បទចំរៀងថ្មីរបស់លោកជីដេវីតរួមគ្នាជាលើកដំបូងជាមួយនឹងតារារ៉េបស្រីថៃកញ្ញា Jannine Weigel កំពុងតែស្ថិតនៅលេខរៀងទី៥លើតារាងបទចំរៀងទទួលបានការចូលទស្សនាច្រើនជាងគេបង្អស់នៅលើយូធូបប្រទេសកម្ពុជានៅក្នុងថ្ងៃទី១៤ ខែវិច្ឆិកា ឆ្នាំ២០២២។ គួរបញ្ជាក់ផងដែរបទចំរៀងមួយនេះមានចំណងជើងថា ”Mamacita” ដែលមានចង្វាក់ភ្លេងបែបតន្រ្តី Latin នៃប្រទេសអេស្ប៉ាញមែនទែន ម្យ៉ាងវិញទៀតផងដែរទាំងចំណងជើងបទចំរៀងក៏ដូចជាពាក្យពេចន៍ប្រើប្រាស់មួយចំនួននៅក្នុងបទចំរៀងដូចជាពាក្យ Senorita ដែលមានអត្ថន័យថាកញ្ញាក៏ជាពាក្យមកពីភាសាអេស្ប៉ាញផងដែរ។
បទ”Mamacita”មួយនេះត្រូវបានចេញផ្សាយឡើងនៅក្នុងថ្ងៃទី៥ ខែ១១នៅលើឆាណែលយូធូបផ្លូវការរបស់លោកជីដេវីត DIT WAY និងនៅលើផេកហ្វេសប៊ុក G-Devithរបស់លោក និងត្រូវបានកញ្ញា Jannine Weigel ធ្វើការចែករំលែកបន្តនៅលើហ្វេសប៊ុកផេករបស់នាង។ សង្កេតឃើញថានៅលើបទចំរៀងមួយនេះ កញ្ញា Jannine Weigel ទទួលបានការគាំទ្របន្ថែមទៀតពីអ្នកគាំទ្ររបស់នាងនៅក្នុងប្រទេសកម្ពុជា ថ្វីបើបទចំរៀងមួយនេះកញ្ញាត្រឹមរួមសហការច្រៀងនៅលើប៉ារ៉ូលរ៉េបប៉ុណ្ណោះ។ ត្រឹមរយៈពេល៣ថ្ងៃបន្ទាប់ពីការចេញផ្សាយបទចំរៀង ”Mamacita” បទចំរៀងមួយនេះផងដែរក៏លោតឡើងដល់លេខរៀងទី៣នៅលើតារាងបទល្បីនៅកម្ពុជាទាំង៥០ក្នុងកម្មវិធី Pleng by Smart ដោយមានបទ 007 និង How about now?ឈរនៅលើលំដាប់លើ។
ជាងនេះទៅទៀតកត់សម្គាល់ឃើញថាកាលពីថ្ងៃទី១៣ ខែវិច្ឆិកាកន្លងទៅនេះនៅលើផេក Pleng របស់ Smart ទើបតែបញ្ចេញបទចំរៀងអន្តរជាតិល្បីនៅកម្ពុជាទាំង៥០ក្នុង Pleng ដោយក្នុងនោះបទចំរៀងរបស់កញ្ញា Jannine Weigel ដែលមានចំណងជើងថា Passcode ត្រូវបានចេញផ្សាយកាលពីឆ្នាំ២០២០ ដោយផលិតកម្មលំដាប់ថ្នាក់ពិភពលោក RedRecords របស់កញ្ញាពីមុនទទួលបានចំណាត់ថ្នាក់លេខ១ផងដែរនៅក្នុងពេលថ្មីៗនេះ។