គ្រីស អ៊ីវ៉ាន (Chris Evans) គឺជាតារាសម្តែងដ៏អស្ចារ្យម្នាក់ដែលទទួលបានភាពល្បីល្បាញ នៅក្នុងតួអង្គជា កាពិទែន អាមេរិកខា (Captain America) ។ ប៉ុន្តែតើអ្នកដឹងទេថា គាត់ស្ទើរតែបដិសេធតួនាទីនេះ ដោយសារតែជំងឺថប់បារម្ភ និងជំងឺធ្លាក់ទឹកចិត្តរបស់គាត់។ គាត់ស្ទើរតែចុះចាញ់សំឡេងតូចមួយដែលនៅក្នុងខួរក្បាលរបស់គាត់ ព្រោះសំលេងនោះបានប្រាប់គាត់ថា អ្នកមិនល្អគ្រប់គ្រាន់នោះទេ ហើយអ្នកនឹងបរាជ័យដែលមិនអាចងើបឡើងវិញបាន។ អ្នកនឹងដឹងថា អ្នកមិននៅម្នាក់ឯងទេ សូម្បីតែកំពូលវីរបុរសក៏ជួបបញ្ហាជាមួយនឹងការថប់បារម្ភ និងការធ្លាក់ទឹកចិត្តផងដែរ។ នេះគឺជាជីវិតជោគជ័យរបស់ គ្រីស អ៊ីវ៉ាន (Chris Evans) ដែលនឹងជម្រុញអ្នកឱ្យប្រឈមមុខតតាំងនឹងភ័យខ្លាចដោយមិនចុះញ៉ូម។
គ្រីស (Chris) មានស្រុកកំណើតនៅទីក្រុងបូស្តុន ហើយកាលនៅក្មេង គាត់ពិតជាចាប់អារម្មណ៍លើការគូររូប និងលាបពណ៌ខ្លាំងណាស់។ ហើយពីដំបូងគាត់ចង់ចូលសាលាគំនូរ ប៉ុន្តែបន្ទាប់ពីឃើញបងប្អូនស្រីរបស់គាត់សម្តែង ហើយនឹងមានភាពសប្បាយរីករាយនោះ គាត់ក៏សម្រេចចិត្តសាកល្បងវាដោយខ្លួនឯង ហើយគាត់ពិតជាចូលចិត្តវាជាខ្លាំង។ ផ្លូវថ្មីដែលពោរពេញទៅដោយឱកាស ក៏បានបើកទ្វារសម្រាប់គាត់។ គាត់មានការសម្តែងរឿងដ៏ជក់ចិត្តជាច្រើនកន្លងមកនេះ ប៉ុន្តែនៅពេលប៉ុន្មានឆ្នាំកន្លងទៅ គាត់បានក្លាយជាមនុស្សពេញវ័យ ហើយគាត់បានដាក់សម្ពាធកាន់តែខ្លាំងមកលើខ្លួនគាត់ ដើម្បីទទួលបានជោគជ័យក្នុងជីវិតសិល្បៈនេះ។ ជីវិត និងអាជីពរបស់គាត់ ពឹងផ្អែកលើការសម្តែងរបស់គាត់ ដូច្នេះហើយរាល់ការប្រលង រាល់ការបដិសេធ រាល់ការបរាជ័យ បានធ្លាក់ចុះមកសង្កត់លើរូបគាត់យ៉ាងគំហុក ដូច្នេះជំងឺថប់បារម្ភរបស់គាត់ ចាប់ផ្តើមកាន់តែអាក្រក់ទៅៗ។ តួនាទីដ៏ធំដំបូងរបស់គាត់ គឺនៅក្នុងរឿងកំប្លែង “ណត អេណកដើរ ធីន ម៉ូវី” "Not Another Teen Movie" ។
