កាលពីពេលថ្មីៗនេះ លោកជីដេវីតបានគ្រោងនឹងបញ្ចេញ Teaser បទថ្មីមួយទៀត ដែលមានចំណងជើងថា«Hype ម្ល៉េះនាង!» បន្ទាប់ពីបទ«គាំងចិត្ត» របស់លោកទទួលបាន១លាន Views តាមការសន្យា និងក្រោយការចេញផ្សាយត្រឹមតែរយៈពេលជាងមួយសប្តាហ៍ប៉ុណ្ណោះ។ ដោយលោកជីដេវីតបានសរសេរឡើងអមជាមួយនឹងរូបភាព Poster នៃបទចម្រៀងឡើងថា «បន្ទាប់ពីមានការជ្រុលមាត់ថាបទ គាំងចិត្ត បាន១លានViews នឹងមានការជូនកាដូ M/V ថ្មី បានធ្វើអោយហ្វេនខ្ញុំ Stream ម្សិលមិញមួយថ្ងៃ 100K បានធ្វើអោយខ្ញុំមានការគាំងជាខ្លាំង តែយ៉ាងណាសន្យាគឺជាពាក្យសន្យាមិនអាចចាញ់ចិត្តទេ»។ 

គួរអោយចាប់អារម្មណ៍ផងដែរ នៅក្នុងរូបភាពនៃ Cover Poster មួយនោះ បានបង្ហាញឡើងជាមួយនឹងលោកជីដេវីតអង្គុយលើកៅអីមួយហ៊ុំព័ទ្ធជំុវិញដោយតុក្កតា Bearbrick ជាច្រើន។ គួរបញ្ជាក់ផងដែរថា​​​តុក្កតា Bearbrick គឺជាតុក្កតាដែលថ្លៃមួយផលិតឡើងដោយក្រុមហ៊ុន MediCom Toy នៃប្រទេសជប៉ុន។ យ៉ាងណាមិញ គួរអោយកត់សម្គាល់ផងដែរថា តុក្កតា Bearbrick នេះក៏ធ្លាប់ជានិម្មិតរូបស្ទាយល៍មួយរបស់លោកវណ្ណដាផងដែរ។ ម្យ៉ាងវិញទៀត Official Teaser បទចម្រៀងនេះផងដែរ ត្រូវបានលោកជីដេវីតបញ្ជាក់ឡើងថា នឹងត្រូវ Drop នៅក្នុងថ្ងៃទី៣១​​​​​​ ខែមករានេះហើយ។ ចង់ដឹងថាបទនេះមានរសជាតិខុសប្លែកពីបទ«គាំងចិត្ត» របស់លោកយ៉ាងណា តោះ!ទស្សនិកជនកុំភ្លេចរង់ចាំទស្សនានៅល្ងាចនេះទាំងអស់គ្នា!