រ៉េបផ័រប្រុសសង្ហា GMENGz ផ្ទុះបទរ៉េបបែបស្ទាវសាជាថ្មីនៅលើ Tik Tok ដែលមានចំណងជើងថា«យប់ម៉ោង 2AM» បន្ទាប់ពីបទចម្រៀងមួយនេះរបស់លោកត្រូវបានលើកទៅសម្តែងពេញឡើងជាមួយនឹង Coach Norith នៅឯក្នុង Pub កំសាន្តមួយកន្លែងកាលពីដើមខែមីនានេះ។ 

គួរបញ្ជាក់ផងដែរថា នេះគឺជាបទទី១ហើយដែលលោកបានបញ្ចេញឡើងបន្ទាប់ពីបទ«សារ៉េ» របស់លោកដែលត្រូវបានចេញផ្សាយដំបូងនៅក្នុងផលិតកម្ម Klapyahandz។ យ៉ាងណាមិញ ថ្វីបើលោកបានឈានជើងចូលក្នុងផលិតកម្មថ្មីក៏ដោយ ក៏សង្កេតឃើញថាលោកនៅតែបន្តសកម្មភាពជាមួយនឹងគ្នីគ្នានៅក្នុងក្រុម The Rapper របស់លោកជានិច្ច និងCoach របស់លោកផងដែរ ដែលរួមមានដូចជាលោក Goofy លោក Yuuhai និងលោក Norith នេះឯង។ ម្យ៉ាងទៀតកាលពីពេលថ្មីៗនេះ ក៏អាចសង្កេតបានច្បាស់ថា Coach Norith ក៏ពិតជាបានបង្ហាញការគាំទ្រចំពោះបទចម្រៀងថ្មីរបស់លោកមួយនេះខ្លាំងណាស់ ដោយលោកថែមទាំងបានលើកទៅថតវិដេអូ Tik Tok ថែមទៀតផង។ 

គួរអោយចាប់អារម្មណ៍ផងដែរ ក្នុងការចូលរួមសម្តែងរួមគ្នាលើបទចម្រៀងមួយនេះនៅឯ Pub កំសាន្ត Kowloon អ្នកទាំងពីរបានទាក់ទាញសំលេងគាំទ្រពីទស្សនិកជនយ៉ាងក្រៃលែង ជាពិសេសដោយសារតែប៉ារ៉ូលបទចំរៀងនេះមានភាពលេបខាយ និងទាក់ទាញជាខ្លាំង ដែលធ្វើអោយសូម្បីតែពីសំណាក់ Coach អ្នកច្រៀងផ្ទាល់ ក៏មានការអៀនរឹងខ្លួនដែរ។ គួររំលឹកផងដែរថា នៅក្នុងយប់នោះ ក្រៅពី Coach បានសម្ពោធបទថ្មី បកស្រោមជាមួយនឹងសិស្សហើយ លោក Norith ក៏មិនភ្លេចច្រៀងបំពេអារម្មណ៍ទស្សនិកជនជាមួយនឹងបទថ្មីៗទាំង៣បទរបស់លោកផងដែរ​​​​​​ ដែលរួមមាន បទ «មួយណា?» «3AM» និង«Maybe»។