ម្ចាស់បទចម្រៀង ម៉ាយ ហាត វីល ហ្គ៊ អន (My heart will go on) ដែលមនុស្សគ្រប់គ្នាបានស្គាល់ថាជាអ្នកណា នៅពេលដែលនាងបានទទួលកេរ្តិ៍ឈ្មោះបោះសម្លេងល្បីរន្ទឺជុំវិញពិភពលោក ប៉ុន្តែតើអ្នកដឹងទេថា ជីវិតនៅក្រោយភាពជោគជ័យ និងបន្ទាប់ពីទទួលបានភាពជោគជ័យរបស់នាង មានរឿងសោកសៅច្រើនប៉ុណ្ណា? ពេលនេះយើងអាចមកស្តាប់ពីខ្សែជីវិតរបស់គាត់ទាំងអស់គ្នា។
សែលីន ឌីអន (Celine Dion) គឺជាកូនពៅក្នុងចំណោមកូន 14 នាក់ ហើយធំឡើងក្នុងគ្រួសារក្រីក្របំផុត។ ឪពុករបស់នាងជាអ្នកកាប់សាច់ ហើយម្ដាយនាងជាស្ត្រីមេផ្ទះ។ កាលពីនៅក្មេងនាងធ្លាប់ដេកក្នុងថតទូរ ដើម្បីសន្សំសំចៃថ្លៃទិញកូនអង្រឹងសម្រាប់ទារក។ ហើយនៅពេលដែលនាងធំឡើង នាងបានដេកគ្រែមួយជាមួយបងប្អូនស្រីបីនាក់ទៀត។ នៅសាលារៀន អ្វីៗគឺពិបាកសម្រាប់នាង។ នាងត្រូវ បានក្មេងដទៃធ្វើបាប ហើយត្រូវបានគេហៅថានាងថា បិសាចជញ្ជក់ឈាមទៀតផង ដោយសារតែធ្មេញនិងរាងដ៏ស្គមរបស់នាងដែលបណ្តាលឱ្យនាងស្អប់ខ្ពើមសាលាជាខ្លាំង។ ដូច្នេះតាំងពីតូចមក នាងស្រមៃចង់ក្លាយជាតារាសំដែងនៅលើឆាក។
ដូច្នេះនៅពេលដែល សែលីន ឌីអន (Celine Dion) មានអាយុត្រឹមតែ 12 ឆ្នាំ ម្តាយរបស់នាងបានជួយនាងសរសេរបទចម្រៀងសម្រាប់ថតខ្សែអាត់សម្លេងចម្រៀង ដែលត្រូវបានផ្ញើទៅកាន់អ្នកគ្រប់គ្រងតន្ត្រី រ៉ែនណេ អែងហ្កែលឡីល (René Angélil)។ ហើយគាត់ត្រូវបានរំជួលចិត្តដោយសំឡេងរបស់ សែលីន (Celine) ដូច្នេះគាត់បានសម្រេចចិត្តធ្វើឱ្យនាងក្លាយជាតារាម្នាក់។ ទេពកោសល្យរបស់នាង គឺគ្មានអ្នកណាអាចប្រកែកបានឡើយ ហើយភាពជោគជ័យរបស់នាងគឺបានសម្រេចរួចហើយ តាំងពីពេលនាងចាប់ផ្តើមច្រៀងលើកដំបូងមកម៉្លេះ។ ៥ឆ្នាំក្រោយមក នាងបានលង់ស្រលាញ់អ្នកគ្រប់គ្រងរបស់នាង ដែលមានវ័យចាស់ជាងនាងច្រើន។ ដូច្នេះដំបូងឡើយ ម្តាយរបស់នាងមិនយល់ព្រមចំពោះទំនាក់ទំនងនេះទេ ប៉ុន្តែប៉ុន្មានឆ្នាំបានកន្លងផុតទៅ នាងបានទទួលស្គាល់ថា សែលីន (Celine) របស់គាត់សប្បាយចិត្តក្នុងការនៅក្បែរបុរសម្នាក់នោះ ហើយនោះជារឿងតែមួយគត់ដែលសំខាន់បំផុតសម្រាប់ជីវិតរបស់កូនស្រីរបស់គាត់។ សែលីន ឌីអន (Celine Dion) មិនយូរប៉ុន្មានក៏ទទួលបានភាពល្បីល្បាញទូទាំងពិភពលោក។ នាងបានឈ្នះពានរង្វាន់ ក្រែមមី (grammys) ចំនួន ១៥ ជាមួយនឹងអាល់ប៉ុមចំនួន 200 លានច្បាប់ ដែលបានលក់នៅទូទាំងពិភពលោក ហើយនាងនៅតែជាសិល្បករកាណាដា ដែលលក់ដាច់បំផុតគ្រប់ពេលទាំងអស់។ ហើយទ្រព្យសម្បត្តិរបស់នាង គឺ 800 លានដុល្លារ។
