បេក្ខជន Rapper ដែលជាសមាជិកកូនក្រុម Coach Norith មួយរូបនេះពិតជាមិនធម្មតា កាលពីសប្តាហ៍មុនលោកបានយកឈ្នះវគ្គ 8 Bars to Survive ជាលើកដំបូងនៅក្នុងកម្មវិធី The Rapper Cambodia វគ្គ Battle Round។ ដោយវគ្គនេះគឺជាវគ្គដែលត្រូវសម្រេចព្រេងវាសនាចុងក្រោយហើយរបស់បេក្ខជន Rapper ដែលបានធ្លាក់នៅក្នុងវគ្គ Battle Round ទាំងអស់ ដែលនៅក្នុងសប្តាហ៍នេះផងដែរមានចំនួន៦នាក់។

លោក GMENGZ បានយកឈ្នះលើបេក្ខជនទាំង៥នាក់ទៀតដែលសុទ្ធសឹងតែជាជើងខ្លាំងវ៉ៃមិនបែកផ្តួលមិនដួលនៅក្នុងវគ្គប្រកួតដ៏ស្វិតស្វាញមួយនេះ។ គួរបញ្ជាក់ផងដែរថា នៅក្នុងសង្វៀនប្រកួតវគ្គ Battle Round របស់លោកឯណោះវិញ លោក GMENGZ បានប្រកួតជាមួយនឹងបេក្ខជន២រូប គឺលោក BUUBEE និងលោកDXXM ដែលមានតែលោក DXXM ប៉ុណ្ណោះជាអ្នកយកឈ្នះនៅក្នុងវគ្គនេះ ខណៈដែលពួកគេទាំងពីរទៀតមិនអាចឆ្លងផុតវគ្គដែលដាក់ពិន្ទុយ៉ាងល្អិតល្អន់ពី Producer VannDa និង Juvie Lin។ 

យ៉ាងណាមិញផងដែរ កត់សម្គាល់ឃើញថានៅដើមសប្តាហ៍មុននៃការប្រកួត នៅថ្ងៃទី១៦ ខែតុលា លោក​​​ GMENGZ បេក្ខជនឆ្នើមដ៏មានសមត្ថភាពមួយរូបនេះថែមទាំងបានចេញផ្សាយបទរ៉េបថ្មីមួយបទយ៉ាងឡូយជាមួយនឹងតារារ៉េបលោក NPN ផងដែរ។ ដោយបទចម្រៀងនេះមានចំណងជើងថា«​​​Feel Cool» ត្រូវបានទម្លាក់ឡើងនៅលើឆាណែលយូធូបផ្លូវការរបស់លោក GMENGZ ផ្ទាល់។ តើទស្សនិកជនយល់ឃើញយ៉ាងណាដែរចំពោះការបង្ហាញសមត្ថភាពរបស់លោក GMENGZ កន្លងមក?