បន្ទាប់ពីដំណើរការងារនៅក្នុងវិស័យសិល្បៈអស់រយៈពេលប្រហែល២០ឆ្នាំទៅហើយ តារាចំរៀងបទពិសោធន៍យូរឆ្នាំលោក ខាន់ជេមស៌បានពាំនាំដំណឹងដ៏ពិសេសមួយចូលមកក្នុងរង្វង់សិល្បៈដោយលោកបានបង្ហើបពីការរួមសហការការងារសិល្បៈថ្មីមួយជាមួយនឹងកូនប្រុសពៅរបស់លោកផ្ទាល់តែម្តងមានឈ្មោះថា Gate។ យ៉ាងណាមិញផងដែរមុននឹងMVបទចំរៀងរបស់ពួកគេបានចេញផ្សាយជាផ្លូវការ លោកខាន់ជេមស៌និងហ្កេតបានសម្តែងរួមគ្នានៅលើឆាកការប្រគំតន្រ្តីមួយចំនួនរួចមកហើយបង្កនូវទស្សនីយភាពប្លែកអារម្មណ៍ និងសប្បាយរីករាយចែកជូនប្រិយមិត្តទស្សនាយ៉ាងក្រៃលែង។ លោកខាន់ជេមស៌ក៏បានបញ្ជាក់ពីកាលបរិច្ឆេទក្នុងការចេញ MV ថ្មីរបស់ពួកគេនូវបទ«ហ្កេតកូនប៉ា» នៅក្នុងថ្ងៃទី១ ខែកញ្ញានេះ។ មានប្រិយមិត្តជាច្រើនបង្ហាញការគាំទ្រវីរសិល្បករ និងកូនប្រុសបង្កើតរបស់លោកខ្លាំងណាស់ ពួកគេបានធ្វើការសរសើរសមត្ថភាពរ៉េបរបស់ហ្កេតថាធ្វើបានល្អ រួមទាំងពេញចិត្តនៅប្រយោគនៅក្នុងបទចំរៀងលើកឡើងថាឪខ្លាកូនខ្លា ដែលធ្វើអោយពួកគេគិតថាហ្កេតពិតជាសក្តិសមធ្វើជាទំពាំងស្នងឬស្សីបន្តវេនពីលោកខាន់ជេមស៌ពិតមែន។
ការសម្តែងរួមគ្នារបស់ឪពុកកូនសិល្បករមួយគូនេះមិនត្រឹមតែបានបំរើអារម្មណ៍ទស្សនិកជនប៉ុណ្ណោះទេ ប៉ុន្តែលោកខាន់ជេមស៌ក៏ចង់ផ្តល់ជាគំរូល្អមួយសំរាប់អ្នកទស្សនាក្នុងវិស័យតន្រ្តីទាំងអស់ លោកបានបង្ហាញពីទំនាក់ទំនងល្អរវាងឪពុកនិងកូន ព្រមទាំងបានបង្ហាញពាក្យពេចន៍ណែនាំហ្កេតខ្លះៗផងដែរ ដូចជាសារអប់រំហ្កេតនៅលើវេទិកាថាការគោរពជាសីលធម៌មួយឆ្លុះបញ្ចាំងពីអត្តចរិតដ៏ប្រពៃរបស់ជនជាតិខ្មែរយើង ជាពិសេសបង្ហាញពីគុណតំលៃ និងភាពថ្លៃថ្នូររបស់ខ្លួនយើងផ្ទាល់។ ទោះយើងទៅដល់ទីណា ទោះយើ់ងថ្ងៃក្រោយក្លាយជាអ្វី បើកូនគោរពមនុស្សនៅជំុវិញខ្លួន កូនក៏បានការគោរពស្រលាញ់ពីមនុស្សជុំវិញខ្លួនដូចគ្នា។ លក្ខណៈសម្បត្តិថ្លៃថ្នូរចេះបន្ទាបខ្លួនរបស់លោកខាន់ជេមស៌មិនត្រឹមតែធ្វើអោយអ្នកគាំទ្រពេញចិត្តលោកប៉ុណ្ណោះទេ តួយ៉ាងពួកគេក៏មានការចាប់អារម្មណ៍និងចង់ដឹងថាតើកូនប្រុសរបស់លោកមានសមត្ថភាពយ៉ាងណាខ្លះ ហើយមានភាពទាក់ទាញ និងអត្តចរិតបែបណា។ យ៉ាងណាផងដែរអ្នកទស្សនាជាច្រើនរំពឹងថាលោកខាន់ជេមស៌និងអាយដលតូច ហ្កេត នឹងមានគំរោងអ្វីពិសេសជាមួយគ្នាបន្តទៀត និងបន្តគាំទ្រពួកគេទាំងពីរផងដែរ។
