ឆ្មាំឆ្នេរសមុទ្រអ៊ីតាលី បានជួយសង្គ្រោះអ្នកចំណាកស្រុកចំនួន 244 នាក់ រួមទាំងទារកទើបនឹងកើត ចេញពីទូកដែលរសាត់អណ្តែតជាច្រើនគីឡូម៉ែត្រពីឆ្នេរសមុទ្រនៃតំបន់ Calabria ។
វាកើតឡើងនៅពេលដែលសហភាពអឺរ៉ុបបានយល់ព្រមបញ្ជូនយន្តហោះទៅឃ្លាំមើលច្រាំងសមុទ្រអង់គ្លេសសម្រាប់សកម្មភាពអ្នកចំណាកស្រុក បន្ទាប់ពីមនុស្ស 27 នាក់បានស្លាប់ នៅពេលដែលទូកបានផ្ទុកលើសចំណុះដែលបានលិចកាលពីសប្តាហ៍មុន។
ឆ្មាំសមុទ្របាននិយាយនៅក្នុងសេចក្តីថ្លែងការណ៍មួយថា ពួកគេបានចាប់ផ្តើមយុទ្ធនាការជួយសង្គ្រោះពេញមួយយប់ (នៅយប់ថ្ងៃសៅរ៍ឈានចូលថ្ងៃអាទិត្យ) ការជួយសង្គ្រោះតំបន់ Calabria មានរយៈពេលជាង 16 ម៉ោង ដែលមានភាពលំបាកខ្លាំងដោយសារបញ្ហាអាកាសធាតុ និងលក្ខខណ្ឌសមុទ្រ។
ក្នុងចំណោមមនុស្សដែលត្រូវបានគេជួយសង្គ្រោះនោះ មានមនុស្ស ៤១ នាក់ជាអនីតិជន រួមទាំងទារកដែលទើបនឹងកើតនៅលើទូកកាលពីថ្ងៃសៅរ៍ផងដែរ។
ប្រទេសអ៊ីតាលីបានមើលឃើញថា មានការកើនឡើងយ៉ាងខ្លាំងនៃអ្នកចំណាកស្រុកតាមទូកក្នុងរយៈពេលប៉ុន្មានសប្តាហ៍ថ្មីៗនេះ ហើយការមកដល់ចុងក្រោយបំផុតនឹងដាក់សម្ពាធបន្ថែមដល់រដ្ឋាភិបាលរបស់នាយករដ្ឋមន្ត្រី Mario Draghi ដើម្បីទទួលបានកិច្ចព្រមព្រៀងជាមួយដៃគូសហភាពអឺរ៉ុបអំពីរបៀបដោះស្រាយការលំហូរចូលអ្នកចំណាក់ស្រុកដ៏ច្រើននេះ។
អ្នកចំណាកស្រុកចំនួន 296 នាក់ផ្សេងទៀត ត្រូវបានជួយសង្គ្រោះដោយឆ្មាំសមុទ្រអ៊ីតាលីនៅលើសមុទ្រមេឌីទែរ៉ាណេ កាលពីថ្ងៃទី 25 ខែវិច្ឆិកា ខណៈដែលពួកគេព្យាយាមធ្វើដំណើរទៅឲ្យដល់អឺរ៉ុប។
នៅឆ្នាំនេះ ផ្លូវសម្រាប់ធ្វើចំណាកស្រុកដ៏មមាញឹក និងគ្រោះថ្នាក់បំផុតទៅកាន់ទ្វីបអឺរ៉ុប គឺជាតំបន់មេឌីទែរ៉ាណេកណ្តាល ដែលមនុស្សធ្វើដំណើរតាមទូកមានចំនួនកាន់តែច្រើនពីប្រទេសលីប៊ី និងទុយនីស៊ី ហើយក្នុងករណីខ្លះ ពីប្រទេសទួរគី ឆ្ពោះទៅប្រទេសអ៊ីតាលី។
យោងតាមទិន្នន័យរបស់ក្រសួងមហាផ្ទៃ អ្នកចំណាកស្រុកប្រហែល 62,236 នាក់បានមកដល់ប្រទេសអ៊ីតាលីក្នុងឆ្នាំ 2021 បើធៀបនឹងចំនួន 32,542 នាក់ ក្នុងរយៈពេលដូចគ្នាកាលពីឆ្នាំមុន។
ក្នុងឆ្នាំនេះ មន្ត្រីអង្គការសហប្រជាជាតិបានប៉ាន់ប្រមាណថាមនុស្ស 1,600 នាក់បានស្លាប់ ឬបាត់ខ្លួននៅក្នុងសមុទ្រមេឌីទែរ៉ាណេ៕
អត្តបទដកស្រង់ពី abc.net.au
បកប្រែនិងកែសម្រួលដោយ Mr. Blue