នាឡិកាឆ្លាតវៃចុងក្រោយបំផុតរបស់ Samsung គឺ Galaxy Watch 4 ដំណើរការប្រព័ន្ធប្រតិបត្តិការថ្មីដែលបង្កើតឡើងដោយ Google។ ប៉ុន្តែទោះបីជាមានការសន្យានៃការរួមបញ្ចូល Google កាន់តែប្រសើរក៏ដោយ វាមិនគាំទ្រ Google Assistant នៅពេលវាចាប់ផ្តើមដំណើរការនោះទេ។ វានឹងផ្លាស់ប្តូរក្នុងពេលឆាប់ៗនេះ៖ អ្នកនឹងអាចបោះបង់ចោល Bixby និងប្រើប្រាស់ Google Assistant នៅក្នុង "ខែខាងមុខនេះ" នេះបើយោងតាមព័ត៌មានពី Samsung មុនពេលព្រឹត្តិការណ៍ Unpacked បន្ទាប់របស់ខ្លួន ដែលទំនងជាផ្តោតលើទូរស័ព្ទ។
នាឡិកា 4 កំពុងទទួលបានការអាប់ដេតផ្នែកទន់ទាក់ទងនឹងសុខភាពផ្សេងទៀតនៅថ្ងៃទី 9 ខែកុម្ភៈ។ ចំលែក និងគួរឱ្យចាប់អារម្មណ៍បំផុតគឺការបង្វឹកការគេង ដែល Samsung និយាយថានឹងសិក្សាពីគំរូនៃការគេងរបស់អ្នករយៈពេលមួយសប្តាហ៍ ហើយបន្ទាប់មកកំណត់ឱ្យអ្នកនូវ "សត្វដេក" ដែលត្រូវនឹង ប្រភេទនៃការគេងផ្ទាល់ខ្លួន។
សត្វទាំងនោះរួមមានៈ សត្វតោដែលមិនចេះខ្វល់ខ្វាយ, Hedgehog ដែលឆេវឆាវ, ភេនឃ្វីនដែលភ័យខ្លាច, សត្វ Mole ដែលមិនចូលចិត្តពន្លឺថ្ងៃ, សត្វក្តាន់ដែលមានការប្រុងប្រយ័ត្ន, តោសមុទ្រដែលរួសរាយ, ក្រពាដែលកំពុងប្រមាញ់, និងសត្វឆ្លាមដែលហត់នឿយ។
វាមិនច្បាស់ថាប្រភេទសត្វទាំងនោះមានន័យយ៉ាងណាទេ ហើយថាតើការបង្វឹករបស់ Samsung នឹងបន្តចាត់តាំងសត្វដេកថ្មីដែរឬទេ ប្រសិនបើលំនាំនៃការគេងរបស់អ្នកផ្លាស់ប្តូរ។ ប៉ុន្តែ Samsung និយាយថា មុខងារបណ្តុះបណ្តាលការគេងនឹងរួមបញ្ចូលការបំពេញការស្ទង់មតិចំនួនពីរ រួមជាមួយនឹងទិន្នន័យនៃការគេងដែលបានកត់ត្រា បន្ទាប់មកវានឹងចាប់ផ្តើម “កម្មវិធីបង្វឹករយៈពេល 4 ទៅ 5 សប្តាហ៍ ដែលរួមមានបេសកកម្ម បញ្ជីត្រួតពិនិត្យ អត្ថបទទាក់ទងនឹងការគេង ការណែនាំអំពីសមាធិ និងរបាយការណ៍ទៀងទាត់ ដើម្បីជាជំនួយដល់អ្នកប្រើប្រាស់ ខណៈដែលពួកគេធ្វើការឆ្ពោះទៅរកការកែលម្អគុណភាពនៃការគេងរបស់ពួកគេ”។
ដៃគូប្រកួតប្រជែងដូចជា Fitbit (ជាផ្នែកមួយនៃ Google) និង Oura ring បានដាក់ការសង្កត់ធ្ងន់យ៉ាងខ្លាំងលើគុណភាពនៃការគេង និងការបណ្តុះបណ្តាលសុខភាព។ Apple Watch ធ្វើការកត់ត្រាការគេងជាមូលដ្ឋាន ប៉ុន្តែនៅតែមិនគណនាពិន្ទុនៃការគេង ឬវាយតម្លៃគុណភាពនៃការគេងទាល់តែសោះ។
ការអាប់ដេត Watch 4 ក៏បន្ថែមការយល់ដឹងអំពីការវិភាគសមាសភាពរាងកាយផងដែរ ដោយប្រើកម្មវិធីភាគីទីបី Centr ដែលជាសេវាកម្មសុខភាពផ្អែកលើការជាវដែលបង្កើតឡើងដោយ Chris Hemsworth ។ Samsung និយាយថា ការយល់ដឹងបន្ថែមគឺមិនគិតថ្លៃទេ ប៉ុន្តែការណែនាំកាន់តែស៊ីជម្រៅតាមរយៈកម្មវិធីជាវដាច់ដោយឡែកមានតម្លៃបន្ថែម។ ឧបករណ៏វិភាគរាងកាយរបស់ Samsung ដែលប្រើ bioimpedance អគ្គិសនី ព្យាយាមតាមដានកម្រិតជាតិខ្លាញ់នៅលើកដៃ ប៉ុន្តែលទ្ធផលមានការភាន់ច្រលំក្នុងការបកស្រាយ នៅពេលដែលនាឡិកានេះត្រូវបានដាក់ឱ្យដំណើរការជាលើកដំបូងកាលពីឆ្នាំមុន។
ការអាប់ដេតកម្មវិធីថ្មីក៏នឹងបន្ថែមមុខនាឡិកាពណ៌ថ្មីផងដែរ ដែលនឹងផ្គូផ្គងខ្សែនាឡិកាបន្ថែមដែលនឹងមកដល់ក្នុងពេលឆាប់ៗនេះផងដែរ៕
អត្ថបទដកស្រង់ពី Scott Stein
បកប្រែនិងកែសម្រួលដោយ Mr. Blue