ស្របពេលដែលសិស្សានុសិស្សជាច្រើនកំពុងមានការព្រួយបារម្ភចំពោះការប្រលងបាក់ឌុបរបស់ពួកគេ លោកជីដេវីតក៏បានចេញសារវិដេអួជូនពរផ្ញើទៅកាន់ពួកគេដើម្បីផ្តល់ជាកំលាំងចិត្តសំរាប់ប្អូនៗដែលនឹងត្រូវប្រលងនៅក្នុងថ្ងៃទី០៥ និងទី០៦ ខែវិច្ឆិកានេះ។ លោកជីដេវីតបានបង្ហាញចំណាប់អារម្មណ៍ថាការប្រលងមួយនេះវាសំខាន់សំរាប់ប្អូនៗណាស់ ព្រោះពួកគេបានឆ្លងកាត់ផ្លូវដើរមកយ៉ាងឆ្ងាយ ហើយបើការប្រលងយ៉ាងម៉េចយ៉ាងម៉ាគឺអាស្រ័យលើការសន្សំវិជ្ជា និងការប្រឹងប្រែងរបស់ប្អូនៗទាំងអស់គ្នា។ ម្យ៉ាងវិញទៀតការប្រលងមួយនេះក៏អាចកំណត់អោយពួកគេបន្តដំណើរឆ្លងកាត់ទៅរកការសិក្សាបាននៅថ្នាក់មហាវិទ្យាល័យផងដែរ។ 

ជាចុងក្រោយលោកជីដេវីតក៏បានផ្តាំផ្ញើសារថាលោកនឹងមានគំរោងធ្វើប្រូជេកមួយដែលអាចជួយឧបត្ថម្ភដល់ប្អូនៗខ្វះខាតថវិការៀនបន្តផងដែរ ហើយលោកសង្ឃឹមថាគំរោងមួយនេះនឹងអាចធ្វើជាគ្រឿងលើកទឹកចិត្តដល់ប្អូនៗដែលប្រឹងប្រែងរៀនសូត្រ។ គួរបញ្ជាក់ផងដែរសំរាប់ការប្រលងបាក់ឌុបឆ្នាំ២០២២នេះចំនួនបេក្ខជនប្រលងសរុបមានរហូតទៅដល់១២៨ ១៣៤​​​នាក់ដោយក្នុងនោះមានសិស្សថ្នាក់វិទ្យាសាស្រ្តប្រមាណ៤២៩៣៣នាក់ និងសិស្សថ្នាក់វិទ្យាសាស្រ្តសង្គមប្រមាណ៨៥២០១នាក់។ ចំណែកមុខវិជ្ជាប្រលងមានទាំងអស់៧មុខវិជ្ជាស្មើគ្នាដោយក្នុងនោះមាន៤មុខវិជ្ជាដូចគ្នារួមមានគណិតវិទ្យា អក្សរសាស្រ្តខ្មែរ ប្រវត្តិវិទ្យា និងភាសាបរទេស រីឯ៣មុខវិជ្ជាទៀតខុសគ្នាគឺសំរាប់ថ្នាក់វិទ្យាសាស្រ្តមានជីវវិទ្យា គីមីវិទ្យា និងរូបវិទ្យា និងសំរាប់ថ្នាក់វិទ្យាសាស្រ្តសង្គមមានផែនដី និងបរិស្ថានវិទ្យា ភូមិវិទ្យា និងសីលធម៌ពលរដ្ឋវិជ្ជា។