នៅក្នុងខ្លួនរបស់មនុស្សម្នាក់ៗ គឺមានអ្វីមួយដែលមនុស្សដទៃទៀតមិនគួរដាស់វាឲ្យភ្ញាក់ឡើយ ព្រោះនៅពេលដែលវាភ្ញាក់ឡើង គ្មានអ្នកណាអាចធ្វើឲ្យវាដេកទៅវិញបានទេ។ ដូច្នេះហើយ មុនពេល ខនណើរ មេកក្លែកកើរ (Conor McGregor) ក្លាយជាម្ចាស់ជើងឯក UFC គាត់គឺជាក្មេងតូចម្នាក់ដែលត្រូវបានក្មេងៗផ្សេងទៀតធ្វើបាបជាច្រើនលើកច្រើនសារ។ គាត់ជាគោលដៅដ៏ងាយស្រួលក្នុងការធ្វើបាប។ ខនណើរ (Connor) មិនដឹងពីរបៀបការពារខ្លួនគាត់នោះទេ គាត់មានអារម្មណ៍ថាអស់សង្ឃឹម និងវេទនាបំផុត ប៉ុន្តែសំណាងល្អ មានអ្វីមួយនៅក្នុងខ្លួនគាត់បានភ្ញាក់ឡើង។ ចាប់តាំងពីពេលនោះមក គាត់បានតាំងចិត្តរៀនពីរបៀបការពារខ្លួន។ គាត់មិនចង់ក្លាយជាជនរងគ្រោះបន្តទៀតនោះទេ។ ដូច្នេះនៅអាយុ១២ឆ្នាំ គាត់បានចាប់ផ្ដើមចាប់រៀនក្បាច់គុន និងការប្រដាល់។ ជីវិតរបស់គាត់ក៏មិនងាយស្រួលប៉ុន្មានទេ គាត់ជាកូនប្រុសរបស់អ្នករត់តាក់ស៊ីម្នាក់ ហើយគ្រួសារគាត់រស់នៅសង្កាត់ជនជាតិអៀរឡង់ដ៏ក្រីក្រមួយ។ នៅអាយុត្រឹមតែ 12 ឆ្នាំ គាត់បានដឹងថា គាត់ចង់ក្លាយជាអ្វីមួយបន្ថែមទៀត ខុសពីជីវិតដែលគាត់មានសព្វថ្ងៃ ហើយការផ្សងព្រេងរបស់គាត់ដែលពោរពេញទៅដោយឧបសគ្គ ក៏បានចាប់ផ្តើម។ គាត់ធ្វើការយ៉ាងលំបាកក្នុងនាមជាជាងជុសជុលប្រព័ន្ធទឹក។ គាត់ត្រូវភ្ញាក់ពីគេងនៅម៉ោង 5 ព្រឹក ហើយធ្វើការលើសពី 12 ម៉ោងក្នុងមួយថ្ងៃលើការងារដែលគាត់ស្អប់។ ក្រោយពីធ្វើការពេញមួយថ្ងៃ គាត់នៅតែទៅក្លឹបហាត់ប្រាណដើម្បីហ្វឹកហាត់ទៅរកក្តីស្រមៃរបស់គាត់។ ក្នុងអំឡុងពេលនេះ គាត់បានជួបមិត្តស្រីរបស់គាត់ ដែលបានក្លាយជាអ្នកគាំទ្រដ៏ធំបំផុតរបស់គាត់ ប៉ុន្តែអាជីពជាជាងជុសជុលប្រព័ន្ធទឹករបស់គាត់ បានធ្វើឱ្យគាត់មិនសប្បាយចិត្តនោះទេ។
"វាមិនមែនសម្រាប់ខ្ញុំឡើយ។ ខ្ញុំបានភ្ញាក់ពីគេងនៅម៉ោង ៥ ព្រឹក ហើយដើរក្នុងទីងងឹតដែលត្រជាក់ស្ទើរតែកកខ្លួនរបស់ខ្ញុំទៅហើយ។ ខ្ញុំដឹងថា មានជាងជុសជុលប្រព័ន្ធទឹកដែលមានជំនាញ ហើយឧស្សាហ៍ព្យាយាម ប៉ុន្តែខ្ញុំមិនមានចិត្តស្រលាញ់ការងារនេះឡើយ ខ្ញុំស្អប់រាល់វិនាទីដែលខ្ញុំធ្វើវា។ ខ្ញុំត្រូវបានគេប្រើឲ្យធ្វើនេះធ្វើនោះ ព្រមទាំងប្រើឱ្យទិញអាហារថ្ងៃត្រង់សម្រាប់ពួកគេទៀតផង។ រឿងទាំងអស់នេះ គ្រាន់តែធ្វើឱ្យខ្ញុំគិតថា ជីវិតនេះមិនសាកសមសម្រាប់ខ្ញុំឡើយ។ ខ្ញុំនឹងបោះបង់វាចោល ហើយខ្ញុំនឹងដេញតាមក្តីស្រមៃរបស់ខ្ញុំ"។
