កាលពីថ្ងៃទី១៥ ខែកក្កដាកន្លងទៅនេះ លោកជីដេវីតបានធ្វើការបកស្រាយយ៉ាងគួរអោយចាប់អារម្មណ៍មួយទៅនឹងសំណួរដែលអ្នកគាំទ្ររបស់លោកម្នាក់បានសួរឡើងនៅក្នុងកម្មវិធី Fan Meeting ដោយមានបណ្តាអ្នកលេងបណ្តាញសង្គមជាច្រើនបានចែករំលែកបន្តសំរង់ពាក្យសំដីរបស់លោកតាមរយៈវិដេអូ។
កត់សម្គាល់ឃើញថានៅក្នុងខណៈពេល Q&A Time របស់លោកនៃកម្មវិធីមួយនោះ អ្នកគាំទ្ររបស់លោកម្នាក់បានសាកសួរឡើងថា «តើលោកជីដេវីតធ្វើយ៉ាងដូចម្តេចទើបអាចរក្សាប្រជាប្រិយភាពរបស់ខ្លួនឯងបានមកទល់ពេលនេះស្របពេលដែលសព្វថ្ងៃកំពុងជួបតារាចម្រៀងរ៉េបដែលខ្លាំង?»។
លោកជីដេវីតក៏បានឆ្លើយតបយ៉ាងដូច្នេះថា«បើតាមបទពិសោធន៍របស់ខ្ញុំ ខ្ញុំមិនផ្តោតសំខាន់លើការប្រកួតប្រជែងនោះទេ បើសិនជាមានសត្រូវ ខ្ញុំមិនចាត់ទុកអ្នកនោះជាសត្រូវ១០០%នោះទេ ព្រោះខ្ញុំគិតថាបើសិនជាខ្ញុំអោយនាមគេជាសត្រូវ១០០% នោះបើសិនជាមានឳកាស ខ្ញុំនឹងសំលាប់គេចោលភ្លាម ប៉ុន្តែខ្ញុំគិតបែបនេះវិញ ចាត់ទុកជាសត្រូវ២០ ចាត់ទុកជាមិត្តភក្តិ ៨០។
ព្រោះខ្ញុំគិតថាបើសិនជាមានសត្រូវក្បែរខ្លួន យើងនឹងចាំតែរកឳកាសសំលាប់គ្នាទេ តែបើសិនជាមានមិត្តភក្តិក្បែរខ្លួន បើទោះបីជាថ្ងៃណាមួយមិត្តភក្តិហ៊ានលួចចាក់យើងពីក្រោយខ្នង រឺដើរចេញពីយើង ខ្ញុំជឿជាក់ថាយើងនឹងមិនអាចសំលាប់មិត្តភក្តិបានទេ ត្រឹមតែយ៉ាងច្រើននិយាយថាមិនចាំបាច់ស្គាល់គ្នាប៉ុណ្ណោះ ដូចនេះគេមានឳកាសរស់បន្តទៀត»។
ម្យ៉ាងទៀតលោកបានបន្តទៀតថា«ផែនដីមូលយើងអាចជួបគ្នានៅថ្ងៃណាមួយ ប៉ុន្តែត្រូវដឹងថា បើសិនជាយើងចង់មើលឃើញគេអោយធំ យើងកុំមើលគេក្នុងផ្លូវអវិជ្ជមានច្រើនពេក ព្រោះបើមើលគេក្នុងផ្លូវអវិជ្ជមាន គេធ្វើអី្វក៏ចាំតែខុសដែរ»។ ចុះទស្សនិកជនយល់ឃើញយ៉ាងណាដែរអំពីការលាតត្រដាងចំណាប់អារម្មណ៍របស់លោកជីដេវីតបែបនេះ?
