ខណៈដែលនៅក្នុងរង្វង់សិល្បៈ Hip Hop ថ្មីៗនេះ លោកវណ្ណដាទើបតែប្រកាសពីការបើកទំព័រថ្មី Chapter 2 និងធ្វើការលុបចោល Content ចាស់ៗទាំងអស់នៅលើគណនី Facebook និង Instagram របស់លោកយ៉ាងគួរអោយចាប់អារម្មណ៍ហើយនោះ លោកជីដេវីតឯណោះវិញកំពុងតែចាប់ផ្តើមប្រកាសពីការធ្វើការប្រគំតន្រ្តីថ្មី PS2xវជាលើកទី២របស់លោកដូចគ្នា។
ក្នុងនាមជាទូតសុឆន្ទៈនៃស្របៀ Dragon របស់ក្រុមហ៊ុនវឌ្ឍនៈ លោកជីដេវីតបានត្រលប់មកសាជាថ្មីជាមួយនឹងការប្រគំតន្រ្តីលើកទី២របស់ខ្លួនដែលហៅថា PS2xវ រឺម្យ៉ាងទៀតថា Passion2theskyx វឌ្ឍនៈ ដែលធ្វើឡើងកាលពីលើកដំបូងនៅថ្ងៃទី១ ខែមករាកន្លងទៅនេះដើម្បីអបអរអាល់ប៊ុមថ្មី Passion2TheSkyរបស់លោក។ គួររំលឹកផងដែរថា នៅក្នុងព្រឹត្តិការណ៍នោះដែរ លោកជីដេវីតបានភ្ជាប់ជាមួយនឹងការចេញផ្សាយបទថ្មីរបស់លោកពីរបទគួរអោយកត់សម្គាល់គឺ«ជំហានជ័យ» និង«Lifetale»។
យ៉ាងណាមិញផងដែរ កាលពីថ្ងៃសៅរ៍ទី២២ ខែកក្កដាកន្លងទៅនេះ លោកជីដេវីតទើបតែបានភ្ជាប់ឡើងនូវការបង្ហោះ Audio Clip ចម្រៀងមួយដែលគួរអោយចាប់អារម្មណ៍ ជាមួយនឹងខេបសិនបង្ហាញឡើងថាលោកនឹងធ្វើការប្រគំតន្រ្តី PS2xវ នៅថ្ងៃទី១២ ខែសីហាខាងមុខនេះ។
ទស្សនិកជាច្រើនក៏មានសេចក្តីរំពឹងឡើងថា បទចម្រៀងពេញលេញថ្មីមួយបទនេះរបស់លោកជីដេវីតនឹងត្រូវលើកទៅសម្តែងផ្ទាល់នៅក្នុងការប្រគំតន្រ្តីមួយនេះហើយ។ គួររំលឹកផងដែរថា កាលពីថ្ងៃទី១៥ ខែកក្កដាកន្លងទៅនេះ លោកជីដេវីតក៏ទើបតែបានបញ្ចេញ Surprise Performance មួយសំរាប់បទថ្មីរបស់លោកផងដែរនៅក្នុងកម្មវិធី Fan Meeting“Meet&Greet” ដែលបទចម្រៀងមួយនេះក៏ត្រូវបាន Highlight ខ្លះៗជាមុននៅលើ Tik Tok។ ចុះទស្សនិកជនយល់ឃើញយ៉ាងណាដែរសំរាប់ការប្រគំតន្រ្តីនាពេលខាងមុខនេះ?