នៅពេលដែលគាត់បោះបង់ការងារជាជាងជុសជុលប្រព័ន្ធទឹក ហើយមកហ្វឹកហាត់ពេញម៉ោងវិញ ឪពុកម្តាយរបស់គាត់មិនពេញចិត្តជាខ្លាំង រហូតដល់ធ្វើឱ្យឪពុករបស់គាត់សើចចំអកឱ្យគាត់ទៀតផង ប៉ុន្តែ ខនណើរ (Connor) មានការតាំងចិត្តច្រើនជាងពេលណាៗទាំងអស់ក្នុងជីវិតរបស់គាត់ ហើយបាននិយាយទៅកាន់ឪពុករបស់គាត់វិញថា "ពុកនឹងមានអារម្មណ៍សុំទោស នៅពេលដែលខ្ញុំបានក្លាយជាមហាសេដ្ឋី។”
ហើយគាត់ចាប់ផ្តើមធ្វើការខ្លាំងជាងអ្នកណាទាំងអស់ ប៉ុន្តែក្តីសុបិនរបស់គាត់មិនបានកើតឡើងក្នុងរយៈត្រឹមតែមួយយប់នោះទេ។ អស់រយៈពេលជាច្រើនឆ្នាំក្រោយមក គាត់គ្មានលុយក្នុងហោប៉ៅសូម្បីត្រឹមតែមួយសេន ហើយស្ទើរតែរកទីបញ្ចប់មិនឃើញ។ នៅអាយុ 18 ឆ្នាំ ខនណើរ (Connor) បានបង្ហាញខ្លួនជាលើកដំបូងនៅ MMA ហើយបានឈ្នះការប្រកួតនេះ។ ប៉ុន្តែវាមិនងាយស្រួលសម្រាប់គាត់ទេ។ មនុស្សជាច្រើននឹងបោះបង់ភ្លាមៗពេលជួបរឿងលំបាក ប៉ុន្តែក្នុងចំណោមមនុស្សទាំងនោះមិនមាន ខនណើរ (Connor) ឡើយ។ អស់រយៈពេល 5 ឆ្នាំ គាត់បានហ្វឹកហាត់នៅក្នុងក្លឹបហាត់ប្រាណក៏សែនត្រជាក់ ហើយស្ទើរតែរកលុយទិញបាយហូបមិនបានទៀតផង។ ប៉ុន្តែក្នុងឆ្នាំ 2013 ខនណើរ (Connor) បានបង្ហាញខ្លួនជាលើកដំបូងនៅ UFC ហើយបានឈ្នះការប្រកួតដែលអាចរកប្រាក់ចំណូលបាន 60,000 ដុល្លារ ហើយអ្វីដែលគួរឱ្យអស់សំណើចទៀតនោះ គឺត្រឹមតែមួយសប្តាហ៍មុនពេលការប្រកួត គាត់បានសន្សំលុយគ្រប់គ្រាន់សម្រាប់ការពិនិត្យសុខុមាលភាពចំនួន 235 ដុល្លារ ដើម្បីជួយគាត់ឱ្យរស់រានមានជីវិតបន្តទៀត។
"ខ្ញុំមានជំនឿលើខ្លួនឯងខ្លាំងណាស់ រហូតដល់គ្មានអ្វីអាចរារាំងខ្ញុំបានទេ"
ការខិតខំប្រឹងប្រែង និងការលះបង់ជាច្រើនឆ្នាំរបស់គាត់ បានធ្វើឱ្យគាត់ក្លាយជាបុរសម្នាក់ដែលដឹងពីអ្វីដែលគាត់ចង់បាន ហើយនឹងមិនអនុញ្ញាតឱ្យមានអ្វីមួយចូលទៅរាំងស្ទះសុបិនរបស់គាត់ឡើយ។ មិនយូរប៉ុន្មានគាត់បានក្លាយជាម្ចាស់ជើងឯកពីរផ្នែកផ្សេងគ្នា (two-division) នៅ UFC ហើយត្រូវបានគេចាត់ទុកថាជាស្តេចនៃកីឡាប្រយុទ្ធអស់រយៈពេលជាយូរមកហើយ។ សព្វថ្ងៃនេះ ទ្រព្យសម្បត្តិរបស់គាត់គឺ 170 លានដុល្លារ គាត់បានក្លាយជាមោទនភាពរបស់ប្រទេសអៀរឡង់ ជំនឿលើខ្លួនឯងដ៏មិនគួរឱ្យជឿ ទំនុកចិត្ត និងការខិតខំប្រឹងប្រែងរបស់គាត់ បានធ្វើឱ្យគាត់ក្លាយជាកម្លាំងដែលមិនអាចឈប់បាន។
