ភ្ញៀវទេសចរមកពីប្រទេសចិននៅក្នុងការតាំងពិព័រណ៍យន្តហោះនៃប្រទេសសិង្ហបុរីបានអះអាងថា ពួកគេត្រូវបានហាមឃាត់មិនឱ្យចូលទស្សនាយន្តហោះយោធា Airbus។ ការិយាល័យនេសាទរបស់ប្រទេសហ្វីលីពីនបានចោទប្រកាន់កប៉ាល់នេសាទចិនថាបានប្រើប្រាស់សារធាតុ cyanide ដើម្បីបំផ្លាញកោះ Scarborough Shoal ដែលជាកោះសម្បូរត្រីមួយនៅក្នុងសមុទ្រចិនខាងត្បូងដែលប្រកួតប្រជែងគ្នាដោយទីក្រុងម៉ានីល និងទីក្រុងប៉េកាំង។ អ៊ុយក្រែន និងដៃគូប្រទេសខាងក្រៅរបស់ខ្លួនកំពុងពិចារណាពីលទ្ធភាពនៃការអញ្ជើញរុស្ស៊ីឱ្យចូលរួមកិច្ចប្រជុំកំពូលសន្តិភាពដើម្បីពិភាក្សាអំពីការបញ្ចប់ការឈ្លានពានរបស់ទីក្រុងមូស្គូលើលក្ខខណ្ឌរបស់ទីក្រុង Kyiv នេះបើយោងតាមមន្ត្រីជាន់ខ្ពស់អ៊ុយក្រែន។
-
ភ្ញៀវទេសចរចិនចោទប្រកាន់ពីការរើសអើងនៅតាំងពិព័រណ៍យន្តហោះសិង្ហបុរី
យោងតាមសារព័ត៌មាន BBC ចុះផ្សាយថ្ងៃទី២៦ ខែកុម្ភៈបានអោយដឹងថា ភ្ញៀវទេសចរមកពីប្រទេសចិននៅក្នុងការតាំងពិព័រណ៍យន្តហោះនៃប្រទេសសិង្ហបុរីបានអះអាងថា ពួកគេត្រូវបានហាមឃាត់មិនឱ្យចូលទស្សនាយន្តហោះយោធា Airbus។ វីដេអូមួយដែលត្រូវបានថតដោយអ្នកសរសេរប្លុកជនជាតិចិនម្នាក់ បានបង្ហាញពីនារីម្នាក់ដែលបានពាក់អត្តសញ្ញាណប័ណ្ណ Airbus ធ្វើការសុំស្គាល់សញ្ជាតិរបស់លោក។
ខណៈដែលបុរសនោះបានកំពុងព្យាយាមចូលទៅក្នុងយន្តហោះដឹកជញ្ជូន Airbus A400M ដែលជាកម្មសិទ្ធិរបស់កងទ័ពអាកាសអាល្លឺម៉ង់ Luftwaffe។ ស្ត្រីនោះបានប្រាប់លោកថា នាងត្រូវពិនិត្យសញ្ជាតិរបស់លោកសិន "ព្រោះវាជាយន្តហោះរបស់អាល្លឺម៉ង់"នៅពេលដែលលោកប្រាប់នាងថាលោកជាជនជាតិចិន នាងក៏បានបដិសេធលោកភ្លាមៗ ដោយនិយាយថា "វាជាច្បាប់របស់អាល្លឺម៉ង់ វាជាការរឹតបន្តឹងខាងយោធា"។
អ្នកទេសចរចិនផ្សេងទៀតក៏បានអះអាងតាមអ៊ីនធឺណិតថា ពួកគេមិនត្រូវបានគេអនុញ្ញាតឱ្យចូលទៅជិតយន្តហោះយោធារបស់អាល្លឺម៉ង់នោះផងដែរ។ អ្នកប្រើប្រាស់ប្រព័ន្ធផ្សព្វផ្សាយសង្គមចិនបានរិះគន់ក្រុមហ៊ុន Airbus និងយោធាអាល្លឺម៉ង់ ដែលជាម្ចាស់យន្តហោះនោះចំពោះការរើសអើង។
