យន្តហោះចម្បាំងអាមេរិកចំនួនពីរគ្រឿងបានហោះហើរកាត់លើប្រទេសបូស្នៀកាលពីថ្ងៃច័ន្ទក្នុងដំណើរបង្ហាញពីការគាំទ្រចំពោះអធិបតេយ្យភាពប្រទេសបាល់កង់មួយនេះដែលប្រឈមមុខនឹងការកើនឡើងនៃក្រុមបំបែកខ្លួនស៊ែបកាន់តែខ្លាំងឡើងដែលដឹកនាំដោយមេដឹកនាំគាំទ្ររុស្ស៊ីគឺលោក Milorad Dodik។ មន្ត្រីស៊ុយអែតបានជំរុញឱ្យពលរដ្ឋរបស់ប្រទេសនេះត្រៀមខ្លួនសម្រាប់សង្គ្រាមដែលអាចកើតឡើងនៅក្នុងខណៈពេលកំពុងមានការកើនឡើងនៃសង្គ្រាម។ កងទ័ពអ៊ីស្រាអែលបាននិយាយថាខ្លួនបានរកឃើញរោងចក្រផលិតសព្វាវុធ និងផ្លូវរូងក្រោមដីជាច្រើនដ៏ធំជាងគេបំផុតនៅកណ្តាលតំបន់ហ្គាហ្សាដែលក្រុមហាម៉ាសប្រើប្រាស់ដើម្បីផលិតគ្រាប់រ៉ុក្កែតរយៈចម្ងាយឆ្ងាយ។

1. យន្តហោះ F-16 ហោះកាត់ Bosnia ខណៈអាមេរិកព្រមានក្រុមបំបែកខ្លួនស៊ែប

យោងតាមសារព័ត៌មាន The New Arab ចុះផ្សាយថ្ងៃទី០៩ ខែមករាបានអោយដឹងថា យន្តហោះចម្បាំងអាមេរិកចំនួនពីរគ្រឿងបានហោះហើរកាត់លើប្រទេសបូស្នៀកាលពីថ្ងៃច័ន្ទក្នុងដំណើរបង្ហាញពីការគាំទ្រចំពោះអធិបតេយ្យភាពប្រទេសបាល់កង់មួយនេះ ដែលប្រឈមមុខនឹងការកើនឡើងនៃក្រុមបំបែកខ្លួនស៊ែបកាន់តែខ្លាំងឡើង ដែលដឹកនាំដោយមេដឹកនាំគាំទ្ររុស្ស៊ីគឺលោក Milorad Dodik។

យន្តហោះចម្បាំង F-16 Fighting Falcons របស់កងទ័ពអាកាសសហរដ្ឋអាមេរិកបានហោះហើរឡើងដោយជាផ្នែកមួយនៃការហ្វឹកហាត់រួមគ្នាពីអាកាសមកដីរបស់កងកម្លាំងអាមេរិក និងកងកម្លាំងបូស្នៀ។

យោងតាមសេចក្តីថ្លែងការណ៍របស់ស្ថានទូតអាមេរិកប្រចាំទីក្រុង Sarajevo បានឱ្យដឹងថា ការហោះហើរនេះបានធ្វើឡើងនៅក្នុងតំបន់នៃភាគខាងកើតនៃទីក្រុង Tuzla និងភាគខាងជើងទីក្រុង Brcko ។

ស្ថានទូត​ក៏​បាន​និយាយ​ដែរ​ថាសហរដ្ឋអាមេរិក​បាន​គូសបញ្ជាក់​ថា រដ្ឋធម្មនុញ្ញ​ប្រទេសបូស្នៀ​មិន​បានផ្តល់​សិទ្ធិ​ផ្តាច់ខ្លួននោះ​ឡើយ​។

អាមេរិក​បាន​ព្រមាន​ថា ខ្លួន​នឹង​ចាត់​វិធានការ​ប្រឆាំង​នឹង​ការ​ប៉ុនប៉ង​ធ្វើ​ក្រុមបំបែកខ្លួនទាំងអស់ក្នុង​ប្រទេស។