"មិនមានទេពកោសល្យនៅទីនេះឡើយ នេះគឺជាការខិតខំប្រឹងប្រែង នេះគឺជាមហិច្ឆតា ទេពកោសល្យមិនមានសម្រាប់ខ្ញុំឡើយ។ យើងទាំងអស់គ្នាសុទ្ធតែជាមនុស្ស អ្នកអាចជានរណាក៏បាន ប្រសិនបើអ្នកចំណាយពេលវេលាទៅលើវា អ្នកនឹងឈានទៅដល់ចំណុចកំពូល។ ខ្ញុំមិនមានទេពកោសល្យឡើយ តែខ្ញុំមានមហិច្ឆតា។"
ដូច្នេះហើយ ក្មេងប្រុសដែលត្រូវគេធ្វើបាប ជាអ្នកក្រ ហើយរស់នៅជាមួយភាពវេទនា ធ្វើការ ១៥ម៉ោងក្នុងមួយថ្ងៃជាជាងជុសជុលប្រព័ន្ធទឹក និងជាមនុស្សម្នាក់ដែលឪពុករបស់ខ្លួនទុកចោលនៅពេលសម្រេចចិត្តដេញតាមសុបិន បានក្លាយជាមហាសេដ្ឋី និងជាម្ចាស់ជើងឯកពីរផ្នែកផ្សេងគ្នានៅ UFC ។ អ្នកណាជាអ្នកសើចឥឡូវនេះ ហើយនេះគឺជាអាថ៌កំបាំងនៃភាពជោគជ័យរបស់គាត់។
"នៅពេលដែលអ្វីៗដំណើរការល្អ ហើយអ្នកស្រមៃឃើញរឿងល្អទាំងនេះកើតឡើង នោះអ្នកស្រមៃឃើញរឿងល្អកាន់តែច្រើនដែលកំពុងកើតឡើង។ វាជារឿងងាយស្រួល។ អ្វីដែលមិនងាយធ្វើនោះ គឺនៅពេលមានអ្វីៗដំណើរការមិនល្អ ហើយអ្នកកំពុងស្រមៃឃើញរឿងល្អ នោះជាអ្វីដែលខ្ញុំអាចធ្វើបាន។ ខ្ញុំអាចធ្វើបាន ទោះបីជាខ្ញុំមានបញ្ហានេះនៅផ្ទះ ទោះបីជាខ្ញុំគ្មានការងារធ្វើ ខ្ញុំមិនដឹងថាខ្ញុំកំពុងធ្វើអ្វីក៏ដោយ។ ខ្ញុំនឹងនៅតែអាចមានអារម្មណ៍ដូចកាលពីមុន។ ខ្ញុំនៅតែអាចប្រើការស្រមើលស្រមៃរបស់ខ្ញុំដូចកូនក្មេងប្រើការស្រមើលស្រមៃរបស់ពួកគេអញ្ចឹង។ ជាទូទៅ ខ្ញុំគ្រាន់តែប្រើការស្រមើលស្រមៃរបស់ខ្ញុំ ហើយបន្ទាប់មកនៅពេលដែលខ្ញុំចាប់ផ្តើមមានការផ្តោតអារម្មណ៍ ហើយដឹងថា ខ្ញុំនឹងធ្វើឱ្យរឿងនេះឲ្យកើតឡើង។ វាគ្រាន់តែជាព្យុះដ៏ល្អឥតខ្ចោះមួយ ដែលកំពុងកើតឡើងសម្រាប់ខ្ញុំ ហើយនោះជាមូលហេតុដែលខ្ញុំសុខចិត្តយកឈ្នះរាល់មនុស្សគ្រប់រូបដែលនៅក្នុងផ្លូវរបស់ខ្ញុំ"។
ប្រសិនបើអ្នកមានរូបភាពច្បាស់លាស់មួយនៅក្នុងខួរក្បាលរបស់អ្នក អំពីអ្វីមួយដែលនឹងកើតឡើង ហើយមានជំនឿច្បាស់លាស់ថា វានឹងកើតឡើង មិនថាមានអ្វីកើតឡើងនោះទេ។ បន្ទាប់មក គ្មានអ្វីអាចបញ្ឈប់វាបានឡើយ។ វាគឺជាព្រហ្មលិខិតដែលនឹងកើតឡើង។ “ខ្ញុំចង់សាកល្បងហើយបរាជ័យ ប្រសើរជាងមិនសាកល្បងទាល់តែសោះ។ នោះហើយជាអ្វីដែលខ្ញុំខ្លាច។ ខ្ញុំគិតថាអ្នកគ្រាន់តែត្រូវខិតខំប្រឹងប្រែងឲ្យខ្លាំងជាងវា។ អ្នកត្រូវខិតខំប្រឹងប្រែងឲ្យខ្លាំងជាងការភ័យខ្លាច និងការសង្ស័យទាំងនោះ៕