ទោះបីជាភាពយន្តនេះ ទទួលបានការឆ្លើយតបអវិជ្ជមានពីអ្នកទស្សនាក៏ដោយ ក៏វាទទួលបានជោគជ័យក្នុងផ្នែកពាណិជ្ជកម្ម។ បន្ទាប់ពីបានសម្តែងរឿងតូចតាច និងភាពយន្តមិនសូវល្បីល្បាញជាច្រើនមក គ្រីស (Chris) ទទួលបានប្រជាប្រិយភាពក្នុងការដើរតួជាកំពូលវីរបុរស “ឃ្យូមែន ថច់” "Human Torch" ក្នុងរឿង ហ្វែនថាសស្ទីច ហ្វ (Fantastic Four) ប៉ុន្តែភាពយន្តនេះមិនសូវមានអ្នកគាំទ្រច្រើននោះទេ។ នៅក្នុងអាជីពសម្ដែងរបស់គាត់ គ្រីស អ៊ីវ៉ាន (Chris Evans) បានប្រឈមមុខនឹងការបដិសេធ និងការបរាជ័យជាច្រើនរាប់មិនអស់។ ក្នុងវិថីអាជីពនេះ រាល់សកម្មភាពល្អ ឬអាក្រក់ គឺសម្រេចតាមការមើលឃើញពីសាធារណៈជន បានធ្វើឲ្យមានការប៉ះពាល់ដល់សុខភាពផ្លូវចិត្ត របស់គាត់ជាខ្លាំង ហើយវាបានដើរតួនាទីយ៉ាងធំទៅលើជំងឺថប់បារម្ភរបស់គាត់។ ក្នុងឆ្នាំ 2010 ម៉ាវ៉ល (Marvel) បានផ្តល់ឱកាសពិសេសមួយសម្រាប់គាត់។ តារាសម្ដែងគ្រប់រូប នឹងមានការរំភើបក្នុងការសម្ដែងតួអង្គនេះ ប៉ុន្តែម្នាក់នោះមិនមែនជា គ្រីស (Chris) នោះទេ។
សម្ពាធនៃការសម្តែងជាតួឯកនេះ គឺមានអារម្មណ៍មិនអាចពណ៌នាបាននោះទេ។ គាត់ភ័យខ្លាចថា គាត់មិនល្អគ្រប់គ្រាន់សម្រាប់តួអង្គដ៏សំខាន់នេះ។ បញ្ហាផ្លូវចិត្តរបស់គាត់ ស្ទើរតែបណ្តាលឱ្យគាត់ បដិសេធតួអង្គដ៏ល្បីល្បាញបំផុតរបស់គាត់នេះ។ គាត់មានអារម្មណ៍ជំងឺថប់បារម្ភ និងជំងឺបាក់ទឹកចិត្ត កាន់តែខ្លាំងជាងមុន ដូច្នេះគាត់ចាប់ផ្ដើមមានការភ័យខ្លាចកាន់តែខ្លាំង ហើយគាត់ស្ទើរតែបោះបង់ អាជីពជាអ្នកសម្តែងទាំងស្រុងតែម្តងនៅពេលនោះ។ ដូច្នេះនៅពេលលើកដំបូង គ្រីស អ៊ីវ៉ាន (Chris Evans) បានបដិសេធតួនាទីជា កាពិទែន អាមេរិកខា (Captain America) នេះ ប៉ុន្តែថ្ងៃមួយ គ្រីស បានទទួលទូរស័ព្ទពី រ៉ូបើត ដោតនី ជូននៀរ (Robert Downey Junior) ហើយគាត់បានប្រាប់ គ្រីស ពីជីវិតរបស់គាត់ ការប្រយុទ្ធប្រឆាំងជាមួយគ្រឿងស្រវឹង និងគ្រឿងញៀន អតីតកាលដ៏ខ្មៅងងឹតរបស់គាត់ និងរបៀបដែលគាត់ក្រោកឡើងវិញ ហើយយកឈ្នះលើអ្វីៗទាំងអស់ រហូតបានក្លាយជា អាយរ៉ន មែន (Iron Man) ដែលទទួលបានភាពល្បីល្បាញជាខ្លាំង រហូតមកដល់ពេលនេះ។
