ទើបតែប្រឡួកក្នុងវិស័យ Hip Hop មួយរយៈពេលខ្លីសោះ លោកហេងបានចេញបទចំរៀងជាច្រើនបទបន្តបន្ទាប់គ្នាយ៉ាងគួរអោយចាប់អារម្មណ៍។ ឃើញថាត្រឹមរយៈពេល២ឆ្នាំមកនេះ លោកបានបញ្ចេញស្នាដៃបទចំរៀងខ្លួនឯងជាច្រើនបទបង្ហាញទស្សនិកជនអោយបានដឹងពីទេពកោសល្យ និងឆន្ទៈមហិច្ឆតារបស់លោកយ៉ាងមោះមុតនៅក្នុងវិស័យតន្រ្តី Hip Hop នៃស្រុកខ្មែរ។ ភាពអស្ចារ្យរបស់លោកក៏ធ្វើអោយលោកសំរេចបំណងក្លាយទៅជាសិល្បករឯករាជ្យមួយរូបប្រចាំ Smartដែលទទួលបានការនិយមស្តាប់បទចំរៀងច្រើនជាងគេនៅក្នុងឆ្នាំ២០២២។ បទចំរៀងមុនៗដែលលោកបានចេញផ្សាយក្នុងរយៈពេលប៉ុន្មានឆ្នាំកន្លងមកនេះ ជាពិសេសសន្ទុះក្នុងឆ្នាំ២០២២នេះតែម្តងមានដូចជា បទ COnut DOnut បទ Unknown បទជ័យជំះ បទអ៊ូ បទឧបមាថា បទតាប៉ែឡែទទេពធីតា និងបទNotebookដែលបកស្រាយរួមគ្នានឹងលោក Ran និងបទJustin ដែលបកស្រាយរួមគ្នានឹងលោក Moonlight។ 

នៅពេលថ្មីនេះផងដែរ លោកហេងក៏បានប្រកាសចេញផ្សាយបទចំរៀងថ្មីចំនួន២បទបន្ថែមទៀតនៅក្នុងឆ្នាំ២០២២នេះ ដែលនៅក្នុងនោះមានបទ«Look Dad I made it» ដែលនឹងជិតចេញផ្សាយ និងបទកញ្ញា​​​LVដែលទើបនឹងចេញផ្សាយកាលពីថ្ងៃទី០៦ ខែកញ្ញាកន្លងទៅនេះ។ មុននឹងចេញផ្សាយបទកញ្ញាLVផងដែរ លោកហេងក៏បានបញ្ចេញវីឌីអូ Teaser បទចំរៀង «Look Dad I made it» ដែលមានលក្ខណៈប្លែកជាវីឌីអូឯកសារ Highlight អំពីដំណើររបស់លោកក្នុងវិថីសិល្បៈចាប់ផ្តើមតាំងពីលោកដឹងក្តីម្ល៉េះ ដោយមានឪពុកគឺសិល្បកររ៉េបមួយរូបក្នុងប្រទេសកម្ពុជា គឺជាDjSdey។ ភាពមោទនភាពនឹងឪពុករបស់ខ្លួន និងការតាំងចិត្តធ្វើអោយឪពុកមានមោទនភាពចំពោះខ្លួនវិញ សាងអារម្មណ៍រំភើបរំជើបរំជួលនៅក្នុងវីឌីអូTeaser មួយនោះខ្លាំងណាស់។ ទស្សនិកជនជាច្រើនក៏រំពឹងចង់មើលវីឌីអូចំរៀងនោះពេញផងដែរ ព្រោះសំរាប់លោក Heng ក្រៅពីការពាំនាំយកនូវបទចំរៀងហើយ ក៏នៅបង្កប់នូវអារម្មណ៍មនោសញ្ចេតនាជ្រាលជ្រៅអោយអ្នកទស្សនាបានជ្រួតជ្រាបផងដែរ។ តោះកុំភ្លេចរង់ចាំទស្សនាជាមួយអេដមីនទាំងអស់គ្នាណា!