នៅពេលដែលអ្នកស្ម័គ្រចិត្តរបស់ Royal National Lifeboat Institution (RNLI) បានរកឃើញអ្នកហែលទឹកដែលបានលង់ទឹកកាលពីថ្ងៃទី 22 ខែសីហា ឆ្នាំ 2021 បុរសម្នាក់នោះបានបាត់ខ្លួនអស់រយៈពេលជិត 12 ម៉ោងទៅហើយ។ ដោយកំពុងរសាត់បាត់អស់ពីឆ្នេរសមុទ្រអៀរឡង់គាត់ត្រូវបានគេប្រទះឃើញដោយសារតែ សត្វ Dolphin ជាច្រើនក្បាលបានព័ទ្ធជុំវិញគាត់។ ដំបូងឡើយ មានអ្នកដើរលេងឆ្នេរម្នាក់បានកត់សម្គាល់ឃើញសម្លៀកបំពាក់ ដែលបោះបង់ចោលរបស់បុរសម្នាក់នោះ ហើយបានទាក់ទងទៅអាជ្ញាធរ ដើម្បីស្វែងរកអ្នកហែលទឹកដែលបានបាត់ខ្លួន។

RNLI បាននិយាយថា "នៅម៉ោង 20:30 នាទី នាវិកអ្នកស្ម័គ្រចិត្តជួយសង្គ្រោះជាមួយ Fenit RNLI បានប្រទះឃើញសត្វ Dolphin ជាច្រើន រួមជាមួយនឹងក្បាលមនុស្សម្នាក់ដែលលេចចេញមកលើផ្ទៃទឹកប្រហែល 2 ម៉ាយកន្លះពីឆ្នេរ Castlegregory" ។ "អ្នកហែលទឹកនោះបានលែងដឹងខ្លួន ហើយបានសង្គ្រោះភ្លាមៗនៅលើទូកសង្គ្រោះ និងនាំយកទៅកាន់កំពង់ផែ Fenit ដើម្បីបញ្ជូនទៅមន្ទីរពេទ្យ" ។ គាត់ត្រូវបានគេកំណត់អត្តសញ្ញាណថាជាបុរស County Londonderry ក្នុងវ័យ 30 ឆ្នាំ, អ្នកហែលទឹកបានទទួលរងនូវការថយចុះកម្តៅ និងអស់កម្លាំង នៅពេលដែលគាត់ត្រូវបានគេជួយសង្គ្រោះ។ ដោយគ្មានអ្វីក្រៅពីឈុតងូតទឹក គាត់បានស៊ូទ្រាំជិតកន្លះថ្ងៃនៅក្នុងទឹកសមុទ្រអៀរឡង់ដ៏ត្រជាក់។

នៅក្នុងគំរូដ៏គួរឱ្យរំភើបនៃការរួមរស់របស់មនុស្សជាតិជាមួយពពួកសត្វដែលនៅជុំវិញយើង ជីវិតមួយត្រូវបានសង្គ្រោះដោយសត្វ Dolphin ដែលមានច្រមុះតូច ដ៏គួរអោយស្រលាញ់ ដែលបានកត់សម្គាល់ឃើញអ្នកហែលទឹកម្នាក់នៅក្នុងភាពអស់សង្ឃឹម។

អត្ថបទដកស្រង់ពី Marco Margaritoff
បកប្រែនិងកែសម្រួលដោយ Mr. Blue