ទោះបីជាគាត់មានការភ័យខ្លាចពីការបរាជ័យក៏ដោយ រ៉ូបើត ដោតនី ជូននៀរ (Robert Downey Junior) នៅតែអាចផ្លាស់ប្តូរផ្នត់គំនិតរបស់គាត់ ហើយជីវិតរបស់គាត់ក៏បានផ្លាស់ប្តូរផងដែរ។ បន្ទាប់ពី គ្រីស អ៊ីវ៉ាន (Chris Evans) បានទទួលទូរស័ព្ទដែលបានផ្លាស់ប្តូរជីវិតរបស់គាត់នេះ អ្វីមួយបានផ្លាស់ប្តូរនៅក្នុងខ្លួនគាត់។ គាត់ដឹងថា វាដល់ពេលដើម្បីបញ្ឈប់ការភ័យខ្លាចដែលតែងតែគ្រប់គ្រងជីវិតរបស់គាត់។
"ប្រហែលជារឿងដែលអ្នកខ្លាចបំផុត គឺជារឿងដែលអ្នកគួរធ្វើវា"។
ក្រោយមក ដូចដែលអ្នកទាំងអស់គ្នាបានដឹង “កាពិទែន អាមេរិកខា” "Captain America" បានទទួលភាពជោគជ័យដ៏ធំសម្បើម ហើយ គ្រីស អ៊ីវ៉ាន (Chris Evans) បានសម្តែងក្នុងតួអង្គនេះយ៉ាងអស្ចារ្យបំផុត។ គាត់បានក្លាយជាកំពូលវីរបុរស ម៉ាវ៉ល (Marvel) ដែលមានអ្នកស្រលាញ់ច្រើនបំផុត និងជាតារាដែលជោគជ័យបំផុតនៅហូលីវូដ។
ដូច្នេះ ដើម្បីធ្វើឱ្យចិត្តរបស់គាត់ឲ្យកាន់តែមានភាពស្ងប់ស្ងាត់ គ្រីស អ៊ីវ៉ាន (Chris Evans) បានទៅព្យាបាលនៅប្រទេសឥណ្ឌា ហើយគាត់បានចំណាយពេលបីសប្តាហ៍ ដើម្បីធ្វើសមាធិជាមួយគ្រូម្នាក់នៅទីនោះ។ ប៉ុន្តែដើម្បីធ្វើឱ្យចិត្តរបស់អ្នកស្ងប់ស្ងាត់ អ្នកមិនចាំបាច់ធ្វើដំណើរជុំវិញពិភពលោកនោះទេ អ្នកអាចសាកល្បងធ្វើសមាធិនៅផ្ទះរបស់អ្នកបាន។ តើអ្នកមិននឿយហត់នឹងអារម្មណ៍មិនស្ងប់ស្ងាត់ និងភ័យខ្លាចគ្រប់ពេលទេឬ? ចាប់ផ្តើមហ្វឹកហាត់ខួរក្បាលរបស់អ្នក! ចាប់ផ្តើមជាមួយការធ្វើសមាធិ 10 នាទី ជារៀងរាល់ថ្ងៃ។ អ្នកមិនមានអ្វីត្រូវបាត់បង់នោះទេ ហើយអ្វីដែលអ្នកទទួលបាននោះគឺ ផលប្រយោជន៍សម្រាប់សុខភាពផ្លូវចិត្តរបស់អ្នកតែម្យ៉ាងគត់។ ហើយចាំថា "ប្រហែលជារឿងដែលអ្នកខ្លាចបំផុត គឺពិតជារឿងដែលអ្នកគួរតែធ្វើ"៕
