1. មនុស្សម្នាក់ស្លាប់ខណៈដ្រូនអ៊ីរ៉ង់វាយប្រហារររដ្ឋធានីអ៊ុយក្រែនមុនទិវានៃទីក្រុង Kiev
យោងតាមសារព័ត៌មាន The Times of Israel ចុះផ្សាយថ្ងៃទី២៨ ខែឧសភាបានអោយដឹងថា ក្រុមមន្ត្រីក្នុងតំបន់បាននិយាយថារដ្ឋធានីរបស់ប្រទេសអ៊ុយក្រែនត្រូវបានទទួលរងការវាយប្រហារដោយដ្រូនលក្ខណៈទ្រង់ទ្រាយធំបំផុតចាប់តាំងពីការចាប់ផ្តើមនៃសង្រ្គាមរបស់រុស្ស៊ី ខណៈដែលទីក្រុង Kyiv បានកំពុងរៀបចំដើម្បីប្រារព្ធខួបនៃការកកើតរបស់ខ្លួននៅថ្ងៃអាទិត្យនេះ។ យ៉ាងហោចណាស់មានមនុស្សម្នាក់ត្រូវបានស្លាប់នៅក្នុងការវាយប្រហារនេះ។ លោក Serhii Popko មន្ត្រីយោធាជាន់ខ្ពស់នៃទីក្រុង Kyiv បាននិយាយថា ប្រទេសរុស្ស៊ីបានចាប់ផ្តើម"ការវាយប្រហារដ៏ធំបំផុត" មកលើទីក្រុងកាលពីយប់ថ្ងៃសៅរ៍ជាមួយនឹងដ្រូន Shahed ផលិតឡើងដោយអ៊ីរ៉ង់។ ការវាយប្រហារនេះមានរយៈពេលជាងប្រាំម៉ោង ដោយប្រព័ន្ធការពារអាកាសអ៊ុយក្រែនត្រូវបានរាយការណ៍ថាបានបាញ់ទម្លាក់ដ្រូនទាំងនេះបានជាង ៤០ គ្រឿង។ កងកម្លាំងអាកាសរបស់អ៊ុយក្រែនបាននិយាយថាកាលពីយប់ថ្ងៃសៅរ៍ក៏ជាការបំបែកកំណត់ត្រាថ្មីទាក់ទងនឹងការវាយប្រហារដោយដ្រូន Shahed នៅទូទាំងប្រទេសផងដែរ។ ដោុយក្នុងចំណោមដ្រូនចំនួន៥៤គ្រឿងនោះ ក្នុងនោះមាន៥២គ្រឿងត្រូវបានបាញ់ទម្លាក់ដោយប្រព័ន្ធការពារដែនអាកាស។
2. Milley ព្រមានថាយន្តហោះ F-16 មិនមែនជាអាវុធទិព្វសំរាប់អ៊ុយក្រែននោះទេ
យោងតាមសារព័ត៌មាន POLITICO ចុះផ្សាយថ្ងៃទី២៥ ខែឧសភាបានអោយដឹងថា ឧត្តមសេនីយកំពូលរបស់យោធា Mark Milley បានព្រមានកាលពីថ្ងៃព្រហស្បតិ៍ថា យន្តហោះ F-16នឹងមិនដើរតួជា"អាវុធវេទមន្ត" សម្រាប់អ៊ុយក្រែននោះទេ ប៉ុន្តែសហរដ្ឋអាមេរិកគឺនៅតែបន្តជាអ្នកនៅពីក្រោយទាំងស្រុងនៃក្រុមសម្ព័ន្ធមិត្តណាតូដឹកនាំការហ្វឹកហ្វឺន និងការផ្ទេរយន្តហោះទាំងនេះទៅកាន់ទីក្រុងគៀវ។ លោកឧត្តមសេនីយកំពូលបាននិយាយថា “រុស្ស៊ីមានយន្តហោះចម្បាំងជំនាន់ទីបួនចំនួន 1,000គ្រឿង” ដូចនេះប្រសិនបើពិនិត្យមើលការវិភាគតំលៃនៃការចំណាយ វិធីឆ្លាតបំផុតដើម្បីទប់ទល់នឹងរុស្ស៊ីបាន