កូឡាឡាំពួរ៖ ក្រសួងហិរញ្ញវត្ថុម៉ាឡេស៊ីបានបញ្ជូនវិក័យប័ត្រនៃវិធានការណ៍ហិរញ្ញវត្ថុបណ្តោះអាសន្នដែលស្នើបង្កើនកម្រិតបំណុលសាធារណៈពីបច្ចុប្បន្ន៦០ទៅ៦៥ភាគរយនៃផលិតផលក្នុងស្រុកសរុប (GDP) ជូនទៅរដ្ឋសភាកាលពីថ្ងៃទី ២៨ខែកញ្ញាហើយ។ នេះបើតាមការចេញផ្សាយរបស់សារព័ត៌មានម៉ាឡេស៊ី។

រដ្ឋមន្ត្រីក្រសួងហិរញ្ញវត្ថុម៉ាឡេស៊ីលោក Tengku Zafrul Aziz បាននិយាយថា តាមរយៈការបង្កើនកម្រិតបំណុលសាធារណៈវានឹងផ្តល់នូវទំហំសារពើពន្ធបន្ថែមទៀតដើម្បីគាំទ្រដល់ការបើកដំណើរការសេដ្ឋកិច្ចឡើងវិញនិងធានាបាននូវការងើបឡើងនៃសេដ្ឋកិច្ចវិញប្រកបដោយស្ថិរភាព។

លោករដ្ឋមន្រ្តីក៏បានបញ្ជាក់ផងដែរថា ការបង្កើនកម្រិតបំណុលសាធារណៈនៅតែស្របតាមការប្តេជ្ញាចិត្តរបស់រដ្ឋាភិបាលចំពោះវិធានការពង្រឹងសារពើពន្ធនៅក្នុងរយៈពេលមធ្យម។ ទន្ទឹមនឹងនេះដែរច្បាប់ស្តីពីគណនេយ្យភាពសារពើពន្ធ (FRA) ក៏នឹងជួយកែលម្អអភិបាលកិច្ចតម្លាភាពនិងគណនេយ្យភាពក្នុងការគ្រប់គ្រងសារពើពន្ធជាតិ។

លោកបានស្នើបង្កើនទំហំនៃមូលនិធិកូវីដ១៩របស់រដ្ឋាភិបាលដល់ ១១០ពាន់លានរីងហ្គីត (២៦.៥៣ពាន់លានដុល្លារ) ពី ៦៥ពាន់លានរីងហ្គីត។

លោកសង្កត់ធ្ងន់ថាកិច្ចការអាទិភាពបច្ចុប្បន្នរបស់រដ្ឋាភិបាលគឺការពារអាយុជីវិតប្រជាជននិងធានាថាទស្សនវិស័យកំណើនសេដ្ឋកិច្ចរបស់ប្រទេសនៅតែរឹងមាំក្នុងរយៈពេលមធ្យមនិងវែង។ 

លោកថា អាទិភាពទាំងនេះគឺស្របតាមគោលដៅស្នូលនៃផែនការរដ្ឋាភិបាលម៉ាឡេស៊ីនិងចក្ខុវិស័យរួមនៅឆ្នាំ ២០៣០ ហើយផ្អែកលើគោលការណ៍នៃការគ្រប់គ្រងហិរញ្ញវត្ថុ។

ប្រទេសម៉ាឡេស៊ីបានកាត់បន្ថយទស្សនវិស័យកំណើនសេដ្ឋកិច្ចឆ្នាំ ២០២១ របស់ខ្លួនពីរដងនៅឆ្នាំនេះដោយសារវិធានការណ៍បិទខ្ទប់ប្រយុទ្ធប្រឆាំងមេរោគកូវីដ១៩បានធ្វើឱ្យមានការរំពឹងថាសេដ្ឋកិច្ចនឹងកើនឡើង ៣-៤% ដែលទាប់ជាងពីការព្យាករមុន ៦-៧.៥%៕