Britney Spears បានស្នើរសុំអោយអ្នកគាំទ្រមេត្តាគោរពភាពឯកជនរបស់ខ្លួនដោយកាលពីថ្ងៃអង្គារ៍ទី២៣កន្លងទៅនេះមានអាជ្ញាធរខ្លះបានចុះមកអង្កេតដល់ផ្ទះរបស់នាងបន្ទាប់ពីនាងបានធ្វើការលុបគណនី Instagram។ កាលពីថ្ងៃព្រហ្បតិ៍ទី២៦កន្លងទៅ ម្ចាស់បទចម្រៀង «Baby One More Time» បានធ្វើការបើកគណនី Twitter របស់ខ្លួនរួចនិយាយទាក់ទងអំពីហេតុការណ៍មួយដែលទើបតែបានកើតឡើងដោយមានអាជ្ញាធរមួយចំនួនរាយការណ៍មកថាបានទទួលបានការខលអោយមកកាន់ផ្ទះរបស់នាងនៅយប់ថ្ងៃអង្គារ៍ទី២៣ ដើម្បីចុះមកត្រួតពិនិត្យមើលស្ថានការណ៍របស់នាងបន្ទាប់ពីនាងបានធ្វើការលុបចោលគណនី Instagram របស់ខ្លួន។
Britney Spears បានសរសេរឡើងថា«ដូចដែលអ្នកទាំងអស់គ្នាបានដឹងហើយថាមានក្រុមប៉ូលីសបានចុះមកផ្ទះរបស់ខ្ញុំដោយមានការខល Prank មួយចំនួន។ ខ្ញុំពិតជាស្រឡាញ់អ្នកគាំទ្ររបស់ខ្ញុំប៉ុន្តែម្តងនេះវារាងលើសបន្តិចហើយ ដែលភាពឯកជនរបស់ខ្ញុំត្រូវបានឈ្លានពាន»។ នាងបន្តទៀតថា«ប៉ូលីសមិនធ្លាប់ចូលមកកាន់ផ្ទះរបស់ខ្ញុំនោះទេ ហើយនិងនៅពេលដែលពួកគេបានមកដល់របងផ្ទះ ក៏ដឹងភ្លាមថាមិនមានរឿងអ្វីកើតឡើងនោះទេ ពួកគេក៏ប្រញាប់ចេញទៅវិញភ្លាមៗ»។
នាងបានសរសេរបន្ថែមទៀតថា«ខ្ញុំមានអារម្មណ៍ថាជាជនរងគ្រោះម្នាក់ព្រោះហេតុការណ៍នេះនឹងក្លាយជាព័ត៌មាន ហើយសារព័ត៌មានអាចនឹងរៀបរាប់ខ្ញុំក្នុងរូបភាពមួយដែលមិនស្មើភាព។ ខ្ញុំសង្ឃឹមថាទាំងអ្នកគាំទ្រខ្ញុំ និងសាធារណៈទាំងអស់នឹងអាចគោរពភាពផ្ទាល់ខ្លួនរបស់ខ្ញុំ»។ អ្នកគាំទ្របានធ្វើការខលហៅប៉ូលីសបន្ទាប់ពី Britney Spears បានលុបចោលគណនី Instagram របស់នាង បន្ទាប់ពីជាងមួយខែហើយដែលស្វាមីរបស់នាងលោក Sam Asghari បានសាកសុំអោយអ្នកគាំទ្ររបស់នាងបន្ធូរបន្ថយការដានតានសកម្មភាពរបស់ Britney Spears នៅលើ Instagram។ លោកបានសរសេរនៅលើ Instagram Story កាលពីថ្ងៃទី៨ ខែធ្នូថា«ពេលខ្លះជារឿងល្អមួយក្នុងការដកខ្លួនមួយរយៈ នាងក៏មានសំលេងរបស់នាង ហើយក៏ជាមនុស្សស្រីម្នាក់មានសិទ្ធិសេរីភាព ខ្ញុំគោរពលើភាពឯកជនរបស់នាង និងការពារវាជានិច្ច»។
