កាលពីថ្ងៃទី១៣ ខែមិថុនាកន្លងទៅនេះ លោក Alexconan Real ដែលជាអ្នកស្និទ្ធស្នាលម្នាក់នឹងលោកជីដេវីត និងអ្នកនាងទេពបូព្រឹក្សបានធ្វើការ Live ឡើងនៅលើហ្វេសប៊ុករបស់ខ្លួន ដោយលោកបានភ្ជាប់ជាមួយនឹងខេបសិនថា«សួស្តី30M»។ដូចអ្វីដែលទស្សនិកជនបានដឹងខ្លះៗមកហើយ កាលពីប៉ុន្មានថ្ងៃកន្លងទៅនេះ ផ្ទុះរឿងចម្រូសចម្រាស់មួយនៅលើអ៊ីនធឺណែតទាក់ទងនឹងម្ចាស់បទ និងអ្នក Cover បទ«How About Now?»។
កាលពីសប្តាហ៍ទី២នៅក្នុងវគ្គ Blind Audition នៃកម្មវិធី The Voice Cambodia រដូវកាលទី៣ កញ្ញាសុខុម រចនា ដែលជាម្ចាស់បទ Cover«How about now?» ដ៏ល្បីបានធ្វើអោយគណៈកម្មការទាំង៤មានការភ្ញាក់ផ្អើលយ៉ាងខ្លាំងដោយរូបកញ្ញាបានអញ្ជើញចូលរួមប្រលងនៅក្នុងកម្មវិធីមួយនេះ។
យ៉ាងណាមិញ នៅខណៈកញ្ញាសុខុមរចនាបានអញ្ជើញគណកម្មការទាំង៤ឡើងរាំកំដរឆាកនូវបទ«How about now» នេះ ពេលចប់សម្តែងភ្លាមៗ Coach ណុបបញ្ញារិទ្ធក៏បានលាន់មាត់ថាបើកុំតែនាងច្រៀងបទនេះមិនដឹងថានាងគឺជាម្ចាស់បទទេ រំពេចនេាះ កញ្ញាសុខុមរចនាក៏បានអះអាងអរគុណឡើងភ្លាមៗទៅកាន់អ្នកចូលទស្សនាបទរបស់នាងនៅលើយូធូបដែលមានរហូតដល់៣០លានView ហើយក៏បានធ្វើអោយបណ្តាអ្នកគាំទ្រលោកជីដេវីតមានការអន់ចិត្តយ៉ាងខ្លាំងដោយនាងមិនបានថ្លែងអំណរអរគុណដល់លោកជីដេវីត។
ជាក់ស្តែងដូចជាលោក Alexconan Real នេះស្រាប់ដែលលោកបាន Live ភ្លាមៗបកស្រាយទៅកាន់កញ្ញាសុខុម រចនានេះតែម្តង ដោយលោកបានចោទប្រកាន់ឡើងថាដោយសារតែលោកជីដេវីតកាលឡើងទទួលពានរង្វាន់បទមួយនេះនៅក្នុងកម្មវិធីPMA បានត្រឹមតែអរគុណហ្វេនៗរបស់លោក ក៏ដូចជាត្រឹមអរគុណទៅកាន់អ្នក Cover ដោយប្រយោល ដោយមិនបញ្ជាក់ឈ្មោះ ទើបធ្វើអោយម្ចាស់បទ Cover ម្នាក់នេះអន់ចិត្ត ទើបពេលឡើងប្រលងកម្មវិធីនេះទៅជាអរគុណ៣០លានView ឯណាណោះវិញ ដោយមិនបានអរគុណដល់ម្ចាស់បទដើមលោកជីដេវីតមួយម៉ាត់។
ជាភស្តុតាងលោកក៏បានបន្តទៀតថា ដោយកាលណោះបន្ទាប់ពីលោកជីដេវីតឡើងសម្តែងការអរគុណបែបនោះហើយ បងប្រុសម្នាក់ដែលជាក្រុមការងារជាមួយនឹងកញ្ញារចនា ក៏បានបង្ហោះស្តេធឹសឡើងថាពួកគេពិតជាអន់ចិត្តដែលខិតខំកែច្នៃបទភ្លេងផលិតបទ Cover មួយនេះឡើង ហើយមិនត្រូវបានលោកជីដេវីតអោយ Credit ពួកគេ។ តើទស្សនិកជនយល់ឃើញយ៉ាងណាចំពោះរឿងនេះ?