CEO គុណភាពលោក M.Megamind បានចូលរោងការហើយកាលពីថ្ងៃទី១៥ ខែធ្នូកន្លងទៅនេះក្រោមការចូលរួមពី​​​វត្តមានរបស់ Influencers និង Gamers ល្បីៗជាច្រើននៅក្នុងប្រទេសកម្ពុជា។ លោក M.Megamind ដែលមានឈ្មោះពិតថា Tem Vichetvatana ត្រូវបានបែកធ្លាយពត៌មានជីវិតពិតឯកជនរបស់លោកខ្លះនៅលើបណ្តាញសង្គមកាលពីពេលថ្មីៗនេះ​​​ដោយសារមានការបង្ហោះសារអបអរសាទរថ្ងៃអាពាហ៍ពិពាហ៍របស់លោកពីបណ្តា Top Influencers ជាច្រើននាក់។ ជាក់ស្តែងកូនក្រមុំដ៏ស្រស់សោភារបស់លោកទាក់ទាញចំណាប់អារម្មណ៍អ្នកលេងជាច្រើននាក់នៅលើប្រព័ន្ធអ៊ីនធឺណែត ចង់ដឹងថានារីរូបស្អាតនេះជានរណាទើបអាចចងចិត្តកំពូល Gamer M.Megamind ដែលមិនធម្មតាក៏ដូចជាធម្មតារបស់យើងបាន? ត្រឹមមួយប៉ព្រិចភ្នែកគ្រប់គ្នាអាចទទួលដឹងពត៌មានបានយ៉ាងឆាប់រហ័សដោយមានការចែករំលែកបន្តគ្នាយ៉ាងច្រើនជាពិសេសការ Mention ជូនពរដល់គូស្នេហ៍ថ្មីថ្មោងរបស់យើងតែម្តង។ មនុស្សស្រីដែលលោក M.Megamind រកឃើញជាគូអនាគតហើយមានឈ្មោះក្រៅហៅថា Marcy និងមានឈ្មោះពិតថា Thyda Chan ។ 

គួរបញ្ជាក់ផងដែរនៅក្នុងថ្ងៃពិសេសរបស់លោកនេះមានការចូលរួមពី Top influencers ជាច្រើននាក់ដែលមានដូចជាលោក Vlogger Ravenblaze និងគូស្នេហ៍របស់លោកកញ្ញា Yaya, លោក Seak, លោក LayBunleng និងដៃគូរបស់លោកកញ្ញា Deborah Sann លោកឆេងសុភក្រ័ហៅពូជ្រួញ រួមទាំងក្រុមហ្គេមម័រដែលមានដូចជាលោក LyVisss និងលោក Noobie GMK ជាដើម។ មិនតែប៉ុណ្ណោះទទួលបានពត៌មានមកថាពិធីរៀបអាពាហ៍ពិពាហ៍របស់លោក M.Megamind ពិតជាមានភ្ញៀវអញ្ជើញចូលរួមច្រើនកុះករលើសការរំពឹងទុកទៅទៀតរហូតធ្វើអោយកូនកំលោះចេញមុខសុំទោសដែលខ្វះតុអោយភ្ញៀវទៅហើយ។ ថ្វីបើកូនកំលោះមុខស្មើតែងតែឆ្លើយជាប្រចាំថាមានអារម្មណ៍ធម្មតាសំរាប់ថ្ងៃពិសេសរបស់លោក តែកូនក្រមុំក៏លេងអោយអៀនជាច្រើនដងដោយខ្សែភ្នែកគឃ្លើន ទើបទាយមិនយ៉ាប់ថាកូនកំលោះចាញ់មន្តស្នេហ៍នារីក្លាហានរបស់យើងម្នាក់នេះហើយ។