-
ម៉ានីលចោទប្រកាន់ប៉េកាំងបូមសារធាតុ Cyanide ចូលសមុទ្រ
យោងតាមសារព័ត៌មាន The Times of India ចុះផ្សាយថ្ងៃទី២១ ខែកុម្ភៈបានអោយដឹងថា ការិយាល័យនេសាទរបស់ប្រទេសហ្វីលីពីនបានចោទប្រកាន់កប៉ាល់នេសាទចិនថាបានប្រើប្រាស់សារធាតុ cyanide ដើម្បីបំផ្លាញកោះ Scarborough Shoal ដែលជាកោះសម្បូរត្រីមួយនៅក្នុងសមុទ្រចិនខាងត្បូងដែលប្រកួតប្រជែងគ្នាដោយទីក្រុងម៉ានីល និងទីក្រុងប៉េកាំង។
ការនេសាទត្រីដោយប្រើប្រាស់សារធាតុ Cyanide គឺជាវិធីសាស្រ្តនេសាទដ៏ចម្រូងចម្រាសមួយដែលជាធម្មតាពាក់ព័ន្ធនឹងការចោលសារធាតុគីមីដែលមានជាតិពុលខ្លាំងទៅជិតនឹងផ្កាថ្ម ឬក្នុងកន្លែងនេសាទ ដើម្បីធ្វើអោយស្រឡាំងកាំង ឬសម្លាប់ត្រីនៅម្តុំនោះ ដូចនេះពួកវានឹងអាចចាប់បានយ៉ាងងាយស្រួល។
យ៉ាងណាមិញអ្នកនាំពាក្យការិយាល័យនេសាទហ្វីលីពីនក៏បានចោទប្រកាន់អ្នកនេសាទចិនផងដែរថាបានប្រើប្រាស់សារធាតុ cyanide នេះដោយចេតនាដើម្បីរារាំងទូកនេសាទហ្វីលីពីនពីការនេសាទនៅក្នុងតំបន់នេះ។
-
អ៊ុយក្រែនពិចារណាអញ្ជើញរុស្ស៊ីចូលរួមកិច្ចប្រជុំសន្តិភាពនៅស្វីស
យោងតាមសារព័ត៌មាន The Times of India ចុះផ្សាយថ្ងៃទី២៥ ខែកុម្ភៈបានអោយដឹងថា អ៊ុយក្រែន និងដៃគូប្រទេសខាងក្រៅរបស់ខ្លួនកំពុងពិចារណាពីលទ្ធភាពនៃការអញ្ជើញរុស្ស៊ីឱ្យចូលរួមកិច្ចប្រជុំកំពូលសន្តិភាពដើម្បីពិភាក្សាអំពីការបញ្ចប់ការឈ្លានពានរបស់ទីក្រុងមូស្គូលើលក្ខខណ្ឌរបស់ទីក្រុង Kyiv នេះបើយោងតាមមន្ត្រីជាន់ខ្ពស់អ៊ុយក្រែន។
កិច្ចប្រជុំកំពូលដែលធ្វើជាម្ចាស់ផ្ទះដោយប្រទេសស្វីសនេះ មានគោលបំណងពិភាក្សាអំពីចក្ខុវិស័យសម្រាប់សន្តិភាព និងអាចបង្ហាញផែនការដល់រុស្ស៊ីក្នុងអំឡុងពេលកិច្ចប្រជុំជាបន្តបន្ទាប់។ លោក Andriy Yermak អគ្គសេនាធិការរបស់ប្រធានាធិបតីអ៊ុយក្រែន លោក Volodymyr Zelenskiy បាននិយាយថា ប្រសិនបើប្រទេសឈ្លានពានចង់បញ្ចប់សង្រ្គាម និងបង្កើតសន្តិភាពពិតប្រាកដ តំណាងនៃសហព័ន្ធរុស្ស៊ីអាចនឹងត្រូវបានអញ្ជើញឱ្យចូលរួមក្នុងកិច្ចប្រជុំកំពូលនេះ។
