កាលពីរាត្រីថ្ងៃសៅរ៍ទី២៦ ខែវិច្ឆិកាកន្លងទៅនេះ ស្រាបៀវឌ្ឍនៈបានធ្វើការប្រគំតន្រ្តីដ៏ធំគគ្រឹកគគ្រេងអស្ចារ្យមួយដើម្បីអបអរពិធីដំណាច់ឆ្នាំដែលមានឈ្មោះហៅថា "Vattanak  All in Festival" នៅក្នុងបរិវេណនៃអគារ OCIC ជ្រោយចង្វារ។ ព្រឹត្តិការណ៍ដ៏ធំអស្ចារ្យនេះបានប្រមូលផ្តុំដោយកំពូលសិល្បករល្បីៗជាច្រើននៅក្នុងប្រទេសកម្ពុជាដែលមានដូចជា លោកជីដេវីត អ្នកនាងមាសសុខសោភា កញ្ញាតី កញ្ញារ៉ាប៊ី លោកពូឃ្លាំង លោកនីកូ DJ Avida រួមទាំងTop4របស់ Cambodian Idol ក៏ដូចជាវត្តមានពីសិល្បករអន្តរជាតិដ៏ល្បីកញ្ញា CLផងដែរ។ ជាក់ស្តែងសង្កេតឃើញថាមិនថាជាអ្នកគាំទ្ររបស់ CL រឺសិល្បកររបស់យើងនោះទេសុទ្ធតែបង្ហាញការស្រលាញ់ និងគាំទ្រយ៉ាងខ្លាំងក្លាមកកាន់កញ្ញា CL ដែលមានវត្តមានចូលរួមនៅក្នុងការប្រគំតន្រ្តីខនសឺតមួយនេះ។ 

ទិដ្ឋភាពកាន់តែសាងភាពប្លែកអារម្មណ៍នៅពេលមានភ្លៀងធ្លាក់កំឡុងពេលសម្តែង សង្កេតឃើញថាមិនថាជាមេឃធ្លាក់គ្រាំៗយ៉ាងជោគជាំណាអ្នកគាំទ្ររបស់ CLនៅតែបន្តទស្សនាការសម្តែង និងរាំយ៉ាងសប្បាយរីករាយនៅក្នុងសាលនៃខនសឺត។ គួរអោយចាប់អារម្មណ៍ផងដែរ ឃើញថានៅក្នុងពេលសម្តែងរបស់ CL ផ្ទាល់ លោកជីដេវីតដែលជាសិល្បករមួយរូបក៏បានចុះមកក្រោមឆាកដើម្បីទស្សនាការសម្តែងរបស់នាងជាមួយនឹងអ្នកគាំទ្រឯទៀតផងដែរ ព្រមទាំងបានបង្ហាញក្បាច់រាំយ៉ាងមួយអស់ដៃថែមទៀតដោយមិនលាក់លាមនោះទេដើម្បីបង្ហាញការគាំទ្រយ៉ាងពេញទំហឹងក្នុងនាមជាហ្វេនម្នាក់។ គួរបញ្ជាក់ផងដែរ រំលឹកទៅពេលប៉ុន្មានឆ្នាំមុនអ្នកនាងទេពបូព្រឹក្សធ្លាប់បានបង្ហាញការស្លៀកពាក់យកស្ទាយល៍តាមកញ្ញា CL ដែលជាអាយដលរបស់នាងនោះបង្ហាញថាអ្នកនាងជាអ្នកគាំទ្រយ៉ាងមុតមាំរបស់ CL ម្នាក់។ ដូចនេះការគាំទ្រយ៉ាងពុះពោររបស់លោកជីដេវីតហាក់ដូចជាការគាំទ្រយ៉ាងខ្លាំងក្លាជំនួសគូស្នេហ៍របស់លោកផងដែរ។