គឺពួកគេចាំបាច់ត្រូវការផ្តល់អោយអ៊ុយក្រែននូវប្រព័ន្ធការពារដែនអាកាសរួមបញ្ចូលគ្នាមួយចំនួនក្នុងបរិមាណដែលសមមាត្រ។ លោកឧត្តមសេនីយកំពូលបាននិយាយថាយន្តហោះចម្បាំងមានតំលៃថ្លៃជាងកាំភ្លើងធំ និងរថក្រោះលើគោកទូទៅ ដែលជាការចាំបាច់ក្នុងការបញ្ចូនសព្វាវុធលើគោកទៅមុន ដើម្បីទ្រទ្រង់សង្គ្រាមរយៈពេលវែង ជាជាងការចំណាយលើយន្តហោះដែលមានតំលៃថ្លៃទៅមុន ដែលធ្វើអោយខាតបង់ថវិកាការពារជាតិ ហើយនេះក៏មិនបានបញ្ជាក់អោយឃើញថាយន្តហោះចម្បាំងទាំងនេះសុទ្ធសឹងជាអាវុធទិព្វអ្វីដែរ។ កាលពីថ្ងៃព្រហស្បតិ៍ផងដែរ រដ្ឋមន្ត្រីការពារជាតិលោក Lloyd Austin បានប្រកាសថា ដាណឺម៉ាក និងហូឡង់កំពុងដឹកនាំមុខនៅក្នុងសម្ព័ន្ធភាពរួមគ្នាដើម្បីបណ្តុះបណ្តាលអ្នកបើកយន្តហោះអ៊ុយក្រែននៅលើយន្តហោះចម្បាំងទំនើបទាំងនេះ។
3. អធិការបតីអាល្លឺម៉ង់ថានឹងនិយាយជាមួយពូទីនម្តងទៀតតាមពេលកំណត់
យោងតាមសារព័ត៌មាន POLITICO ចុះផ្សាយថ្ងៃទី២៦ ខែឧសភាបានអោយដឹងថាអធិការបតីអាល្លឺម៉ង់លោក Olaf Scholz បាននិយាយថាលោកមានឆន្ទៈក្នុងការចាប់ផ្តើមពិភាក្សាជាមួយសមភាគីរុស្ស៊ីលោក Vladimir Putin ម្តងទៀតដោយទំនាក់ទំនងរវាងមេដឹកនាំទាំងពីរស្ទើរតែមិនមាននៅពេលដែលវិមានក្រឹមឡាំងបន្តការវាយលុកលើអ៊ុយក្រែន។ លោក Scholz បាននិយាយនៅក្នុងបទសម្ភាសន៍ជាមួយសារព័ត៌មាន Kölner Stadt-Anzeiger ថា "ការហៅទូរស័ព្ទចុងក្រោយរបស់ខ្ញុំគឺតាំងពីមុនមក" ។ អធិការបតីបានបន្ថែមថា "ប៉ុន្តែខ្ញុំមានបំណងនិយាយជាមួយលោកពូទីនម្តងទៀតក្នុងពេលកំណត់ណាមួយ" ។ ការហៅទូរសព្ទចុងក្រោយរវាងមេដឹកនាំទាំងពីរបានធ្វើឡើងកាលពីខែធ្នូ នៅពេលដែលពួកគេបានយល់ព្រម "រក្សាទំនាក់ទំនង"នេះ។ លោក Scholz នៅពេលនោះបានអំពាវនាវឱ្យមានដំណោះស្រាយការទូតចំពោះសង្រ្គាម រួមទាំងការដកកងទ័ពរុស្ស៊ីចេញពីអ៊ុយក្រែន ខណៈដែលលោក ពូទីន បាននិយាយថា ការផ្គត់ផ្គង់អាវុធរបស់អាល្លឺម៉ង់ដល់ទីក្រុង Kyiv គឺជាការគាំទ្រការ "បំផ្លិចបំផ្លាញ" ហើយបានជំរុញឱ្យទីក្រុងប៊ែរឡាំងពិចារណាឡើងវិញនូវវិធីសាស្រ្តរបស់ខ្លួន។