សេតវិមានបាននិយាយថា ច្បាប់ថ្មីមួយនៅរដ្ឋផ្លរីដា ដែលនឹងហាមឃាត់ពីការពិភាក្សាអំពីទំនោរផ្លូវភេទនៅក្នុងសាលាបឋមសិក្សាគឺ "ត្រូវបានរចនាឡើងដើម្បីវាយប្រហារ" សិស្សដែលស្រលាញ់ភេទដូចគ្នា។ អភិបាលរដ្ឋ Ron DeSantis បានបង្ហាញពីការគាំទ្ររបស់គាត់ចំពោះវិធានការនេះ ហើយវាហាក់ដូចជាមានការគាំទ្រគ្រប់គ្រាន់ដើម្បីឆ្លងកាត់សភា ដែលដឹកនាំដោយគណបក្សសាធារណរដ្ឋរបស់រដ្ឋ។ សកម្មជន បានដាក់ឈ្មោះវានេះថាជាច្បាប់ "កុំនិយាយ ថាខ្ទើយ" ឬ "Don't Say Gay" ហើយព្រមានថាវានឹងមាក់ងាយ អ្នកស្រឡាញ់ ភេទដូចគ្នា និងបញ្ហាផ្សេងៗ។ ប៉ុន្តែអ្នកគាំទ្ររបស់ខ្លួននិយាយថា ច្បាប់នេះស្ដីអំពីការការពារសិទ្ធិមាតាបិតា។ សំណើនេះត្រូវបានណែនាំនៅក្នុងសភាតំណាងរដ្ឋកាលពីខែមុន។ សំណើដូចគ្នាបានដាក់ទៅដល់ព្រឹទ្ធសភារដ្ឋកាលពីថ្ងៃអង្គារ។

នៅក្នុងសន្និសីទសារព័ត៌មានមួយ លេខាធិការសារព័ត៌មានសេតវិមាន លោក Jen Psaki បាននិយាយថា "ឪពុកម្តាយគ្រប់រូបសង្ឃឹមថា មេដឹកនាំរបស់យើងនឹងធានាសុវត្ថិភាព ការការពារ និងសេរីភាពរបស់កុមារ" ។ "ថ្ងៃនេះ អ្នកនយោបាយអភិរក្សនិយមនៅរដ្ឋផ្លរីដា បានច្រានចោលគុណតម្លៃជាមូលដ្ឋានទាំងនោះ ដោយការជំរុញច្បាប់ដែលត្រូវបានរចនាឡើងដើម្បីកំណត់គោលដៅ និងវាយប្រហារកុមារដែលត្រូវការការគាំទ្រខ្លាំងបំផុត"។

ច្បាប់របស់រដ្ឋដែលហាមប្រាម ឬរារាំងការពិភាក្សាអំពីជីវិតអ្នកស្រឡាញ់ភេទដូចគ្នានៅក្នុងថ្នាក់រៀន ដែលជួនកាលគេហៅថាជាច្បាប់ "គ្មានអ្នកស្រឡាញ់ភេទដូចគ្នា" មិនមែនជារឿងចម្លែកនោះទេ។ វាត្រូវបានណែនាំនៅក្នុងទសវត្សរ៍ឆ្នាំ 1970 និង 1980 ដែលជាប់ទាក់ទងគ្នាយ៉ាងជិតស្និទ្ធជាមួយនឹងសកម្មភាពប្រឆាំងនឹងសិទ្ធិស្រឡាញ់ភេទដូចគ្នានៅពេលនោះ ប៉ុន្តែត្រូវបានលុបចោលជាយូរមកហើយ។

បច្ចុប្បន្ននេះ រដ្ឋចំនួនបួនរបស់សហរដ្ឋអាមេរិក រួមមានរដ្ឋ Louisiana, រដ្ឋ Mississippi, រដ្ឋអូក្លាហូម៉ា និងរដ្ឋតិចសាស់ មានច្បាប់ដែលហាមឃាត់ ឬដាក់កម្រិតការអប់រំផ្លូវភេទចំពោះសកម្មភាពផ្លូវភេទ។ កាលពីឆ្នាំមុន រដ្ឋ Tennessee និង Montana បានអនុម័តច្បាប់ដែលអនុញ្ញាតឱ្យឪពុកម្តាយជ្រើសរើសកូនរបស់ពួកគេឲ្យចេញពីការពិភាក្សាអំពីនិន្នាការផ្លូវភេទ និងអត្តសញ្ញាណយេនឌ័រ។ ច្បាប់របស់រដ្ឋផ្លរីដាបានដំណើរការមួយជំហានបន្ថែមទៀត ដោយអនុញ្ញាតឱ្យឪពុកម្តាយប្តឹងដោយផ្ទាល់ទៅសាលាស្រុក និងទាមទារការខូចខាត ប្រសិនបើពួកគេជឿថា អ្នកអប់រំបានបំពានច្បាប់។ ទោះបីជាតាមទ្រឹស្តីការហាមប្រាមនឹងអនុវត្តយ៉ាងទូលំទូលាយចំពោះវគ្គសិក្សាអប់រំផ្លូវភេទនៅកម្រិតបឋមសិក្សាក៏ដោយ វាក៏អំពាវនាវឱ្យសាលាក្នុងស្រុកជៀសវាងប្រធានបទ មនុស្សស្រលាញភេទដូចគ្នា នៅពេលដែល "មិនសមស្របតាមអាយុ ឬសម្រាប់សិស្ស"។

ដោយបានបន្ទរលើអត្ថបទនៃច្បាប់នេះ អភិបាល DeSantis បាននិយាយថា សាលារៀនគួរតែជៀសវាងប្រធានបទ "មិនសមរម្យទាំងស្រុង" ហើយជំនួសឱ្យការបង្រៀនវិទ្យាសាស្ត្រ ប្រវត្តិសាស្ត្រ ពលរដ្ឋ និងមេរៀនផ្សេងៗទៀត។ ប៉ុន្តែអ្នកតស៊ូមតិអ្នកស្រឡាញ់ភេទដូចគ្នាបានព្រមានថា ច្បាប់នេះនឹងធ្វើឱ្យប៉ះពាល់ដល់សុខភាពផ្លូវចិត្តរបស់យុវជនស្រឡាញ់ភេទដូចគ្នា និងធ្វើឱ្យខូចដល់ការការពារដែលមានស្រាប់របស់ពួកគេ៕

អត្ថបទដកស្រង់ពី BBC
បកប្រែនិងកែសម្រួលដោយ Mr. Blue