កាលពីថ្ងៃទី៤ ខែមីនាកន្លងទៅនេះ តារាចម្រៀងជំនាន់ថ្មីស្រស់សង្ហាលោក សុវត្ថិ មុនីវណ្ណទើបតែបានបញ្ចេញបទចម្រៀងដំបូងបំផុតរបស់លោកនៅក្នុងក្រុមហ៊ុនតន្រ្តីថ្មី Galaxy Navatra ដែលមានចំណងជើងថា “Don’t Compare”។ គួរបញ្ជាក់ផងដែរថាលោកសុវត្ថិ មុនីវណ្ណបានធ្វើការទំលាក់បទចម្រៀងដំបូងរបស់លោកនេះជាការពន្ញាក់អារម្មណ៍តែម្តងនៅមុនថ្ងៃនៃកម្មវិធីអបអររូបលោកចូលទៅក្នុងផលិតកម្ម Galaxy Navatra ទៅទៀតដែលមានការទទួលស្វាគមន៍រួមគ្នាជាមួយនឹងលោកខាត់ជេមស៍ផងដែរ។ នេះស្តែងអោយឃើញទៅកាន់មហាជនថាលោកសុវត្ថិ មុនីវណ្ណពិតជាបានបញ្ចប់ការងារសិល្បៈរបស់លោកជាផ្លូវការពីក្រុមហ៊ុនតន្រ្តីចាស់ផលិតកម្មហង្សមាសជាស្ថាពរហើយ។ 

ដំណើរការងារសិល្បៈរបស់លោកនៅក្នុងក្រុមហ៊ុនតន្រ្តីថ្មីបានធ្វើអោយទស្សនិកជនមានការចាប់អារម្មណ៍យ៉ាងខ្លាំង ដោយសារការចេញផ្សាយបទចម្រៀងដំបូងរបស់លោក «Don’t Compare» មានរសជាតិថ្មីមួយដែលកាច និងត្រជាក់ធ្វើអោយទស្សនិកជនរឹតតែចង់ស្គាល់លោកសុវត្ថិមុនីវណ្ណកាន់តែច្បាស់។ បទ«Don’t Compare» គឺជាបទហ៊ីបហប់ថ្មីមួយដែលធ្វើអោយទស្សនិកជនបានឃើញពីទេពកោសល្យក្នុងការរ៉េបរបស់លោកដែលមានសមត្ថភាពមិនធម្មតា ពោរពេញដោយសំលេងច្បាស់ៗ និងកាចជះមន្តស្នេហ៍ដ៏កំណាច។ ទស្សនិកជាច្រើនបានដាក់រហ័សនាមលោកព្រាបសុវត្ថិ និងលោកសុវត្ថិ មុនីវណ្ណថាជាឪពុកតោ កូនឥន្រ្ទី ព្រោះយ៉ាងណាមិញសូម្បីតែក្នុងប៉ារ៉ូលចំរៀង និងរូបភាព Cover នៃបទចម្រៀងក៏មានរូបសត្វតន្រ្ទីជាតំណាងនៃលោកផងដែរ។ តើទស្សនិកជនពេញចិត្តបទថ្មីរបស់លោកមុនីវណ្ណកំរិតណា Let me know in your comment below!