2. ស៊ុយអែតស្នើពលរដ្ឋត្រៀមខ្លួនប្រឈមមុខនឹងរុស្ស៊ី

យោងតាមសារព័ត៌មាន RBC-Ukraine ចុះផ្សាយថ្ងៃទី០៨ ខែមករាបានអោយដឹងថាមន្ត្រីស៊ុយអែតបានជំរុញឱ្យពលរដ្ឋរបស់ប្រទេសនេះត្រៀមខ្លួនសម្រាប់សង្គ្រាមដែលអាចកើតឡើងនៅក្នុងខណៈពេលកំពុងមានការកើនឡើងនៃសង្គ្រាម។

រដ្ឋមន្ត្រីការបរទេសស៊ុយអែតលោក Tobias Billstrom បាននិយាយថា សមាជិកភាពរ​​​បស់ស៊ុយអែតដែលត្រូវបានរំពឹងទុកនៅក្នុងអង្គការ NATO "គឺជាការផ្លាស់ប្តូរដ៏ធំបំផុតនៅក្នុងគោលនយោបាយសន្តិសុខស៊ុយអែតក្នុងរយៈពេលជាង 200 ឆ្នាំ"។

រដ្ឋមន្ត្រីការពារជាតិស៊ុយអែតលោក Pal Jonson បាននិយាយថា "សង្រ្គាមក៏អាចនឹងមករកយើងដែរ" ដោយអះអាងថាអ៊ុយក្រែនកំពុងដើរតួជា"ខែលការពាររបស់អឺរ៉ុប"ក្នុងជម្លោះជាមួយរុស្ស៊ីនេះ។

3. រោងចក្រមីស៊ីលហាម៉ាសស្ថិតនៅលើផ្លូវសំរាប់ជំនួយមនុស្សធម៌

យោងតាមសារព័ត៌មាន Reuters ចុះផ្សាយថ្ងៃទី០៩ ខែមករាបានអោយដឹងថា កងទ័ពអ៊ីស្រាអែលបាននិយាយថាខ្លួនបានរកឃើញរោងចក្រផលិតសព្វាវុធ និងផ្លូវរូងក្រោមដីជាច្រើនដ៏ធំជាងគេបំផុតនៅកណ្តាលតំបន់ហ្គាហ្សាដែលក្រុមហាម៉ាសប្រើប្រាស់ដើម្បីផលិតគ្រាប់រ៉ុក្កែតរយៈចម្ងាយឆ្ងាយ។

កងទ័ពអ៊ីស្រាអែល IDF ដែលកំពុងប្រតិបត្តិការនៅជំរុំ Bureij បានរកឃើញ"បន្ទាយក្រុមភេរវករ" មួយនេះ។

កាលពីថ្ងៃទី៨ ខែមករា យោធាអ៊ីស្រាអែលបាននាំយកអ្នកកាសែតមួយក្រុមទៅមើលទីតាំងមួយនេះ។

កងកម្លាំង IDF ដំបូងបាននាំអ្នកកាសែតទៅកាន់ឃ្លាំងផ្ទុកគ្រាប់រ៉ុក្កែតរយៈចម្ងាយឆ្ងាយដែលមានកាំជ្រួចមីស៊ីលមានចម្ងាយលើសពី 100 គីឡូម៉ែត្រឯណោះ។

នៅខាងក្នុងរូងក្រោមដីដែលចុះទៅប្រហែល 20 ម៉ែត្រ កងកម្លាំង IDF បានរកឃើញមន្ទីរពិសោធន៍គីមីដ៏ធំមួយដែលប្រើសម្រាប់ផលិតគ្រឿងផ្ទុះ និងម៉ាស៊ីនរ៉ុក្កែត។

យ៉ាងណាមិញផងដែរ មន្ត្រីអ៊ីស្រាអែលបាននិយាយថា ក្រុមហាម៉ាសមានចេតនាកំណត់ទីតាំងហេដ្ឋារចនាសម្ព័ន្ធយោធា រួមទាំងផ្លូវរូងក្រោមដីទាំងនេះនៅលើផ្លូវ Salah a-Din សម្រាប់ជំនួយមនុស្សធម៌ឆ្លងកាត់ ដែលនៅក្នុងតំបន់ស៊ីវិលដូច្នេះ គឺដើម្បីបង្កការលំបាកក្នុងការវាយប្រហារផងដែរ។