កាលពីថ្ងៃទី២១ ខែមេសាកន្លងទៅនេះ Top សហគមន៍របស់យើង លោកជីដេវីតបានធ្វើការទំលាក់បទចម្រៀងថ្មីរបស់លោកក្រោមចំណងជើងថា«មេតូច» នៅលើបណ្តាប្រព័ន្ធផ្សព្វផ្សាយសង្គមផ្សេងៗ។ គួររំលឹកផងដែរថាកាលពីយប់មុនពេលចេញផ្សាយបទចម្រៀងនេះបន្តិច លោកជីដេវីតបានធ្វើការចែករំលែក Teaser នៃបទចម្រៀងនេះជាមួយនឹងខេបសិនស៊កសៀតនៅលើហ្វេសប៊ុកផេករបស់លោកឡើងថា«តោះកុំភ្លេចបើកបេសកកម្មស្វែករក Loops ជុំគ្នាល្ងាចនេះ» ដោយកាលពីពេលថ្មីៗលោកជីដេវីតកំពុងតែជួបរឿងក្តីសៅហ្មងទាក់ទងនឹងការប្តឹងផ្តល់ Loops ចំរៀងរបស់លោក«ចុម!អាអូនអត់ដេក»។ យ៉ាងណាមិញផងដែរ បទ«មេតូច» របស់លោកជីដេវីតនេះ ខុសពីការរំពឹងទុករបស់ទស្សនិកជនដែលសង្ឃឹមថាលោកជីដេវីតនឹងចេញបទ Disstrack ចំរៀងថ្មីមកកាន់មហាជនទស្សនាហើយ តែវាត្រឹមជាបទដោយក្តីស្រលាញ់ដ៏កក់ក្តៅដែលលោកបានតាក់តែងឡើងសំរាប់កូនប្រុសតូចរបស់លោកតែប៉ុណ្ណោះ។ គួរអោយចាប់អារម្មណ៍ផងដែរថា បទ«មេតូច» នេះក៏ជាបទទី២ហើយដែលលោកជីដេវីតបានតាក់តែងឡើងទាក់ទងនឹងកូនប្រុសរបស់លោក បន្ទាប់ពីបទ«ចុម!អាអូនអត់ដេក»។ ថ្វីបើយើងមិនដឹងពីចេតនាពិតប្រាកដរបស់លោកជីដេវីត ប៉ុន្តែទំនងជាលោកជីដេវីតមានបំណងតាក់តែងបទចម្រៀងជាច្រើនសំរាប់កូនប្រុសរបស់លោក ហើយកាលពីពេលចេញផ្សាយចំរៀង Disstrack នោះ លោកក៏បានកែច្នៃបទចំរៀង«ចុម!អាអូនអត់ដេក» នោះទៅជាចំរៀង Disstrack វិញ។ ចុះទស្សនិកជនយល់ឃើញយ៉ាងណាដែរ?
