រ៉ុក្កែតដែលបាញ់បង្ហោះដោយក្រុមហ៊ុនរុករកអវកាសរបស់ Elon Musk កំពុងតែធ្លាក់ចូលទៅក្នុងឋានព្រះច័ន្ទ ហើយផ្ទុះ។
Falcon 9 booster ត្រូវបានដាក់ឱ្យដំណើរការក្នុងឆ្នាំ 2015 ប៉ុន្តែបន្ទាប់ពីបញ្ចប់បេសកកម្មរបស់វា វាមិនមានឥន្ធនៈគ្រប់គ្រាន់ដើម្បីត្រឡប់ទៅផែនដីវិញទេ ហើយនៅវិលវល់នៅក្នុងលំហ។

តារាវិទូ Jonathan McDowell បានប្រាប់ BBC News ថាវានឹងក្លាយជាការបុករ៉ុក្កែតដែលមិនអាចគ្រប់គ្រងបានដំបូងគេជាមួយព្រះច័ន្ទ ប៉ុន្តែវានឹងមានផល ប៉ះពាល់ តិចតួចប៉ុណ្ណោះ។
រ៉ុក្កែតនេះត្រូវបានបោះបង់ចោលនៅក្នុងគន្លងខ្ពស់កាលពី ៧ឆ្នាំមុន បន្ទាប់ពីវាបានបញ្ចប់បេសកកម្មដើម្បីបញ្ជូនផ្កាយរណបអាកាសធាតុអវកាសក្នុងការធ្វើដំណើរចម្ងាយរាប់លានម៉ាយ។ វាគឺជាផ្នែកមួយនៃកម្មវិធីរុករកអវកាសរបស់លោក Musk ក្រុមហ៊ុន SpaceX ដែលជាក្រុមហ៊ុនពាណិជ្ជកម្មមានគោលបំណងធ្វើឱ្យមនុស្សរស់នៅលើភពផ្សេងៗ។

សាស្រ្តាចារ្យ McDowell មកពីមជ្ឈមណ្ឌល Harvard-Smithsonian សម្រាប់រូបវិទ្យាដែលមានមូលដ្ឋាននៅសហរដ្ឋអាមេរិកបានពន្យល់ថា ចាប់តាំងពីឆ្នាំ 2015 រ៉ុក្កែតត្រូវបានទាញដោយកម្លាំងទំនាញផ្សេងៗគ្នានៃផែនដី ព្រះច័ន្ទ និងព្រះអាទិត្យ ដែលធ្វើឱ្យផ្លូវរបស់វាមានភាពវឹកវរបន្តិច។

វាត្រូវបានប្រមូលផ្តុំជាមួយបំណែកសំរាមអវកាសរាប់លានផ្សេងទៀត (គ្រឿងចក្រដែលត្រូវបានគេបោះចោលក្នុងលំហ) បន្ទាប់ពីបំពេញបេសកកម្មដោយមិនមានថាមពលគ្រប់គ្រាន់ដើម្បីត្រឡប់មកផែនដីវិញ។
សាស្ត្រាចារ្យ McDowell និយាយថា "ក្នុងរយៈពេលជាច្រើនទសវត្សរ៍មកនេះ ប្រហែលជាមានវត្ថុធំៗចំនួន 50 ដែលយើងបាត់បង់ដានទាំងស្រុង។ វាអាចកើតឡើងជាច្រើនដងពីមុនមក យើងគ្រាន់តែមិនបានកត់សម្គាល់។ នេះនឹងក្លាយជាករណីដំបូងដែលត្រូវបានបញ្ជាក់" ។

ការផ្ទុះគ្រាប់រ៉ុក្កែត Falcon 9 ត្រូវបានកំណត់អត្តសញ្ញាណដោយអ្នកកាសែត Eric Berger នៅលើគេហទំព័រអវកាស Ars Technica និងដោយអ្នកវិភាគទិន្នន័យ Bill Grey នៅក្នុងប្លុករបស់គាត់។ ការប៉ះទង្គិចគ្នានេះនឹងកើតឡើងនៅថ្ងៃទី ៤ ខែ មីនា នៅពេលដែលគ្រាប់ រ៉ុក្កែតនឹងផ្ទុះខណៈដែលវាធ្វើការប៉ះគ្នា។

សាស្ត្រាចារ្យ McDowell និយាយថា "ជាទូទៅវាជាធុងដែកទទេទម្ងន់ 4 តោន ដែលមានម៉ាស៊ីនរ៉ុក្កែតនៅខាងក្រោយ។ ដូច្នេះហើយ ប្រសិនបើអ្នកស្រមៃមើលថា ការបោះវានៅលើថ្មក្នុងល្បឿន 5,000 ម៉ាយក្នុងមួយម៉ោង វានឹងមិនមានលទ្ធផលល្អទេ" ។ ការផ្ទុះគ្រាប់រ៉ុក្កែតនេះ នឹងបន្សល់ទុកនូវរណ្ដៅសិប្បនិម្មិតតូចមួយនៅលើផ្ទៃព្រះច័ន្ទ៕

អត្ថបទដកស្រង់ពី Georgina Rannard
បកប្រែនិងកែសម្រួលដោយ Mr. Blue