ប៉ុន្តែជីវិតរបស់ សែលីន (Celine) បន្ទាប់ពីទទួលបានកេរ្តិ៍ឈ្មោះមិនល្អឥតខ្ចោះនោះទេ។ ដំបូងឡើយ គូស្នេហ៍ទាំងពីរនេះ មានការតស៊ូជាខ្លាំងដើម្បីមានកូន ដូច្នេះបន្ទាប់ពីមានកូនដំបូងរបស់នាង សែលីន (Celine) បានរង់ចាំដប់ឆ្នាំបន្ទាប់ ទើបបានស្វាគមន៍កូនភ្លោះរបស់នាង។ ហើយនៅពេលដែលអ្វីៗចាប់ផ្តើមដំណើរការល្អប្រសើរ ស្វាមីរបស់នាងបានចុះចាញ់នឹងការប្រយុទ្ធដ៏យូរជាមួយនឹងជំងឺមហារីក ហើយក៏បានទទួលមរណភាពទៅ។ ហើយអ្វីដែលកាន់តែ គួរឲ្យសោកស្ដាយថែមទៀតនោះ គឺក្នុងរយៈពេលតែពីរថ្ងៃបន្ទាប់ប៉ុណ្ណោះ បងប្រុសរបស់នាងក៏បានទទួលមរណភាពផងដែរ។
“មរណៈភាពរបស់ស្វាមីរបស់ខ្ញុំពិតជាពិបាកណាស់។ ខ្ញុំបានឃើញគាត់រងទុក្ខជាខ្លាំង ហើយនោះជារឿងដែលអាក្រក់បំផុត។ ថ្ងៃនេះ សម្រាប់ខ្ញុំ វាហាក់បីដូចជាខ្ញុំមិនបានរស់នៅជាមួយគាត់ជារូបរាងនោះទេ ប៉ុន្តែខ្ញុំរស់នៅជាមួយគាត់នៅក្នុងចិត្តរបស់ខ្ញុំ។ ខ្ញុំចាប់ផ្តើម និយាយជាមួយគាត់ ហើយខ្ញុំបាននិយាយថាតើអ្នកដឹងអ្វីទេ? ខ្ញុំចង់ឱ្យអ្នកទៅឲ្យបានសុខ។ ខ្ញុំចង់ឱ្យអ្នកឈប់ព្រួយបារម្ភទៀត ព្រោះអ្នកតែងតែបានបារម្ភពីអាជីពរបស់ខ្ញុំ, អ្នកបារម្ភពីកូនៗ, អ្នកបានព្រួយបារម្ភអំពីអ្វីៗទាំងអស់, ដូច្នេះពេលនេះ វាគ្រប់គ្រាន់ហើយ។ ខ្ញុំសន្យានឹងអ្នកថា ពួកយើងទាំងអស់ដែលនៅពីនេះ នឹងមិនអីទេ។ ចំណែកបងប្រុសរបស់ខ្ញុំដែលបានទទួលមរណៈភាពដោយជំងឺមហារីកស្រដៀងទៅនឹងគាត់ បានទទួលមរណភាពក្នុងថ្ងៃខួបកំណើតរបស់ រ៉ែនណេ (René) ហើយខ្ញុំនិយាយទៅកាន់ខ្លួនឯងថា សម្រាប់ខួបកំណើតរបស់គាត់ ស្វាមីរបស់ខ្ញុំបានមកទទួលបងប្រុសរបស់ខ្ញុំទៅជាមួយហើយ ដោយសារតែបងប្រុសរបស់ខ្ញុំទន់ខ្សោយពេក មិនអាចហោះហើរដោយខ្លួនឯងបាន។ អ្នកមិនដែលត្រៀមខ្លួនសម្រាប់រឿងបែបនេះនៅពេលវាកើតឡើងឡើយ ទោះបីជាអ្នកបានរំពឹង ទុកពីវាយ៉ាងយូរក៏ដោយ។ ពេលវាមកដល់អ្នកមិនអាចត្រៀមខ្លួនរួចរាល់ទេ”។
ក្រោយពីស្វាមី និង បងប្រុសរបស់នាងបានទទួលមរណៈភាពទៅជីវិតដែលនាងធ្លាប់មានបានដួលរលំស្ទើរតែទាំងអស់។ សែលីន (Celine) រស់នៅជាមួយភាពទុក្ខសោកអស់រយៈពេលជាយូរ ប៉ុន្តែនាងមិនមានជម្រើសអ្វីក្រៅពីចាប់ផ្តើមឡើងវិញនោះទេ។
“វាជាពេលដែលអ្នកគិតថា អ្នកមិនអាច តែអ្នកអាចធ្វើបាន”
ការបាត់បង់មនុស្សជាទីស្រឡាញ់ គឺជាបទពិសោធន៍ដ៏ឈឺចាប់បំផុតមួយ។ វាជារឿងមួយដ៏អាក្រក់បំផុត ដែលអ្នកមិនធ្លាប់ជួបប្រទះពីមុនមក ហើយបើទោះបីជាការឈឺចាប់អាចកាត់បន្ថយទៅតាមពេលវេលាដែលកន្លងទៅក៏ដោយ វាមិនបាត់ទៅវិញទាំងស្រុងនោះទេ ប៉ុន្តែមានរឿងមួយដែលប្រាកដនោះគឺអ្នកមិនអាចឈប់រស់នៅបានឡើយ។ យើងខាតពេលជាច្រើនណាស់ ដោយសារស្ត្រេសទៅលើរឿង មិនបានការអ្វីសោះ។ យើងបារម្ភពីរឿងដែលមិនសំខាន់។ ក្រោកឡើងឱបក្រសោបពេលវេលាដែលអ្នកមាន និងគ្រប់ដង្ហើមដែលអ្នកមានគឺជាកាដូសម្រាប់អ្នក ហើយត្រូវនិយាយទៅកាន់ខ្លួនឯងថា ខ្ញុំស្រលាញ់អ្នកត្រូវមានចិត្តល្អ ហ៊ានផ្សងព្រេង ធ្វើអ្វីដែលអ្នកតែងតែចង់ធ្វើ ហើយស្វែងរកកម្លាំងចិត្តដើម្បីចាប់ផ្តើមជាថ្មី ព្រោះថ្ងៃស្អែកគឺជាថ្ងៃថ្មី និងជាជីវិតថ្មី៕
