ទស្សនិកជនប្រហែលជាមិនបាននឹកស្មាននោះទេ ថាក្រុមតារាចម្រៀងរ៉េបកម្ពុជាមួយក្រុមនេះបានលាក់ខ្លួនសំងំស្ងាត់ៗធ្វើបទចម្រៀងនៅក្នុងដែនដីភាគខាងលិចប្រទេសកម្ពុជាជាយូរ។ ពួកគេគឺជាក្រុម Westside ដែលសុទ្ធសឹងជា Rapper វ័យក្មេងមានប្រភពកំណើតមកពីទីក្រុងប៉ោយប៉ែតទឹកដីខេត្តបន្ទាយមានជ័យ។
សមាជិកពីររូបសំខាន់ៗរបស់ក្រុម Westside រួមមានលោក Dia និងលោកBoxiba ដែលពួកគេគឺជាសមាជិកបង្គោលនៃក្រុមតែម្តង។ បទចម្រៀងដែលផ្ទុះឡើងរបស់លោក Boxiba និងលោក Dia រួមគ្នាប្រសិនបើទស្សនិកជននៅចាំ នោះគឺជាបទ«វែកឆា» ដែលបានចេញផ្សាយឡើងកាលពីចុងខែវិច្ឆិកា ឆ្នាំ២០២២។
នេះគឺជាបទចំរៀងមួយដែលធ្វើអោយមហាជនចាប់ផ្តើមស្គាល់ពួកគេទាំងពីរជា Dia from the west side និង Boxiba from the west side។ យ៉ាងណាមិញផងដែរកាលពីពេលថ្មីៗនេះ លោក Dia បានធ្វើការបញ្ចេញបទចម្រៀងថ្មីៗរបស់លោកទៀតជាច្រើនបទដូចជាបទ FREEGAME និងបទ SCRAP ដែលទើបនឹងចេញផ្សាយប៉ុន្មានសប្តាហ៍កន្លងទៅនេះ។
ខណៈដែលកាលពីថ្ងៃទី២៩ ខែសីហាកន្លងទៅនេះ លោកក៏ទើបតែបានបញ្ចេញ Trailer បទថ្មីថែមទៀតនៅលើគណនី Tik Tok របស់លោក និងហើយទទួលបានការចូលចិត្ត និងចែករំលែកជាច្រើន។ ក្រុម Wesideក៏ធ្លាប់មានវត្តមានចូលរួមក្នុងការប្រគំតន្រ្តីរបស់ក្រុមហ៊ុនស្រាបៀហនុមានផងដែរ រួមជាមួយនឹងលោក MC Sey នៃក្រុមCG Movementនិងលោក Kwanម្ចាស់បទចម្រៀង«Alexanderwang» ផងដែរ។
តើទស្សនិកជនមានចំណាប់អារម្មណ៍យ៉ាងណាដែរចំពោះក្រុមតារារ៉េប Westside មួយនេះ?