុរសធម៌របស់លោកជាច្រើនផងដែរ។ ដូចជាកាលពីពេលថ្មីៗនេះ មហាជនបានតាមប្រមាញ់បានរូបភាពប្រុសខួចកំពុងចាប់ម្ហូបទុកអោយបុរសចំណាស់ម្នាក់យ៉ាងមានទឹកចិត្ត។ និងក្រោយមកទៀត ប្រុសខួចក៏ត្រូវបានតាមប្រមាញ់រូបភាព និងធ្វើអោយផ្ទុះបណ្តាញសង្គមម្តងទៀតជាមួយនឹងវិដេអូធ្វើអោយលោកយាយម្នាក់រំភើបដល់ថ្នាក់ស្រក់ទឹកភ្នែកនៅលើដងផ្លូវភ្លាមៗ ពេលដែលទទួលបានប្រាក់ឧបត្ថម្ភរបស់លោកដែលមានចំនួន១៥ម៉ឺនរៀល។ រូបភាពនេះធ្វើអោយសាធារណជនជាច្រើនឆ្លុះបញ្ចាំងឃើញថា ត្រឹមតែទឹកប្រាក់ស្តួចស្តើងប៉ុណ្ណោះតែមានតំលៃខ្លាំងណាស់សម្រាប់ជនខ្វះខាត។ តើទស្សនិកជនយល់ឃើញយ៉ាងណាដែរ?
