Blackpink បានវិលត្រឡាប់ជាថ្មីជាមួយបទចំរៀងដែលទើបតែបកពីស្រោមរបស់ខ្លួន មិនបានប៉ុន្មានផងក៏ស្រាប់តែផ្ទុះការចាប់អារម្មណ៍មហាធំធេងមួយ ធ្វើអោយម្នាក់ៗទំលាក់រឿងរ៉ាវចុះប្តូរមកនិយាយពាក់ពន្ធ័នឹងតារាស្រីទាំងបួននាក់វិញ។ បទចំរៀង «Pink Venom» របស់ BlackPink ដែលត្រូវបានចេញផ្សាយនៅក្នងថ្ងៃទី១៩ ខែសីហា ថ្មីៗនេះ បានធ្វើអោយផ្ទុះកក្រើកបណ្តាញសង្គមឌីជីថលម្តងទៀតហើយ។​​​ 

គេសង្កេតឃើញថាត្រឹមរយៈពេល៣ម៉ោងនៃការផ្សាយ Premireនៅលើឆាណែលយូធូប​​​ ក៏មានអ្នកចូលទស្សនាចំនួន២១លានដង និងមានចំនួនអ្នកចុចឡាច២លាននាក់។ នៅក្នុងខនសេបនៃបទចំរៀង «Pink Venom»នេះ ផលិតកម្ម YG បានប្រាប់អោយដឹងថានេះគឺជាវីឌីអូបទចំរៀងដែលចំណាយថវិកាថតអស់ច្រើនជាងគេបង្អស់បើប្រៀបធៀបនឹងកន្លងមក។ ប៉ុន្តែតាមរយៈវីឌីអូចម្រៀងមួយនេះ ផលិតកម្ម YG មិនបានធ្វើអោយអ្នកគាំទ្ររបស់ Black Pink មានការខកបំណងនោះទេ ពួកគេបានពាំនាំយកនូវខនសេបមួយដ៏ប្លែកថ្មីទៀតហើយជុំវិញនូវពាក្យថា Pink Venom នេះដោយបានបង្ហាញពីឥទ្ធិពលរបស់ផ្កាដែលមានពិសពណ៌ផ្កាឈូកម្យ៉ាងអាចបញ្ចេញអនុភាពគ្រោះថ្នាក់របស់ខ្លួនបានគ្រប់ពេលទៅលើបុគ្គលខ្លួនប៉ុនប៉ងធ្វើបាប។ ថ្មីៗនេះផងដែរយោងទៅតាមការផ្សាយប្រាប់របស់ផលិតកម្ម YG បានអោយដឹងថាដើម្បីជាការប្រម៉ូតបទចំរៀង Pink Venomនេះ ពួកគេបានធ្វើគំរោងមួយដែលហៅថា«light​​​ up the pink» គឺជាការដៅទីតាំងមួយចំនួននៅលើសកលលោកដើម្បីផ្តល់ជូនកាដូពិសេសមួយទៅកាន់អ្នកគាំទ្ររបស់ Black Pinkនៅពេលដែលពួកគេបើក Location និងធ្វើដំណើរទៅកាន់តំបន់ទាំងនោះ។ 

នៅក្នុងនោះផងដែរប្រទេសកម្ពុជាក៏ទទួលបានការដៅ៥កន្លែងផងដែរនៅក្នុងទីតាំងរួមមានផ្សារទំនើបអ៊ឺអន១ ផ្សារធំថ្មី កោះពេជ្រ Pub Street និងផ្សារទំនើប Heritage Walk។ តាមរយៈបណ្តាញសង្គម Twitter មានបណ្តាអ្នកគាំទ្ររបស់ Black Pink មួយចំនួនបានធ្វើការបង្ហោះកាដូពិសេសដែលពួកគេទទួលបាននៅក្នុងគំរោង light up the pink នោះមានដូចជាបំណែករូបភាពឌីជីថលគូរឡើងដោយសមាជិករបស់ Blackpink តែម្តង។