តួសម្តែងស្រីជួរមុខកញ្ញា ស៊ីន យូប៊ីន មិនត្រឹមតែអាចដណ្តើមយកតំណែងតួឯកស្រីនៅក្នុងរឿងប៉ុណ្ណោះទេតែកញ្ញាក៏ទទួលបានភាពជោគជ័យយ៉ាងខ្លាំងក្លានៅលើការរៀបចំគំរោងការងារផ្ទាល់ខ្លួនផងដែរ។ រាប់ចាប់តាំងពីការកាន់តំណែងជា CEO នៃក្រុមហ៊ុនភេសជ្ជៈផ្ទាល់ខ្លួន Firetiger និងជាទូតសុឆន្ទៈនៃក្រុមហ៊ុនល្បីៗមួយចំនួននៅក្នុងប្រទេសកម្ពុជាផង។ ចំណែកកាលពីពេលថ្មីៗនេះផងដែរ ស៊ីន យូប៊ីន បានឈានទៅដល់កំរិតមួយទៀតដោយកញ្ញាបានក្លាយជាទៅភ្ញៀវដែលត្រូវបានអញ្ជើញចូលរួមផ្ទាល់នៅក្នុងកម្មវិធី Dior Fashion Show នៃទីក្រុងប៉ារីសប្រទេសបារាំងកាលពីថ្ងៃទី២៣ ខែមករាកន្លងទៅនេះព្រមទាំងបានជួបទូតសុឆន្ទៈរបស់ Dior កញ្ញាJisoo នៃក្រុមប្ល៊ែកភីងនៅទីនោះផងដែរ។
កាលពីថ្ងៃទី២៣ ខែមករាកន្លងទៅនេះកញ្ញាស៊ីនយូប៊ីនត្រូវបានអញ្ជើញចូលរួមនៅក្នុងកម្មវិធីដើរម៉ូត Christian Dior Haute Couture Spring Summer 2023 ដែលជាផ្នែកមួយរបស់ Paris Fashion Week នៃទីក្រុងប៉ារីសផងដែរ។ នេះគឺជាលើកដំបូងហើយដែលសិល្បករស្រីនៃប្រទេសកម្ពុជាត្រូវបានអញ្ជើញចូលរួមជាភ្ញៀវកិត្តិយសផ្ទាល់នៅក្នុងកម្មវិធីមួយនេះ ជាទូទៅកម្មវិធីមួយនេះមិនមានលក់សំបុត្រចូលទស្សនាទេ អាចអោយត្រឹមតែភ្ញៀវពិសេសដែលបានអញ្ជើញចូលទស្សនាតែប៉ុណ្ណោះ។ ដោយមានក្រុមថតល្បីៗនៅទីក្រុងប៉ារីសបានធ្វើការផ្តិតយករូបភាពតារាបង្ហាញម៉ូត និងសិល្បករល្បីៗជាច្រើនរូបនៅទីនោះផងដែរ ដែលនៅក្នុងនោះក៏មានកញ្ញាស៊ីនយូប៊ុន Kylie Jenner ,Dojacat, Cristina Cordula, Sabrina carpenter និងជាពិសេសទូតសុឆន្ទៈ Jisoo នៃក្រុមប៊្លែកផីងផងដែរ។
នៅលើគណនី Instagram ផ្ទាល់របស់កញ្ញាស៊ីនយូប៊ីន កញ្ញាបានធ្វើការបង្ហោះStories ជាច្រើនចូលរួមនៅក្នុងកម្មវិធីនោះ និងនៅក្នុងនោះផងដែរក៏មានរូបភាពដែលទទួលបានផ្កាដ៏ស្រស់ស្អាតពីក្រុមហ៊ុន Dior ផ្ទាល់ថែមទៀត។ គួរបញ្ជាក់ផងដែរកម្មវិធីដែលកញ្ញាស៊ីនយូប៊ីនកំពុងចូលរួមនេះមានរយៈពេល៤ថ្ងៃប្រព្រឹត្តឡើងចាប់ពីថ្ងៃទីច័ន្ទទី២៣ ខែមករា រហូតដល់ថ្ងៃព្រហស្បតិ៍ ទី២៦ ខែមករានេះ។ ចង់ដឹងថាតើនឹងមានសកម្មភាពអ្វីខ្លះទៀតរបស់កញ្ញាស៊ីនយូប៊ីននៅក្នុងរយៈពេលប៉ុន្មានថ្ងៃខាងមុខនេះ មានតើរង់ចាំតាមដានទាំងអស់គ្នា!
